Talily Soa Nisorate i Jaona 20:1-31
20 Tamy ty andro voaloha’e amy i heregnandroy, le nandeha an-kibory agne maraindray bey ty Maria Magdalena amy i androy mbe maienkiegney. Le nitrea’e tie fa tsy tamy i lala i kiborỳ eo sasa i vato hili’ey.
2 Le nilay tamy i Simona Petera naho i mpianatse tea i Jesosỳ agne reke, sady hoe reke tamy iareo: “Nisy nangalake tan-kibory ao i fate i Tompoy, le tsy fanta’ay tie aia ty nisia iareo aze.”
3 Nandeha mbamy i kiborỳ mbeo areke ty Petera naho i mpianatse raikey.
4 Nilay iareo roe lahy naho fa nimban-kibory mbeo. Faie i mpianatse raikey ty nahalay ambone i Petera, le ireke ty niavy aloha an-kibory agne.
5 Faie tsy nizilike reke fa nitilihitse an-dalagneo avao. Le nitrea’e i lamba rongony namognosagne i fate i Jesosỳ.
6 Naho fa niavy ty Petera, le nizilike tan-kibory ao. Le nitrea’e tao i lamba rongony namognosagne i fate i Jesosỳ.
7 Faie i lamba namognosagne ty loha i Jesosỳ, tsy niarake tamy i lamba ila’e rey teo fa nihologne irery.
8 Tamy izay vaho nizilike tan-kibory ao ka i mpianatse niavy voaloha’e teoy, le nahatrea naho nino i raha nirehafegne tamy iareoy.
9 Faie mbe tsy nitaka iareo i raha nirehafe ty Soratse Masigne tihoey tie hovelomegne amy ty mate reke.
10 Le nandeha noly o mpianatse rehoe.
11 Fa i Maria nitsangagne narine i kiborỳ teo avao sady nitagny. Tamy ireke nitagnỳ, le nitilihitse ty tan-kibory ao.
12 Le nahatrea anjely roe niakanjo foty reke nitoboke tamy nisy i fate i Jesosỳ eo. Ty raike tamy ty nisy i loha’ey eo, le ty raike tamy ty nisy i tombo’ey eo.
13 Le hoe iareo tamy i Maria: “O rampela, nagnino ihe tomagnio?” Le hoe ty Maria tamy iareo: “Nisy nangalake i fate i Tompokoỳ, le tsy fantako tie aia ty nasia iareo aze.”
14 Nitolike reke naho fa boake nirehake izay, le nahatrea ndaty nitsangagne tafara’e tao. I Jesosy o ndaty iohoe faie tsy nifanta’e.
15 Le hoe ty Jesosy tama’e: “O rampela, nagnino ihe tomagnio? Ino o paliae’ò?” Atao i Maria ho ndaty mpikarakara i tonday reke, hafarà’e hoe ty Maria tama’e: “Naho ihe aba ty nangalake aze, le mba atorò ahy ty nasia’o aze fa halaeko.”
16 Le hoe ty Jesosy tama’e: “Maria!” Le nitolike ty Maria sady hoe reke tamy i Jesosy tamy ty rehake hebreo: I “Rabony!” (“Mpagnanatse!” ty dika o rehake iohoe)
17 Le hoe ty Jesosy tama’e: “Ko mitagne amako sasa rehe fa mbe tsy niakatse tamy i Rae agne raho. Mandehana rehe amy i rahalahiko rey agne, le rehafo amy iareo tie: ‘Hiakatse ho amy i Raekoy agne naho amy i Rae’areoy agne raho, le i Andrianagnaharekoy naho i Andrianagnahare’areoy.’”
18 Naho fa niavy ty Maria Magdalena, le nambara’e i mpianatse rey ze vaovao zay sady hoe reke: “Nitreako ty Tompo!” Le nambara’e iareo iaby ze raha nirehafe i Jesosy tama’e.
19 Tamy i andro voaloha’e tamo o heregnandro iohoey, le nihily an-tragno i mpianatse rey naho fa nihariva satria natahotse o Jiosio. Le nitsangagne tagnivo iareo eo ty Jesosy sady hoe reke tamy iareo: “Fiadagnagne abey ho anareo.”*
20 Naho fa boake nirehake izay reke, le natoro’e iareo i tagna’ey naho i leme’ey. Nifale areke i mpianatse rey naho fa nahatrea i Tompo.
21 Hoe indraike ty Jesosy tamy iareo: “Fiadagnagne abey ho anareo. Manahake ty agniraha i Rae ahy ro agnirahako anareo ka.”
22 Naho fa boake nirehake izay reke, le nitiofe’e iareo sady hoe reke: “Rambeso’areo i fagnahy masigney.
23 Naho misy ndaty raike manota faie avela’areo ty fahota’e, le fa namela aze zay ty Andrianagnahare. Fa naho tsy avela’areo ty fahota ty ndaty raike nanota, le tsy namela aze ka zay ty Andrianagnahare.”
24 Faie tsy teo ty Tomasy, i agnisa i 12 lahy reỳ sady tokavegne tihoe Hambagney, tamy i Jesosy niavy tamy iareo eoy.
25 Le hoe i mpianatse ila’e rey tama’e: “Nitrea’ay ty Tompo!” Faie hoe reke tamy iareo: “Naho tsy mitsapa ty lia i lefogne amy i leme’ey eoy raho sady naho tsy treako ka ty lia i fantsibigne nipehagne aze tamy i tagna’ey eoy, le tsy hino izay raho.”
26 Ie valo andro tafara izay, le nivory tan-tragno ao indraike i mpianatse rey. Teo ty Tomasy tamy izay. Le avy le nitsangagne tagnivo iareo eo ty Jesosy ndra tie nihily aza ty lala i tragnoy. Nirehake reke tie: “Fiadagnagne abey ho anareo.”
27 Hoe reke tamy i Tomasy naho fa niavy eo: “Anò etoa i rambon-tagna’oy, le henteo i tagnakoy. Anò amy i lemekoy etoa ka i tagna’oy. Ko misalasala sasa fa minoa amy izay.”
28 Hoe ty navale i Tomasy aze: “I Tompoko naho i Andrianagnaharekoy!”
29 Le hoe ty Jesosy tama’e: “Noho irehe mahatrea ahio vao o mahavy azo minò? Sambatse ze tsy mahatrea faie mino.”
30 Mbe maro ty fahagagagne natao i Jesosy tagnatreha i mpiana’e rey eo, faie tsy nisorategne tamy ty horognam-boke toy ato zay.
31 Faie nisorategne o raha rehoe amy izay nareo mino tie i Jesosy, i Kristy Anan’Agnaharey. Naho mino ka nareo, le hahazo havelogne amy ty agnara’e.
Fagnamarehagne ambane peje
^ Fomba fanalamà o Jiosio o rehake iohoe.
