Talily Soa Nisorate i Jaona 21:1-25
21 Tafara izay, le niseho tamy i mpianatse rey indraike ty Jesosy, tamy ty Ria i Tiberiasy eo. Hoe izao ty fomba nisehoa’e tamy iareo:
2 Niharo lia ty Simona Petera, i Tomasy (i tokavegne tihoe Hambagney), i Natanaela boake a Kana a Galelia agney, i ana-dahy i Zebedio rey, vaho i mpianatse roe hafa rezay.
3 Hoe ty Simona Petera tamy iareo: “Handeha hagnarato hey raho.” Le hoe iareo tama’e: “Hiarake ama’o ka zahay.” Nijogne tagnate i lakagney ao areke iareo, le nandeha nagnarato. Nagnarato avao iareo tagnate i halegney faie tsy nahazo fiagne ndra raike.
4 Ie naho fa nimaraindray i androy, le nitsangagne ta moron-driake ey ty Jesosy. Faie tsy nihay i mpianatse rey tie i Jesosy io.
5 Le hoe ty Jesosy tamy iareo: “O ry anake, misy raha hohanegne vao nareo?” Hoe ty navale iareo: “Tsy misy!”
6 Hoe reke tamy iareo: “Atoraho’areo mbankavana i lakagney ao i harato’areoy, le hahazo fiagne nareo.” Natora iareo areke i harato iareoy. Tsy nileo iareo ty nitarike aze satria nimaro loatse ty fiagne tagnate’e tao.
7 Hoe i mpianatse tea i Jesosỳ tamy i Petera: “I Tompo io kahe!” Naho fa nirey i Simona Petera i reha i mpianatsey tie i Tompo ioy, le nagnisia’e i akanjo’ey satria reke nihalo avao. Le avy le nijorobogne tagnate rano ao reke.
8 Fa i mpianatse ila’e rey, nijanogne tagnate i lakagney tao avao sady nitarike i harato feno fiagney mbamy i moro’ey mbeo. Eo ho eo amy ty 100 metatse* miala i moro’ey ty nisy iareo tamy izay.
9 Naho fa niavy ta moro’ey iareo, le nahatrea afo fa mirehetse sady nisy fiagne ty tam-bone’ey. Nahatrea mofo ka iareo.
10 Hoe ty Jesosy tamy iareo: “Mindesa fiagne amy i vaho niazo’areoy mbetoa nareo.”
11 Nijogne agnate lakagne ao areke ty Simona Petera, le tinari’e mba moro’e mbeo i harato feno fiam-beỳ. Fiam-bey 153 ty tagnate i haratoy ao. Faie ndra tie nimaro aza i fiagney tie tao, le tsy niriatse i haratoy.
12 Hoe ty Jesosy tamy iareo: “Mbetoa nareo hihinagne.” Tsy nisy nahavany nagnontane aze i mpianatse rey tie: “Ia ireheo?” Ty anto’e, nihay iareo tie i Tompo io.
13 Nalae i Jesosy i mofoy, le nimea’e iareo. Hoe izay ka ty natao’e tamy i fiagney.
14 Tamo o fotoagne iohoe ty nisehoa i Jesosy fagnintelo’e tamy i mpiana’e rey tafara ty namelomagne aze tamy ty mate.
15 Naho fa boake nihinagne iareo, le hoe ty Jesosy tamy i Simona Petera: “O Simona ana i Jaona, tea’o ambone iretia vao raho?” Hoe ty navale’e aze: “Eka, sady irehe anio Tompo mahay tie tena tea azo raho.” Le hoe ty Jesosy tama’e: “Fahano areke o anak’agnondrikò.”
16 Le hoe indraike ty Jesosy tama’e: “O Simona ana i Jaona, tea ahy vao rehe?” Le hoe ty navale’e: “Eka, sady irehe anio Tompo mahay fa tena tea azo raho.” Le hoe reke tama’e: “Andrazo areke o agnondriko kedekedeo.”
17 Le hoe indraike ty Jesosy tama’e fagnintelo’e: “O Simona ana i Jaona, tena tea ahy vao rehe?” Le nalahelo ty Petera amy i fagnontenea’e fagnintelo’e tihoey tie: “Tena tea ahy vao rehe?” Le hoe reke tama’e: “O Tompo, mahafantatse ze kila raha rehe. Hai’o fa tena tea azo raho.” Le hoe ty Jesosy tama’e: “Fahano areke o agnondriko kedekedeo.
18 Volagneko ama’o, fa naho mbe tanora rehe, le ihe avao ro mampiakanjo ty vata’o sady mandeha amy ze tea’o handehanagne. Fa naho fa antetse rehe, le ndaty hafa ty hampiakanjo azo naho hinday azo amy ze toeragne tsy tea’o hombagne.”
19 Nirehake izay reke mba hampahafantaragne tie hagnomey voninahitse an’Andrianagnahare ty fomba himateza i Petera. Tafara izay, le hoe reke tamy i Petera: “Magnoriha ahy avao rehe.”
20 Nitolike ty Petera, le nahatrea i mpianatse tea i Jesosỳ nagnorike iareo. O mpianatse iohoe i niato tan-tratra i Jesosy eo tamy iareo nihinagne harivay sady nirehake tihoey tie: “O Tompo, ia o hifotetse azò?”
21 Naho fa nahatrea i mpianatsey ty Petera, le hoe reke tamy i Jesosy: “O Tompo, akore ka ty amy ty lahy tia?”
22 Hoe ty Jesosy tama’e: “Ino moa ty manahiragne azo naho teako ho eo avao reke amparake ty hiaviako? Fa irehe magnoriha ahy avao.”
23 Faie ty rehake niavy amy i mpianatse ila’e rey agne le tihoe, tsy homate o mpianatse iohoe. Faie tsy nirehake ty Jesosy tie tsy homate reke fa ty nirehafe’e le tihoe: “Ino moa ty manahiragne azo naho teako ho eo avao reke amparake ty hiaviako?”
24 O mpianatse iohoe ty vavolombelo ze raha rezay sady nanoratse aze. Haintika ka tie maregne ty raha nirehafe’e.
25 Naho ty maregne, le mbe misy raha maro ka natao i Jesosy. Faie naho nisorategne iaby rey, le matoky raho fa tsy nisy toeragne* ho nitandre ze horognam-boke rezay iaby.
