Talily Soa Nisorate i Jaona 4:1-54
4 Nihay i Tompo fa nirey o Fariseò tie nanao badisa reke sady ty ndaty natao’e badisa ro tena maro ambone ty ahy i Jaona.
2 (Faie naho ty maregne, le tsy i Jesosy ro nanao badisa fa i mpiana’e rey.)
3 Hafarà’e reke niala ta Jodia ao, le nandeha a Galelia agne indraike.
4 Faie tsy maintsy niary ta Samaria agne reke.
5 Niavy ta Sikara, tanàgne raike a Samaria ao zay reke. Marine i teteke nimea i Jakoba i Josefa ana-dahi’ey o tanàgne iohoe.
6 Tao ty nisy i vovo i Jakobay. Nirokake i liay ty Jesosy tamy izay, le nitofa tamy i vovogney eo. Tamy 12 atoandro teo ho eo tamy izay.
7 Nisy ampela Samaritana zay niavy tamy i vovogney eo mba hantsaka rano. Le hoe ty Jesosy tama’e: “Meo rano raho hinomeko.”
8 (Nandeha nivily hanegne tan-tanàgne agne i mpiana’e rey tamy izay.)
9 Le hoe i ampela Samaritanay tama’e: “Nagnino rehe ro mangatake rano amako, ie amy izao rehe Jiosy, le iraho Samaritana?” (Nirehake izay reke satria tsy nifandrambe o Jiosio naho o Samaritanao.)
10 Le hoe ty navale i Jesosy aze: “Naho nihai’o i fagnomezagne maimaim-poagne omein’Andrianagnahare azoy naho i ndaty mirehake ama’o tie ‘meo rano rahoy’, le irehe ro ho nangatake ama’e sady ho nimea’e i rano i havelogneỳ.”
11 Le hoe i ampelay tama’e: “O aba, tsy managne keseke fitarihan-drano* rehe sady laleke ka i vovogney. Boake aia areke ty hahazoa’o ze rano i havelogney zay?
12 I Jakoba razambei’ay ty nagnomey anay ty vovogne toy, le tetoagne ty ninoma i keleia’e rey naho i bibi’e rey rano. Irehe vao le hahavita hanao raha soa mandikoatse ty natao i Jakoba ho anay?”
13 Hoe ty navale i Jesosy aze: “Ze ndaty minogne ty rano toy, le mbe harandrano indraike. Fa ze minogne i rano homeako azey, le tsy harandrano sasa.
14 Satria i rano homeako azey, le hanjare loharano mijoajoake agnate’e ao sady hagnomey aze havelogne nainai’e.”
15 Le hoe i ampelay tamy i Jesosy: “Mba meo amy ze rano zay raho aba, amy izay tsy harandrano sasa sady tsy hiherenkeregne hantsaka etoa.”
16 Le hoe reke tamy i ampelay: “Akia alao ty vali’o, le andeso mbetoa.”
17 Le hoe ty navale i ampelay: “Tsy manambaly raho.” Le hoe ty Jesosy tama’e: “Maregne i reha’o tihoey tie: ‘Tsy manambaly raho.’
18 Fa indime nanambaly rehe, le tsy vali’o ka i lahilahy miharo tragno ama’o amy izaoy. Tena maregne vata’e areke i reha’oy.”
19 Le hoe i ampelay tama’e: “O aba, haiko hinane zao tie kay iheo toe mpaminany.
20 Ty raza’ay zao nivavake tamy ty vohitse tia, fa inareo mirehake tie a Jerosalema agne ro tsy maintsy ivavaha o ndatio.”
21 Hoe ty Jesosy tamy i ampelay: “Minoa ahy rehe rampela, fa ho avy ty andro, le tsy ho amy ty vohitse tia ndra ho a Jerosalema agne ty hivavaha’areo amy i Raentika an-dagnitse agney.
22 Inareo mivavake amy ty Andrianagnahare tsy fanta’areo, fa izahay mivavake amy ty Andrianagnahare fanta’ay satria boake amo o Jiosio ty hiavia i fagnavotagney.
23 Faie ndra tie eo zay, le ho avy ty andro, fa avy aza reke hinane zao naho ty maregne, le ty tena mpivavake hivavake aman’Agnahare arake ty fagnahy naho ty hamaregnagne. Toe ndaty hoe izay ty paliaen’Agnahare hivavake ama’e.
24 Fagnahy ty Andrianagnahare. Tsy maintsy mivavake ama’e arake ty fagnahy naho ty hamaregnagne areke ze ndaty mivavake ama’e.”
25 Le hoe i ampelay tama’e: “Haiko fa ho avy ty Mesia ndra i Kristy. Naho fa ho avy reke, le hohazavae’e amantikagne soa iaby ze kila raha.”
26 Hoe ty Jesosy tamy i ampelay: “Iraho anio ze ndaty rehafegne zaio.”
27 Tamy izay le niavy i mpiana’e rey. Nigaga iareo naho fa nahatrea aze nifampirehake amy ty ampela. Faie tsy nisy tamy iareo nirehake tie: “Ino o paliae’ò?” ndra “Nagnino rehe mirehake amy ty ampela tiagneo?”
28 Nenga i ampelay eo i sini’ey, le nandeha an-tanàgne agne reke sady nitalily tamy ty ndaty agne tie:
29 “Andao nareo hagnente ze lahilahy atiagne zay fa rineha’e tamako iaby ze kila raha nataoko. Va’e ireke varagne o Kristio.”
30 Niakatse boake an-tanàgne ao areke iareo, le nandeha mbamy i Jesosy mbeo.
31 Tagnate ze fotoagne zay, le nirisihe i mpiana’e rey reke tie: “O Raby,* mba mikamà rehe!”
32 Faie hoe reke tamy iareo: “Iraho managne hanegne tsy fanta’areo.”
33 Le nifampirehake i mpiana’e rey tie: “Nisy ndaty nagnomey hanegne aze vao rikiahe?”
34 Hoe ty Jesosy tamy iareo: “Ty haneko, le ty manao ty zoton’arofo i nagnirake ahỳ naho ty mamita ty asa’e.
35 Hirehake zao nareo tie mbe misy efa-bolagne vaho ho avy i fotoagne famoriagne vokatsey, sa tsy izay? Fa iraho mirehake ama’areo tie: Henhenke, henteo’areo ty an-teteke ey, fa mila avory ty vokatse ey. Fa
36 mahazo ty karama’e naho mamory i vokatsey i mpamory vokatsey. O vokatse rehoe, le ze ndaty handova i havelogne nainai’ey. Mahafale i mpamboley naho i mpamory vokatsey zay.
37 Maregne areke ty fomba firehake toy: Ndaty hafa ty nambole, le ndaty hafa ty namory vokatse.
38 Hiraheko nareo mba hamory ty raha tsy nambolé’areo. Ndaty hafa ty niasa mafe faie nandrambe soa boake amy ty asa iareo ka nareo.”
39 Maro ty ndaty Samaritana boake amy i tanàgney ao nino aze noho i reha i ampelay tihoey tie: “Nirehafe’e tamako iaby ze kila raha nataoko.”
40 Naho fa niavy tama’e eo areke i Samaritana rey, le nangatake aze mba hijanogne amy iareo eo. Le nijanogne tamy iareo eo roe andro reke.
41 Ty voka’e, maro ty nino ty raha nirehafe’e.
42 Hoe ka iareo tamy i ampelay: “Fa tsy noho i reha’oy sasa zao ty mahavy anay mino aze, fa ty vatategna’ay ro maharey aze. Hai’ay ka fa o lahilahy iohoe vata’e i mpagnavotse ty tontolo toỳ.”
43 Ie roe andro tafara izay, le nandeha a Galelia agne reke.
44 Le ty vatategna i Jesosy ro nirehake tie amy ty tane niavia’e ao avao o mpaminanio ro tsy hajaegne.
45 Naho fa niavy ta Galelia agne reke, le nirambese ty ndaty agne soa. Ty anto’e, nitrea iareo iaby i raha natao’e ta Jerosalema agne tamy i feteỳ, satria tagne ka iareo tamy i fetey.
46 Le niavy ta Kana a Galelia agne indraike reke. Tagne i nagnova’e rano ho divaỳ. Nisy manam-boninahitse tan-dapa i mpanjaka ta Kapernaomy agne zay narare ty ana-dahi’e.
47 Naho fa nirey o lahilahy iohoe tie handeha a Galelia agne ty Jesosy naho fa niala boake a Jodia agne, le nandeha mbamy i Jesosy mbeo reke. Nihalale ama’e reke mba handeha a Kapernaomy agne mba hagnasitragne i ana-dahi’ey satria narare mafe fa homate reke.
48 Faie hoe ty Jesosy tama’e: “Tsy hino nareo naho tsy mahatrea famantaragne naho fahagagagne.”
49 Hoe i manam-boninahitsey tama’e: “O Tompo, andao tika ho amy i anakoy agne fa tena fa homate reke tie ao.”
50 Le hoe ty Jesosy tama’e: “Akia rehe mandehana, fa sitragne i ana-dahi’oy.” Ninoa i lahilahỳ i raha nirehafe i Jesosỳ, le nandeha reke.
51 Nifanojo tamy i mpanompo’e rey reke tamy ireke tan-dalagne ey nolỳ. Le nirehake tama’e iareo tie fa nisitragne i ana-dahi’ey.
52 Nagnontenea’e areke iareo tie tamy fire ty nahasitragne aze. Le namale aze iareo tie: “Omale tamy lera fahafito* teo ho eo ty niafaha i tazogney tama’e.”
53 Le nitsiaro i baba’e tie tamy ze lera zay i nirehafa i Jesosy tama’e tihoey tie: “Fa sitragne i ana-dahi’oy.” Nanjare nino i Jesosy areke iareo keleian-draike.
54 Io ty fahagagagne faharoe natao’e ta Galelia agne, tafara i niala’e boake a Jodia agney.
Fagnamarehagne ambane peje
^ Ndra: “famintagne.”
^ Agnaram-boninahitse nirehafagne ty Mpampianatse jiosy.
^ Ndra: “tamy ray folakandro.”
