Talily Soa Nisorate i Jaona 5:1-47
5 Niavy i fete o Jiosioy tafara izay, le nandeha ta Jerosalema agne ty Jesosy.
2 Nisy godobogne raike misy rano zay ty ta Jerosalema ao. Tamy i Vavahadin’agnondrỳ eo ty nisy aze. Betizata ty agnara’e amy ty rehake hebreo. Misy lalagne dime misy tafo’e ty magnodidigne aze.
3 Maro ty ndaty narare, goa, naleme tomboke vaho ty nanan-kandra nandrenandre tamo o lalagne rehoe.
4— —
5 Faie nisy lahilahy raike teo zay, fa tagnate ty 38 taogne ty nararea’e.
6 Naho fa nitrea i Jesosy o lahilahy iohoe sady nihai’e ka tie fa ela ty nararea’e, le hoe reke tama’e: “Te ho sitragne vao rehe?”
7 Hoe i lahilahy nararey tama’e: “Tsy mba misy ndaty anio Ragnandria mampijogne ahy agnate rano ao naho fa mihetseke i ranoy. Fa isake tie handeha mbeo raho, le misy ndaty hafa mandeha alohako eo avao.”
8 Hoe ty Jesosy tama’e: “Mitsangana, le indeso i fandrea’oy sady akia mandehana!”
9 Le avy le nisitragne i lahilahỳ, le nindese’e i fandrea’ey sady nandeha reke.
Sabata i androy tamy izay.
10 Le hoe o Jiosio tamy i lahilahy nisitragney: “Sabata o andrò, le tsy azo’o atao ty minday i fandrea’oy.”
11 Faie hoe i lahilahỳ tamy iareo: “I ndaty nagnasitragne ahikey anio ro nirehake tamako tie, ‘indeso o fandrea’ò, le akia mandehana.’”
12 Hoe iareo tama’e: “Ia o lahilahy nirehake ama’o tie, ‘indeso o fandrea’ò, le akia mandehanao’?
13 Faie tsy nihay i lahilahỳ ty Jesosy, satria fa niala ty eo reke, le nandeha tagnate i ndaty maroy ao.
14 Faie tafara izay, le nitrea i Jesosy tamy i tempolỳ ao i lahilahy nararey sady hoe reke tama’e: “Fa sitragne rehe hinaneo. Ko manota sasa, tsy mone hoazo ty raha raty ambone igne!”
15 Naho fa nandeha i lahilahỳ, le nirehafe’e tamo o Jiosio tie i Jesosy o nagnasitragne azeo.
16 Ty voka’e, nenjehe o Jiosio ty Jesosy satria nanao o raha rehoe tamy ty andro Sabata.
17 Faie hoe reke tamy iareo: “Niasa avao ty Raeko amparake izay sady mbe miasa avao hatrake amy izao, le iraho ka miasa avao.”
18 Vao mainke nite hamono aze o Jiosio naho fa naharey izay. Ty anto’e, nieretseretse iareo tie tsy nagnorike i lalàna miomba ty Sabatay reke sady nanao ty vata’e ho mitovy aman’Agnahare, satria nirehake reke tie Rae’e ty Andrianagnahare.
19 Hoe areke ty navale i Jesosy iareo: “Volagneko ama’areo,* fa tsy ze raha tea i Anakey hatao avao ro atao’e, fa ze raha trea’e tie ataon-dRae’e, le izay avao ka ro atao’e. Mitovy amy ty fomba fanoan-dRae’e raha ka ty fanoa i Anakey raha.
20 Satria tean-dRae’e i Anakey, le atoro’e aze iaby ze kila raha atao’e. Mbe hotoroa’e asa lahibey ambone ireo aza reke, amy izay nareo ho daban-draha.
21 Manahake ty ameloma i Rae o ndaty mateo, ty hameloma i Anakey ka ze ndaty tea’e hovelomegne.
22 Tsy mitsara ndra ia ndra ia ty Rae, fa i Anakey ty nagnankigna’e iaby ze fitsaragne zay.
23 Amy izay hagnomey voninahitse i Anakey ty ndaty iaby, manahake ty agnomea iareo voninahitse i Rae. Ze tsy magnomey voninahitse i Anakey, le tsy magnomey voninahitse i Rae’e nagnirake azey ka.
24 Volagneko ama’areo, fa ze mitsanogne ty rehako sady mino i nagnirake ahỳ, le hahazo i havelogne nainai’ey. Tsy hotsaraegne ka reke, satria fa nimate faie nivelogne indraike.
25 “Volagneko ama’areo, fa ho avy ty fotoagne hahareiza o ndaty mateo ty feo i Anan’Agnaharey, le hovelogne ze mitsanogne aze. Fa manomboke amy izao ze fotoagne zay.
26 I Rae ty nifotora o aigneo. Nimea’e fahefagne ka areke i Anakey mba hagnomey aigne.
27 Ankoatse izay, le nimea’e fahefagne hitsara reke, satria ireke i Ana o ndatỳ.
28 Ko atao’areo mahalatsa anareo zay, satria ho avy ty fotoagne hahareiza ze an-kibory agne* ty feo’e,
29 le hiboake iareo. Ze nanao ty soa, le hovelomegne mba hahazo fiaignagne. Fa ze zatse nanao raty, le hovelomegne mba hotsaraegne.*
30 Tsy manao ze teako hatao avao raho naho misy raha ataoko. Mifagnarake amy ty raha saontsie i Rae amako ty itsarako o ndatio. Ara-drare’e areke ty fitsarako, satria tsy mitsara arake ze trea ty masoko ndra arake ze teako raho, fa arake ze tea i nagnirake ahỳ.
31 “Naho iraho avao ty mirehake amo o ndatio miomba ty vatako, le tsy hino ahy iareo.
32 Faie misy hafa ka misaontsy ty miomba ahy, sady maregne ty raha saontsie’e miomba ahy.
33 Nagnirake ndaty tamy i Jaona agne nareo sady toe tena maregne ka ty raha rehafe’e miomba ahy.
34 Faie iraho tsy mipay ndaty ho vavolombeloko. Fa ndra izay aza, le rehafeko avao o raha rehoe mba hahavoavonje anareo.
35 Manahake o jiro velogne naho mamilepiletseo o lahilahy iohoe. Tena nagniry ty hifale tamy i hazava’ey nareo faie tsy naharetse ze fagniriagne zay.
36 Nirehake tamo o ndatio ty Jaona tie nirahe i Rae raho. Faie izaho managne porofo lahibey ambone izay magnamaregne tie nagnirake ahy vata’e ty Rae. Tsy inogne zay, fa ty fanoako i asa nagniraha’e ahỳ.
37 Ty vatategna i Rae ka ro nagnamafe tie ireke ty nagnirake ahy. Mbe lia’areo naho naharey ty fiaragnana’e ndra nahatrea maso aze.
38 Tsy mitagne ty saontsi’e am-po’areo ao ka nareo, satria tsy mino i nirahe’ey.
39 “Mikaroke agnate Soratse Masigne ao nareo, satria mino tie izay ty hagnampe anareo hahazo i havelogne nainai’ey. Faie mirehake ty miomba ahy ka o Soratse Masigneo naho ty maregne.
40 Ndra tie eo zay, le mbe tsy te hiharine ahy avao nareo, amy izay hahazo i havelogney.
41 Tsy mipay voninahitse boake ama o ndaty raho.
42 Fa inareo tsy hoe izay satria haiko tie tsy misy hatea an’Andrianagnahare ty am-po’areo ao.
43 Niavy tamy ty tahina i Raeko raho, faie tsy nirambese’areo. Fa naho nisy ndaty niavy amy ty agnara’e avao, le ho nirambese’areo.
44 Akore areke ty hinoa’areo ahy, ie amy izao nareo mipay voninahitse boake ama o ndaty fa tsy mipay voninahitse boake aman’Agnahare?
45 Ao nareo tsy hieretseretse tie hatsitsìko amy i Rae agne. I ndaty inoa’areoy ro manitsìke anareo. Tsy ia zay fa i Mosesy.
46 Faie naho toe nino i Mosesy vata’e nareo, le ho nino ahy ka, satria reke nanoratse raha miomba ahy.
47 Faie akore moa ty hinoa’areo ty raha rehafeko, ty raha nisorate’e aza tsy inoa’areo?”
Fagnamarehagne ambane peje
^ Abt: “Volagneko ama’areo to vata’e.”
^ Ze nimate faie agnate fitadidian’Andrianagnahare ao ty teagne horehafegne.
^ Ty raha hatao iareo afara ty amelomagne iareo amy ty mate ty teagne horehafegne etoagne.
