Talily Soa Nisorate i Jaona 6:1-71
6 Nijogne agnate lakagne ao ty Jesosy tafara izay, le nitsake ty Ria* i Galelia ndra i Tiberiasy.
2 Maro areke ty ndaty nagnorike aze satria nahatrea i fahagagagne natao’e rey, agnisa izay ty nagnasitragna’e o ndaty marareo.
3 Nanganike tamy ze vohitse raike zay areke ty Jesosy naho i mpiana’e rey, le nitobotoboke tagne iareo.
4 Fa narine ho avy i Pasakey ndra i fete o Jiosioy tamy izay.
5 Naho fa nitalake ty Jesosy, le nahatrea i ndaty maroy nimbama’e mbeo, le hoe reke tamy i Filipo: “Aia ty hivilianantika mofo hohane ty ndaty retoa?”
6 Fa nihai’e ty raha hatao’e faie nirehake izay reke mba hitsapà’e i Filipo.
7 Hoe ty navale i Filipo aze: “Ndra tie mofo vilina 200 denaria aza ty hovilianentika sady hotapatapahegne kidikidy, le mbe tsy hahaeneke ty ndaty retoagne avao.”
8 Le nisy mpiana i Jesosy atao Andrea, rahalahy i Simona Petera zay nirehake tie:
9 “Intoy misy ajaja lahilahy managne mofo dime naho fiagne madineke roe. Faie hahainogne ty ndaty tsiefa retoagne zay?”
10 Le hoe ty Jesosy: “Ampitoboho’areo o ndaty reo.” Nirehake izay reke satria feno ahetse ty tamy i toeragney eo. Lahilahy 5 000 teo ho eo ty nitoboke teo tamy izay.
11 Nalae i Jesosy i mofoy, le nisaotse an’Agnahare reke. Nizarae’e tamy i ndaty nitoboke teoy i mofoy naho fa niavy eo. Hoe izay ka ty natao’e tamy i fiagne madineke rey. Le nihinagne i ndaty rey amparake ty nivontsigna* iareo.
12 Faie naho fa nivontsy iareo, le hoe ty Jesosy tamy i mpiana’e rey: “Avorio’areo ze sisa tsy lany, amy izay tsy hianto avao o hanegneo.”
13 Navory iareo areke ty sisa tsy lany tamy i mofo dime nihane i ndaty reỳ, le nahafeno 12 vaha.
14 Naho fa nahatrea ze fahagagagne natao’e zay i ndaty rey, le nirehake tie: “Io vata’e i Mpaminany rehafegne tie ho avy amy ty tontolo toy etoy.”
15 Nihay i Jesosy areke tie ho avy iareo hamorese aze mba hatao mpanjaka, hafarà’e nandeha am-bohitse agne indraike ie irery.
16 Naho fa nihariva i androy, le nandeha mbamy i Ria i Galeliay mbeo i mpiana’e rey
17 sady nijogne agnate lakagne ao. Nitsake i riakey iareo, le nandeha mba Kapernaomy mbeo. Fa naiegne i androy tamy izay faie le mbe tsy niavy tamy iareo teo avao ty Jesosy.
18 Nagnonja bey ka i riakey tamy izay satria nisy tiobey.
19 Faie, ie enegne kilometatse miala i moro’ey iareo, le nahatrea i Jesosy nandeha ambone i riakey ey sady nagnarine i laka iareoy, hafarà iareo natahotse.
20 Faie hoe ty Jesosy tamy iareo: “Ko matahotse nareo, fa iraho avao toy!”
21 Le nitea iareo hijogne agnate lakagne ao ty Jesosy. Tsielatsiela avao areke iareo, le niavy amy i toeragne tea iareo handehanagney agne.
22 Ie nihamaray igne, le nitrea i vahoake nijanogne tamy i moro’e raikey eỳ tie, tsisy lakagne ty teo. Fa nandehana i mpianatse rey i lakagne kidikidy raike teo zay. Iareo avao ty tao fa tsy niarake tamy iareo ty Jesosy.
23 Faie nisy lakagne kedekede boake a Tiberiasy agne rezay, nitobe narine i toeragne nihinana iareo mofo tafara ty nisaora i Tompo an’Agnaharey.
24 Naho fa tsy nitrea i vahoake rey tamy i lakagne rey ao ty Jesosy naho i mpiana’e rey, le niarake tamo o lakagne rehoe iareo, le nandeha a Kapernaomy agne mba hipay i Jesosy.
25 Naho fa nitrea iareo ta moro i ranoy eo ty Jesosy, le hoe iareo tama’e: “O Raby,* ombia rehe ro niavy eto?”
26 Le hoe ty navale i Jesosy iareo: “Volagneko ama’areo,* fa tsy noho inareo nahatrea i fahagagagne nataokoy ty mahavy anareo mipay ahy, fa noho inareo nivontsigne tamy i mofo nihane’areoy.
27 Miasà, faie ko miasa mba hahazoagne o hanegne mete simbao fa miasà mba hahazoagne i hanegne tsy mete simba magnomey havelogne nainai’ey. I Ana o ndatỳ ty hagnomey anareo ze hanegne zay. Ty anto’e, ty vatategna i Andrianagnahare Rae’areo an-dagnitse agney ro nagnisy tampò mba ho fagnekea’e aze.”
28 Le hoe iareo tama’e: “Ino ty tsy maintsy atao’ay mba hagnekean’Agnahare anay ka?”
29 Le hoe ty navale i Jesosy iareo: “Naho tea’areo ty heken’Agnahare, le tsy maintsy atoro’areo fa mino i ndaty nirahe’ey nareo.”
30 Le hoe iareo tama’e: “Ino areke ty fahagagagne hatao’o mba hotrea’ay, amy izay zahay mino azo? Ino ty raha hatao’o?
31 Nikama mana zao o razambeintikagneo tamy iareo tam-patrambey agney, satria izao ty rehafe ty Soratse Masigne: ‘Nimea’e mofo boake an-dagnitse agne iareo mba hohane iareo.’”
32 Le hoe ty Jesosy tamy iareo: “Volagneko ama’areo, fa tsy tena ie i mofo boake an-dagnitse agne nimea i Mosesy iareoy. Fa i mofo mea i Raeko anareoy ro tena ie.
33 Boake an-dagnitse agne o mofo nimean’Agnahare iohoe sady magnomey havelogne o ndatio.”
34 Le hoe iareo tama’e: “O Tompo, meo amy ze mofo zay isan’andro zahay.”
35 Le hoe ty Jesosy tamy iareo: “Izaho i mofo i havelogneỳ. Ze ndaty magnantogne ahy, le tsy ho keré sasa. Ze maneho finoagne ahy ka, le tsy harandrano sasa.
36 Faie fa nirehafeko tama’areo tie ndra tie mahatrea ahy aza nareo, le mbe tsy hino ahy.
37 Ze ndaty mea i Rae ahy, le magnorike ahy, sady ze magnorike ahy, le tsy hataoko ze raha hahavy aze hiala amako.
38 Ty anto’e, tsy hanao ty sitram-poko ty niaviako boake an-dagnitse agne, fa ty hanao ty zoton’arofo i nagnirake ahỳ.
39 Izao ty zoton’arofo i nagnirake ahỳ: Tsy tea’e hisy ho montso ndra raike i ndaty nimei’e ahy rey. Iareo aza tea’e hovelomeko amy ty mate amy ty hoavy.*
40 Ty anto’e, izao ty zoton’arofo i Raeko: Ze magneke i Anakey naho maneho finoagne aze, le toko’e hahazo i havelogne nainai’ey sady hovelomeko amy ty mate reke amy ty hoavy.”
41 Le nimonomonogne o Jiosio amy i reha’e tihoey tie: “Izaho i mofo boake an-dagnitse agney.”
42 Le hoe ka iareo: “Tsy i Jesosy ana i Josefay v’io? Haintika soa i rae’e ignehoe naho i rene’ey. Nagnino areke reke ro mirehake tie: ‘Boake an-dagnitse agne raho’?”
43 Hoe ty navale i Jesosy iareo: “Ko mimonomonogne nareo.
44 Tsy misy ndaty afake magnarine ahy naho tsy i Raeko nagnirake ahỳ ro mitaogne aze, sady hovelomeko amy ty mate reke amy ty hoavy.
45 Izao ty raha nisorate o mpaminanio: ‘Hampianare i Jehovah iareo iaby.’ Ze ndaty nitsanogne i Rae sady nagneke ty fampianara’e, le magnorike ahy.
46 Tsy nisy ndaty nahatrea i Rae naho tsy i raike boake aman’Agnahare agney avao. Ireke ro nahatrea i Rae.
47 Volagneko ama’areo, fa ze mino, le hahazo i havelogne nainai’ey.
48 “Izaho i mofo i havelogneỳ.
49 Nikama mana i razambei’areoy tamy iareo tam-patrambey agney, faie mbe nimate avao.
50 Fa ze mihinagne i mofo boake an-dagnitse agney, le tsy homate sasa.
51 Izaho i mofo i havelogneỳ, i boake an-dagnitse agney. Ze ndaty mihinagne amo o mofo iohoe, le hovelogne nainai’e. O mofo iohoe le ty nofoko, i homeagne ty tontolo toy mba hahazoa iareo havelogney.”
52 Le nialy hevetse o Jiosio sady nirehake tie: “Akore ty hagnomea ty lahitia ty nofo’e mba ho hanentikagne?”
53 Hoe areke ty Jesosy tamy iareo: “Volagneko ama’areo, fa ze tsy mihinagne ty nofo i Ana o ndatỳ naho tsy minogne ty lio’e, le tsy hahazo i havelogney.
54 Fa ze mihinagne ty nofoko, le hahazo i havelogne nainai’ey sady hovelomeko amy ty mate reke amy ty hoavy.
55 Ty anto’e, hanegne tena mahasoa ty nofoko naho ty lioko.
56 Ze mihinagne ty nofoko naho minogne ty lioko, le ho tafaharo raike amako, le iraho ka ho tafaharo raike ama’e.
57 Velogne i Rae nagnirake ahỳ, le noho ireke ka ty mahavelogne ahy. Ze mihinagne ty nofoko ka, le ho velogne noho ty amako.
58 Izay ty miomba i mofo boake an-dagnitse agney. Tsy manahake i nikamae i raza’areoy io, satria mbe nimate avao iareo ndra tie nihinagne igne. Fa ze mihinagne o mofo iohoe, le ho velogne nainai’e.”
59 Tamy ireke nampianatse tamy i sinagoga ta Kapernaomy agney ty nirehafa’e o raha rehoe.
60 Naho fa naharey izay ty ankamaroa i mpiana’e rey, le nirehake tie: “Mampangorigne ze o rehake zao. Ia ty mahavita mitsanogne izao?”
61 Nihay i Jesosy tie nisy mpiana’e nimonomonogne miomba izay ka, le hoe reke tamy iareo: “Hitorifike vao nareo noho ze raha zay?
62 A hanao akore nareo naho fa hahatrea i Ana o ndatỳ hiheregne amy i nisy aze talohay agne?
63 I fagnahin’Andrianagnaharey ro magnomey havelogne. Fa o nofotseo tsy mahavita ndra inogn’ino. I raha nirehafeko tama’areo teo rey, le boake amy i fagnahỳ sady magnomey fiaignagne.
64 Faie misy ama’areo tsy mino.” Nirehake izay ty Jesosy satria fa nihai’e boake am-boaloha’e agne tie ia ty tsy hino aze naho i raike hifotetse azey.
65 Hoe ka ty Jesosy: “Izay ty nahavy ahy nirehake tama’areo tie tsy misy ndaty magnorike ahy naho tsy i Rae ro manapa-kevetse tie hitaogne aze.”
66 Noho ze raha zay, le maro ty mpiana’e nihemotse sady lelia’e tsy nagnorike aze sasa.
67 Le hoe ty Jesosy tamy i 12 lahy rey: “Tsy te handeha ka vao nareo?”
68 Le hoe ty navale i Simona Petera aze: “Handeha mbaia moa zahay Tompo? Ty raha rehafe’o ro hahazoagne i havelogne nainai’ey.
69 Mino zahay sady mahay ka tie ihe i masin’Andrianagnaharey.”
70 Le hoe ty Jesosy tamy iareo: “Nijobogne anareo 12 raho, sa tsy izay? Faie ty raike ama’areo, le mpagnaratiraty.”
71 I Jodasy ana i Simona Iskariota o tea’e horehafegne amy izaio. Ty anto’e, nifotetse i Jesosy reke ndra tie agnisa i 12 lahy rey aza.
Fagnamarehagne ambane peje
^ Antara bey io naho ty maregne.
^ Ndra: “nivokia.”
^ Agnaram-boninahitse nirehafagne ty Mpampianatse jiosy.
^ Abt: “Volagneko ama’areo to vata’e.”
^ Abt: “amy ty andro fara’e.”
