Talily Soa Nisorate i Jaona 7:1-52
7 Nitory* nagneneke i Galelia ty Jesosy tafara izay satria reke tsy te hanao izay a Jodia agne. Ty anto’e, nite hamono aze o Jiosio.
2 Faie fa narine tamy izay i Fete ty Tragnolay fatao o Jiosioy.
3 Le hoe i rahalahy i Jesosy rey tama’e: “Mialà ty eto rehe, le akia mandehana a Jodia agne, amy izay hotrea o mpiana’ò ka o asa atao’o eto reo.
4 Ty anto’e, tsy misy ndaty te hofantam-bahoake faie magnetaketake avao ty raha atao’e. Naho fa manao o raha rehoe areke rehe, le misehoa amy iareo eo iaby.”*
5 Nirehake izay iareo satria tsy nino aze.
6 Hoe ty navale i Jesosy iareo: “Mbe tsy avy ty fotoagne fa tinondro ho ahy. Fa inareo afake mandeha agne avao ndra ombia ndra ombia.
7 Tsy misy anto’e toko’e halaigna ty tontolo toy anareo. Fa izaho heje ty tontolo toy satria mampibaribary ty asa raty atao iareo.
8 Akia nareo hamonje i fetey, fa iraho tsy ho agne satria mbe tsy avy ty fotoagne fa tinondro ho ahy.”
9 Nijanogne ta Galelia agne reke naho fa boake nirehake o raha rehoe tamy iareo.
10 Faie naho fa nandeha namonje i fetey i rahalahi’e rey, le nandeha avao ka ty Jesosy faie nietaketake avao.
11 Le nipay aze tamy i fetey ao o Jiosio sady hoe iareo: “Nimbaia i lahỳ?”
12 Le nifampibisibisike miomba aze i vahoakey. Nirehake ty ila’e tie: “Ndaty soa reke.” Fa ty ila’e nirehake tie: “Aha’a, tsy ndaty soa igne fa mpamitake vahoake.”
13 Tsy nisy ndaty nahavany nirehake ty miomba aze tagnatreha o ndaty marò eo satria natahotse o Jiosio.
14 Ie tamy i fahaefats’andro i feteỳ, le nizilike tamy i tempolỳ ao ty Jesosy sady nampianatse tao.
15 Nigaga areke o Jiosio, le nirehake tie: “Boake aia ty nahaia o lahio Soratse Masigne, ie amy zao reke tsy nianatse tamo o lakilasintikagneo?”
16 Hoe ty navale i Jesosy iareo: “Tsy boake amako o raha ampianarekò fa boake amy i nagnirake ahỳ.
17 Naho misy ndaty te hanao ty zoton’arofon’Agnahare, le hohay ze ndaty zay tie, boake aman’Agnahare vao o raha ampianarekò sa boake amako avao.
18 Ze mirehake ty heve’e avao naho fa mampianatse, le mipay voninahitse hoahy ty tegna’e. Fa ze mipay voninahitse hoahy i ndaty nagnirake azey, le mirehake ty maregne sady tsy misy tsy hamaregnagne ty agnate’e ao.
19 Nagnomey Lalàna anareo ty Mosesy, sa tsy izay? Faie tsy misy ama’areo magnorike i Lalànay. Nagnino nareo ro te hamono ahy?”
20 Le hoe i vahoakey: “Misy demonia rehe. Ia o ndaty te hamono azò?”
21 Hoe ty navale i Jesosy iareo: “Raha raike avao ty nataoko, le fa nilatsa iaby nareo.
22 Izay ty nahavy i Mosesy nandily anareo mba hotapahegne. Faie naho ty maregne, le tsy boake amy i Mosesy o fanapahagneo fa boake amy ty razambei’e. Le inareo zao manapake ajaja amy ty andro sabata.
23 Naho misy ajaja raike tapahegne amy ty andro sabata, le tsy mandika i Lalà i Mosesỳ zay. Faie ty mahalatsa, le tena boseke amako nareo satria raho nagnasitragne amy ty andro sabata.
24 Ko mitsara ivela’e sasa nareo fa mitsarà ara-drare’e.”
25 Le nisy ndaty nipetrake a Jerosalema ao nirehake tie: “Tsy io vao i lahilahy teà iareo hovonoegney?
26 Henhenke reke hinaneo mirehake agnatreha o ndatio eo faie ndra raike naho rehafe iareo! Sa fa hay o mpitondra amantika etoao tie ireke o Kristio?
27 Faie haintika tie boake aia o lahilahy iohoe. Fa naho fa i Kristy ro avy, le tsy hisy ndaty hahafantatse tie boake aia reke.”
28 Tamy i Jesosy nampianatse tamy i tempolỳ aoy, le nirehake mafe tie: “Hai’areo raho sady hai’areo ka tie boake aia raho. Tsy nagnira-bata raho. Tena misy i nagnirake ahỳ faie tsy fanta’areo reke.
29 Fantako reke satria solontegna’e raho sady Ireke ty nagnirake ahy.”
30 Nanomboke tamy izay iareo, le nipay hirike mba hitsepahagne aze faie tsy nisy nahavita nanao izay satria mbe tsy niavy i fotoagne fa tinondro ho azey.
31 Faie ndra tie teo zay, le nino aze ty ankamaroa i vahoakey sady nirehake iareo tie: “Naho fa avy ty Kristy le hanao fahagagagne maro. A tsy fa ie vao o atao ty lahilahy tiagne hinaneo?”
32 Naho fa nirey o Fariseò nifampibisibisike miomba i Jesosy i vahoakey, le nagnirake mpiambegne o lahibey ty mpisorogneo naho o Fariseò mba hitsepake aze.
33 Le hoe ty Jesosy: “Kede sisa ty hijanognako ama’areo eto, le handeha amy i nagnirake ahỳ agne raho.
34 Hipay ahy nareo faie tsy hahatrea ahy sady tsy hoazo’areo andehanagne ty amy i misy ahỳ agne.”
35 Le nifampirehake o Jiosio tie: “Handeha mbaia o lahio ie tsy hotreantikagneo? Sa reke handeha amo o Jiosy miparitake amy ty tane o Grikeo agneo sady hampianatse o Grikeo ka?
36 Ino areke ty tea’e horehafegne amy i reha’e tihoey tie: ‘Hipay ahy nareo faie tsy hahatrea ahy sady tsy raha hoazo’areo andenagne ty amy i misy ahỳ agne’?”
37 Tamy i andro lahibey mamaragne i feteỳ, le nitsangagne ty Jesosy sady nirehake mafe tie: “Ze marandrano, le mbamako mbetoa fa homeako rano hinome’e.
38 Ze mino ahy, le hotanterake ama’e ty raha rehafe ty Soratse Masigne tihoe toy tie: ‘Hisy ranovelogne mijoajoake ty agnate’e ao.’”
39 Nirehake miomba i fagnahy masigne hoahy ze ndaty mino azey ka reke. Faie mbe tsy nisy nahazo fagnahy masigne tamy izay satria mbe tsy nimeagne voninahitse reke.
40 Naho fa naharey izay ty ila’e tamy i vahoakey, le nirehake tie: “Intia vata’e i Mpaminany nirehafegne tie ho avỳ.”
41 Ty ila’e nanao tihoe: “Io o Kristy zao.” Fa ty ila’e nirehake tie: “Boake a Galelia agne hao hoe ty ia ty Kristy?
42 Tsy mirehake hao ty Soratse Masigne tie ho boake amy ty tarana i Davida ty Kristy? Sady ho boake a Betlehema amy i tanàgne misy i Daviday ao?”
43 Tsy nitovy hevetse miomba i Jesosy areke i vahoakey.
44 Faie ndra tie teo zay, le nite hitsepake aze ty ila’e faie tsy nahavany nanao izay.
45 Naho fa niheregne mbamo o lahibey ty mpisorogneo naho o Fariseò agne i mpiambegne rey, le hoe iareo: “Nagnino reke ie tsy nindese’areò?”
46 Le hoe i mpiambegne rey: “Mbe tsy nisy ndaty nampianatse hoe izay indraike.”
47 Le hoe o Fariseò: “Nivoafita’e ka nareo?
48 Tsy raha misy mino i lahy ignehoe o mpitondra amo o Jiosio eò ndra o Fariseò.
49 Fa o vahoake mitsanogne i Jesosio tsy mahay i Lalànay sady voaozogne.”
50 Le hoe ty Nikodemosy agnisa o Fariseò, i nandeha tamy i Jesosy agney:
51 “Naho i Lalànantikagney ro henteagne, le tsy afake mitsara ndaty raike tika naho tsy rey hey sady fantatse ty raha natao’e.”
52 Hoe ty navale iareo i Nikodemosy: “Boake a Galelia agne ka vao iheo ie miaro azeo? Manoa fikarohagne rehe, le hotrea’o tie mbe tsy nisy mpaminany ndra raike ty boake a Galelia agne.”*
Fagnamarehagne ambane peje
^ Ndra: “Nandeha.”
^ Abt: “ty tontolo toy.”
^ Tsy ahatreavagne ty and. 53 hatrake amy ty toko 8 and. 11 ty amy ty sora-tagnagne maromaro fa ela sady azo atokisagne.
