Talily Soa Nisorate i Jaona 9:1-41
9 Tamy i Jesosy nandehay, le nahatrea ze lahilahy raike nigoa boake an-troke agne zay.
2 Le hoe i mpiana’e rey tama’e: “O Raby,* o lahilahy iohoe vao ty nanota sa ty rae aman-drene’e, ie nahavy aze ho goa boake an-troke agneo?”
3 Hoe ty navale i Jesosy iareo: “Aha’a, tsy ireke ndra ty rae aman-drene’e ro nanota, fa mba hampisehoagne ty asan’Agnahare ty nahavy izao.
4 Tsy maintsy manao ty asa i nagnirake ahỳ raho amy i androy mbe mazavao, faie ho avy i halegney le tsy hisy ndaty ho afake hiasa.
5 Naho mbe amy ty tontolo toy eto raho, le iraho ty jiro ty tontolo toy.”
6 Naho fa boake nirehake o raha rehoe reke, le nandrora an-tane eo, le nampifangaroe’e tamy i taney i rora’ey. Le avy eo nahoso’e tamy i maso i lahilahỳ ey,
7 sady hoe reke tama’e: “Akia rehe misasà a Siloama agne” (“Nalefa” ty dika o agnaragne iohoe). Nandeha nisasa a Siloama agne areke i lahilahỳ, le nanjare nahatrea.
8 Naho fa nahatrea aze i mpiharo tanàgne ama’e rey naho i ndaty mpahita aze mangatake rey, le hoe iareo: “Tsy i lahilahy mpangatakey v’iò?”
9 Le nisy ty nirehake tie: “Eka, ie io.” Fa ty ila’e nirehake tie: “Aha’a, tsy ie io fa ndaty mitovy ama’e avao.” Faie lava namale hoe izao avao i lahilahỳ: “Eka, ie raho.”
10 Le nagnontanea iareo reke tie: “Akore ty nampahatrea azo?”
11 Hoe ty navale’e: “Nandrora an-tane eo ze lahilahy atao Jesosy zay, le nampifangaroe’e tamy i taney i rora’ey, le avy eo nahoso’e amy ty masoko. Le hoe amy izay reke: ‘Akia rehe misasà a Siloama agne.’ Naho fa boake nisasa raho, le avy le nahatrea.”
12 Le hoe iareo tama’e: “Aia ze lahilahy zay?” Le hoe reke: “Tsy fantako.”
13 Le nindese iareo amo o Fariseò agne i lahilahy nigoay.
14 Sabata i andro nampifangaroa i Jesosy i rora’ey tamy i taneỳ naho i nampahatreava’e i maso i lahilahỳ.
15 Le nagnontenea o Fariseò i lahilahỳ tie akore ty nampahatrea aze. Le hoe i lahilahỳ tamy iareo: “Nahoso’e amy i masokoy ey i tane nampifangaroe’e tamy i rora’eỳ, le sinasako, le nahatrea raho.”
16 Le hoe ty ila’e amo o Fariseò: “Tsy iran’Agnahare ze lahilahy zay kanao tsy magnorike i Lalàna miomba ty Sabatay.” Le ty ila’e nirehake tie: “Aia ka ty ndaty mpanota le hahavita hanao fahagagagne hoe izay!” Tsy nitovy hevetse areke iareo.
17 Le hoe indraike iareo tamy i lahilahy nigoay: “Akore ty heve’o miomba i lahilahy nampahatrea azoy?” Le hoe i lahilahỳ: “Mpaminany reke tie amako.”
18 Faie tsy nino o Jiosio tie nigoa boake an-troke agne i lahilahỳ. Hafarà’e nitokave iareo ty rae aman-drene’e,
19 le nagnontenea iareo tie: “Ana’areo vao ty rehafegne tie nao nigoa boake an-troke agne tiagneo? A ie mahatrea hinaneo, akore ty nahavy aze hahatrea?”
20 Le hoe i rae aman-drene’e rey: “Ana’ay vata’e io, sady nigoa boake an-troke agne ka.
21 Fa ty nahavy aze hahatrea tsy fanta’ay. Tsy fanta’ay ka tie ia ty nagnasitragne o maso’eo. Agnonteneo’areo reke. Fa bey anio, le afake mamale anareo soa.”
22 Nirehake izay i rae aman-drene i lahilahỳ noho ty fatahora’e o Jiosio. Ty anto’e, fa nifagnarake o Jiosio tie ze magneke i Jesosy ho Kristy, le horoahegne hiala amy i sinagogay ao.
23 Izay ty nahavy i rae aman-drene’e rey nirehake tie: “Fa bey anio. Agnonteneo’areo reke.”
24 Le nitokave iareo indraike i lahilahy nigoay sady hoe iareo tama’e: “Meo voninahitse ty Andrianagnahare. Hai’ay fa mpanota ze lahilahy zay.”
25 Le hoe i lahilahỳ: “Ty maha mpanota aze tsy haiko. Fa izao avao ty haiko, goa raho taloha faie mahatrea iraho hinaneo.”
26 Le hoe iareo tama’e: “Akore ty natao’e mba hampahatreavagne azo?”
27 Le hoe reke tamy iareo: “Fa nirehafeko tama’areo an’izay faie tsy nijanjigne’areo. Nagnino areke nareo ro magnontane ahy indraike? Sa te hanjare ho mpiana’e ka nareo?”
28 Le nagnambanembane i lahilahỳ hoe izao iareo: “Mba ihe agne re ro mpiana ze lahilahy zay. Izahay mpiana i Mosesy.
29 Hai’ay fa nisaontsy tamy ty alala i Mosesy ty Andrianagnahare. Fa ze lahilahy zay tsy fanta’ay ty nihirifa’e.”
30 Hoe ty navale i lahilahỳ iareo: “Mba raha mahagaga ty tsy fahafantara’areo ty nihirifa’e, ie amy izao ireke ty nampahatrea o masokò.
31 Haintika fa tsy janjignen’Agnahare o mpanotao fa ze ndaty matahotse aze naho manao ty zoton’arofo’e ro janjigne’e.
32 Mbe liantika naho naharey am-parake izay tie, nisy ndaty nampahatrea ndaty raike goa boake an-troke agne.
33 Naho tsy nirahen’Agnahare areke i lahilahy ignehoe, le tsy ho nahavita raha hoe izao.”
34 Le hoe ty navale iareo aze: “Nifeno ota boake an-troke agne vata’e rehe. Le ihe ka vao ro hagnanatse anay?” Le nalae iareo reke sady natora iareo ambalike agne.
35 Nirey i Jesosy tie natora iareo ambalike agne i lahilahỳ. Naho fa nitrea i Jesosy reke, le hoe reke tama’e: “Mino i Ana o ndatỳ vao rehe?”
36 Le hoe ty navale i lahilahỳ: “Ia irekeo? Mba rehafo amako aba hinoako aze.”
37 Hoe ty Jesosy tama’e: “Fa nahatrea aze rehe. Naho ty maregne aza, le ie o mirehake ama’o zao.”
38 Le hoe i lahilahỳ: “Mino aze raho Tompo.” Le nanongaleke tagnatreha i Jesosy eo reke.
39 Hoe ty Jesosy naho fa niavy eo: “Niavy amy ty tontolo toy eto raho, mba hampahatrea ze goa naho hampigoa ze mahatrea.”
40 Naho fa naharey ze reha’e zay i Fariseo tama’e teo rey, le hoe iareo: “Goa zane zahay tie ama’o?”
41 Le hoe ty Jesosy tamy iareo: “Naho nigoa nareo, le tsy ho nimelohegne. Faie noho inareo mirehake tie: ‘Mahatrea zahay’, le tsy ho voavela ty fahota’areo.”
Fagnamarehagne ambane peje
^ Agnaram-boninahitse nirehafagne ty Mpampianatse jiosy.