Talily Soa Nisorate i Lioka 1:1-80
-
Nisorategne hoahy i Teofilo (1-4)
-
Nirehafe i Gabriely mialoha tie haterake ty Jaona Mpanao Badisa (5-25)
-
Nirehafe i Gabriely mialoha tie haterake ty Jesosy (26-38)
-
Nitilike i Elizabeta ty Maria (39-45)
-
Nidera i Jehovah ty Maria (46-56)
-
Naterake naho nimeagne agnaragne ty Jaona (57-66)
-
Faminania i Zakaria (67-80)
1 Maro ty ndaty nikezake nanoratse miomba i raha niseho rey sady ekentika tie maregne i raha rey.
2 Nisy ka ty vavolombelogne nahatrea maso naho ty mpinday ty hafan’Agnahare nirehake i raha rey tamantika.
3 Nanapa-kevetse areke raho Teofilo hajaegne fa hanoratse ama’o i raha rey arake ty filahara’e, satria fa nifotopotoreko soa sady fa nihamaregneko.
4 Nanao izay raho, amy izay hoazo’o antoke tie maregne vata’e i raha nampianaregne azo rey.
5 Tamy ty andro i Heroda mpanjaka i Jodia, le nisy mpisorogne raike zay tamy ty goropy nisy i Abia ty nisy aze. I Zakaria ty agnara’e, le i Elizabeta ty agnara ty vali’e. Boake amy ty tarana i Arona o ampela vali’e iohoe.
6 Sambe ndaty maregne tagnatrehan’Agnahare eo iareo sady nagnorike ty lily i Jehovah naho nanao ze raha nitaké’e.
7 Faie tsy nanagne anake iareo satria betsiterake ty Elizabeta sady sambe fa antetse ka iareo roe.
8 Tie indraike zay, le nanao ty asa ty mpisorogne tagnatrehan’Agnahare eo ty Zakaria, satria ty goropy nisy aze ty nivoatendre tamy izay.
9 Le nanolotse emboke magnitse ty Zakaria naho fa nizilike amy i tempoly i Jehovah-y ao, satria izay ty fatao o mpisorogneo.
10 Nivavake ivela’e ao i vahoakey iaby tamy i fotoagne nanolora’e emboke magnitsey.
11 Le nisy anjely i Jehovah niseho tama’e sady nitsangagne tankavana i alitara fagnoroagne emboke magnitsey eo.
12 Le nitsekake ty Zakaria naho fa nahatrea i anjelỳ sady natahotse.
13 Faie hoe i anjelỳ tama’e: “Ko matahotse rehe Zakaria satria fa nijanjignen’Agnahare i fihalalea’oy. Hiterake lahilahy amy i Elizabeta rehe, le i Jaona ty hatao’o agnara’e.
14 Naho fa haterake i ajajay, le tena ho fale rehe naho o ndatio.
15 Ty anto’e, tena hiambake agnatreha i Jehovah eo reke. Faie tsy mahazo minogne divay ndra toake reke. Ho feno fagnahy masigne reke ndra tie mbe an-troke ao aza.
16 Hampea’e mba hiheregne amy i Jehovah Andrianagnahare iareo ka ty ankamaroa ty tarana o Israelio.
17 Handeha aloha’e eo ka reke sady hanagne ty fagnahy naho ty hery i Elia mba hagneregnagne ty fo ty rae hanahake ty fo o ajajao, naho hagnampeagne ze tsy mete anaragne mba hahilala manahake o ndaty maregneo, amy izay iareo ho vognogne hanompo i Jehovah.”
18 Hoe ty Zakaria tamy i anjelỳ: “Akore ty hahazoako antoke tie ho avy eo vata’e zay? Izahay mirovaly fa antetse.”
19 Le hoe ty navale i anjelỳ aze: “I Gabriely ty agnarako, le lava mitsangagne agnatrehan’Agnahare eo avao raho. Nirahegne ho ama’o atoy raho mba hirehake ze talily soa zay ama’o.
20 Faie satria rehe tsy nino i raha nirehafekoy, ie amy izao ze raha rezay hotanterake amy ty fotoagne fa tinondro, le hanjare moagne rehe amparake ty hahatanterake aze.”
21 Nigaga i vahoake te ivela’e ao nandigne i Zakaria rey satria niela loatse tamy i tempolỳ ao reke.
22 Faie naho fa niakatse reke, le tsy afake nirehake tamy iareo. Le avy le nihay iareo areke tie vaho boake nahatrea fahitagne tamy i tempolỳ ao reke. Le nanao baiko moagne avao reke naho fa nifampirehake tamy i ndaty rey.
23 Ie naho fa nivita ty asa fanompoagne masigne natao’e, le noly reke.
24 Ie andro tsiampeampe tafara izay, le nivesatse ty Elizabeta. Tsy niakatsakatse ty an-tragno ao reke tagnate ty dime volagne. Hoe reke:
25 “Henhenke ty raha natao i Jehovah ho ahike. Niferenaigne ahy reke, amy izay raho tsy afaha o ndatio baraka sasa.”
26 Ie nifeno enem-bolagne ty Elizabeta, le nirahen’Agnahare ho a Nazareta a Galelia agne ty anjely Gabriely,
27 mba ho amy ze ampela virjiny zay agne. I Maria ty agnara’e, le fa valifofo i Josefa tarana i Davida reke.
28 Hoe i anjelỳ naho fa niavy tamy i Maria agne: “Salama rehe! Tena tea i Jehovah rehe sady mitahy azo reke.”
29 Tena niendrake reke naho fa naharey ze reha i anjelỳ zay, faie nikezake namantatse ty va’e ho dika i reha’ey ka reke.
30 Hoe areke i anjelỳ tama’e: “Ko matahotse rehe Maria satria mampifale an’Agnahare.
31 Hivesatse rehe sady hiterake lahilahy, le i Jesosy ty hatao’o agnara’e.
32 Hiambake reke le hotokavegne tihoe Ana i Fara’e Amboney sady homea i Jehovah Andrianagnahare aze ka ty sezan-droandria i Davida rae’e.
33 Ho Mpanjaka amo o tarana i Jakobao eo nainai’e ka reke sady tsy hisy fara’e ty Fanjakà’e.”
34 Faie hoe ty Maria tamy i anjelỳ: “Akore ty hahatanterake izay, izaho anio mbe tsy niharo taman-dahilahy?”
35 Le hoe i anjelỳ tama’e: “Hiasa ama’o i fagnahy masigney, le hagnaloke azo ty hery i Fara’e Amboney. Izay ty anto’e hanoagne i ajaja hatera’oy tihoe masigne, Anan’Agnahare.
36 Fa mivesatse ka hinane zao ty Elizabeta longo’o sady fa enem-bolagne reke. Ie amy izao reke fa antetse sady betsiterake.
37 Ty anto’e, ze raha saontsien’Agnahare, le tsy maintsy avy eo.”
38 Hoe areke ty Maria tamy i anjelỳ: “Intoy raho mpanompovave i Jehovah! Lonike hotanterake amako zay, arake i nirehafe’oy.” Le nandeha i anjelỳ.
39 Ie tafara izay, le nandeha a Jodia agne ty Maria. Be vohitse o tanàgne iohoe.
40 Naho fa niavy agne reke, le nandeha mban-tragno ry Zakaria mbeo, le nanalama i Elizabeta.
41 Naho fa naharey i Maria nanalama azey ty Elizabeta, le nihisa i ajaja tan-tro’e aoy. Nifeno fagnahy masigne ka ty Elizabeta,
42 sady nirehake mafe tihoe: “Tahiegne mandikoatse ty ampela iaby rehe, le hotahiegne ka i ajaja hatera’oy.
43 Ia moa raho ro hanagne tombotsoa hotilihe ty rene i Tompokoy?
44 Naho fa naharey azo nanalama ahikey raho, le nihisa noho ty hafalea’e i ajaja an-troko atoy.
45 Sambatse ka rehe satria nino tie hotanterake iaby i raha nisaontsie i Jehovah tama’o rey.”
46 Le hoe ty Maria: “Midera i Jehovah raho,
47 sady tsy hohaiko ka ty tsy ho fale amy i Andrianagnahare mpagnavotse ahikey,
48 satria nivazoho ty mpanompovave’e toy reke ndra tie ndaty tsy le manao akore aza. Manomboke amy izao, ze taranake iaby, le hirehake ahy tihoe tie sambatse,
49 satria nanao raha lahibey ho ahy i Maherỳ sady masigne ty tahina’e.
50 Namindra fo amy ze matahotse aze ka reke ndra tie hatrake amy ty taranake afara agne aza.
51 Nampiasa i fità’e maherỳ reke mba hanoagne raha lahibey, sady naetre’e ze nirehareha.
52 Nafaha’e tsy ho amy i seza’ey eo ka o ndaty manam-pahefagneo, le o ndaty ambaneo nasondro’e.
53 Nivotsigne’e* raha soa ze ndaty keré sady nampolie’e tagnam-polo ze ndaty mpagnarivo.
54 Nagnampe o Israely mpanompo’eo reke mba hanoroagne tie, tsy haligno’e
55 i fampitamà’e tihoe hamindra fo amy i Abrahama naho ty tarana’e nainai’ey, arake i nisaontsie’e tamy ty razantikagney.”
56 Nijanogne tamy ry Elizabeta agne tagnate ty telo volagne eo ho eo ty Maria, le noly amy iareo agne reke tafara izay.
57 Ie naho fa nifeno sive volagne ty Elizabeta, le niterake lahilahy.
58 Nirey ty nama’e naho ty longo’e tie tena niferenaigne i Elizabeta ty Jehovah, le niarake nifale ama’e iareo.
59 Ie naho fa nifeno valo andro i ajajay, le nisavare iareo. Fa ho natao iareo Zakaria mitovy amy i agnaran-drae’ey ka ty agnara i ajajay.
60 Faie hoe ty navalen-drene’e i ndaty rey: “Aha’a, i Jaona ty hatao agnara’e.”
61 Le hoe iareo tamy i Elizabeta: “Tsy misy managne ze agnaragne zay anio ty longo’o!”
62 Nanao baiko moagne taman-drae’e areke iareo mba hamantaragne tie ia ty tea’e hatao agnara i ajajay.
63 Le nangatake hatae pisake ty Zakaria mba hanorata’e. Izao ty sinora’e eo: “I Jaona ty agnara’e.” Le nigaga i ndaty rey iaby.
64 Le avy le nisokake ty vava’e, le nibalake ka i lela’ey, le nanjare nahay nirehake indraike reke sady nidera an’Agnahare.
65 Natahotse iaby i mpiharo tanàgne tamy iareo rey sady nalaza nagneragne i Jodia ze raha zay iaby.
66 Le nisaintsaigne miomba izay ze naharey izay sady nanao tihoe tie: “Mba ty ajaja hanao akore loatse itoio?” Ty anto’e, tena nanohagne aze ty fità i Jehovah.
67 Nifeno fagnahy masigne ty Zakaria, le naminany tihoe tie:
68 “Hoderaegne abey ty Jehovah, i Andrianagnahare o Israelioy satria niferenaigne o vahoa’eo reke, le nagnafake iareo.
69 Nagnomey mpamonje mahery* boake amy ty tarana i Davida mpanompo’e reke,
70 arake ty fa nisaontsie’e tamy ty alala o mpaminany masigne talohao tie,
71 hamonje antikagne amo o fahavalontikagneo naho an-tagna ze malaigne antikagne eo reke.
72 Hotanterahe’e ka i raha nisaontsie’e tamy ty razantikagne tie hamindra fo amy iareo rekey, sady tsy hohalignove’e ka i fifagnekeagne masigne natao’ey.
73 Izay ty raha nampitamae’e i Abrahama razambentikagne.
74 Naho fa boake magnafake antika an-tagna o fahavalontikagneo eo reke, le homea’e tombotsoa tika mba hanao fanompoagne masigne ho aze sady tsy hatahotse naho fa manao izay.
75 Amy izay tika tsy hivalike sady hanao ty maregne agnatreha’e eo amparake ty iaignantikagne.
76 Fa irehe anake, hotokavegne tihoe mpaminany i Andrianagnahare Fara’e Amboney satria handeha aloha i Jehovah eo rehe mba hagnomagne ty lala’e,
77 naho hampahafantatse o vahoa’eo tie havotan’Agnahare iareo sady holiove’e ty hakeo iareo.
78 Hanao izay i Andrianagnaharentikagney satria miferenaigne. Ze fiferegnesa’e zay, le hagnazava antikagne manahake i masoandro vaho manjirikey,
79 mba hagnazava ze mipetrake amy ty iegne ao naho amy ze alokalofa i fatey ao vaho hitarike antika mbamy i lala ty fiadagnagney mbeo.”
80 Le nihabey i ajajay sady nihakante* ka. Nitoboke tam-patrambey agne avao reke, amparake ty niavia ty andro nisehoa’e amo o Israelio eo.
Fagnamarehagne ambane peje
^ Ndra: “nivokie’e.”
^ Abt: “tsifa ty famonjeagne.”
^ Abt: “natanjake ara-pagnahy.”
