Talily Soa Nisorate i Lioka 14:1-35
-
Nisitragnegne tamy ty andro Sabata i lahilahy nienatse ty vata’ey (1-6)
-
Miambanea naho fa misy manasa (7-11)
-
Ze tsy ho afake hanasa azo ro asao (12-14)
-
Fagnoharagne miomba i ndaty nasaegne faie nipay fialan-tsiny rey (15-24)
-
Ty raha takegne amy ty mpiana i Jesosy (25-33)
-
Sira manjare matsatso (34, 35)
14 Tamy ty Sabata magnarake, le nandeha nihinagne tan-tragno ze lahibey o Fariseò zay agne ty Jesosy. Le nihentea iareo soa reke.
2 Nisy lahilahy taloha’e eo zay nienatse ty vata’e satria nisy rano.
3 Le hoe ty niontane i Jesosy o ndaty nahay Lalànao naho o Fariseò: “Mete vao ty magnasitragne amy ty andro Sabata?”
4 Faie nitsìgne avao iareo. Nitsapae i Jesosy i lahilahỳ tafara izay, le nisitragne’e, avy eo nampolie’e.
5 Le hoe reke tamy iareo: “Ia ama’areo ty tsy le avy le hagnakatse ty ana’e ndra ty agnombe’e naho poke agnate vovogne amy ty andro Sabata?”
6 Le tsy nahatrea havale aze iareo.
7 Nirehake fagnoharagne tamy i ndaty nasaegne rey ty Jesosy tafara izay, satria nivoamare’e tie nijobogne toeragne miambake iareo.
8 Hoe reke tamy iareo: “Naho misy ndaty manasa anareo mba hamonje mariaze, le ko mamonje i toeragne natokagne hoahy ty ndaty manan-kaja rey. Ty anto’e, va’e hisy ndaty manan-kaja ambone’o nasae’e ka,
9 le handeha mbama’o mbeo i ndaty nanasa azoy sady hirehake ama’o tie: “Itiagne ty tompo o toeragne misy azò.” Le ho megnatse rehe ty hifindra afara agne.
10 Fa naho fa misy manasa rehe, le mitoboha afara agne. Amy izay i ndaty nanasa azoy handeha mbama’o mbeo sady hirehake ama’o tie: “O ragnetse, mifindrà aloha eroy rehe.” Le hahazo voninahitse agnatreha i ndaty nasaegne reketse azo rey rehe.
11 Ty anto’e, ze magnambone tegna le haetre, fa ze miambane ro hasondrotse.
12 Hoe ka reke tamy i ndaty nanasa azey: “Naho fa manasa ndaty mba hihinagne an-tragno’o atoy rehe, le tsy ty nama’o, ndra ty rahalahi’o ndra ty longo’o ndra ty nama’o mpagnarivo avao ro asaegne. Ty anto’e, va’e hanasa azo ho amy iareo agne ka iareo, le hovoavale i raha natao’oy.
13 Fa naho fa manasa ndaty mba hihinagne an-tragno’o atoy rehe, le o mahantrao, o manan-kandrao, o kepekeo naho o ndaty goao ro asao.
14 Amy izay rehe ho sambatse, satria tsy hanagne havale azo iareo. Fa amy i famelomagne ty matey rehe ro hahazo valesoa manahake o ndaty maregneo.”
15 Naho fa naharey izay ty raike amy i ndaty nasaegne rey, le hoe reke tamy i Jesosy: “Sambatse ze ndaty hihinagne amy i Fanjakàn’Andrianagnaharey ao.”
16 Le hoe ty Jesosy tama’e: “Nisy lahilahy raike nagnomagne fihinanam-bey, le nanasa ndaty maro.
17 Nagnirake tamo o mpanompo’eo reke mba hirehake amy i ndaty nasaegne rey tie: ‘Miavia nareo satria fa vognogne iaby ze kila raha.’
18 Faie sambe nipay anto’e tsy hiaviagne iareo. Hoe ze raike zay: ‘Nivily tane raho, le handeha agne hey hagnente aze. Mba ialao tsiny agne raho.’
19 Hoe ka ty raike: ‘Nivily agnombe folo raho, le handeha agne hey hagnente aze. Mba ialao tsiny agne raho.’
20 Le hoe ka ze raike zay: ‘Vaho boake nagnengavao raho, le tsy afake handeha agne.’
21 Le nandeha noly i mpanompoy mba hitalily ze raha rezay tamy i tompo’ey. Niboseke reke naho fa naharey izay, le hoe reke tamy i mpanompo’ey: ‘Akia rehe mandehana malaky agn’arabey ey naho amy ze lalagne maifitse, le indeso atoy o ndaty mahantrao, o manan-kandrao, o ndaty goao naho ty ndaty kepeke.’
22 Hoe i mpanompoy naho fa niheregne: ‘O Ragnandria, fa nivita iaby i raha nampanoe’oy, faie mbe misy malalake i toeragney.’
23 Le hoe i tompon-tragnoy tamy i mpanompo’ey: ‘Mandehana rehe amy ty lalagne ivela i tanàgney agne, le reseo lahatse ze ndaty trea’o ey mba ho mbetoa, soa tie ho feno ty tragnoko toy.
24 Rehafeko ama’o, fa tsy hisy hagnandragne ty hanegne nomaneko retoa i ndaty nasaegne faie tsy niavy rey.’”
25 Nisy vahoake maro nagnorike i Jesosy, le nitolihe’e iareo sady hoe reke tamy iareo:
26 “Naho misy ndaty te hagnantogne ahike, faie tsy malaigne ty rae’e naho ty rene’e, ty valy aman’ana’e, ty rahalahi’e naho ty rahavave’e, ndra tsy malaigne ty fiai’e ka aza, le tsy fagneva ty ho mpianako.
27 Ze tsy minday i hazo fijalea’ey sady tsy manonjohy ty liako, le tsy afake ty ho mpianako.
28 Ia ama’areo zao ohatse ty te hagnoregne tragno abo faie tsy mitoboke hey hikontekonte ty holani’e mba hahatreava’e tie ampe hahavita’e aze vao ty vola’e sa tsy ampe?
29 Naho tsy izay, le ty fototse avao ro hovita’e oregne fa tsy hovita’e hatrake ampara’e i tragno aboy. Le hitsikike aze ze ndaty mahatrea izay,
30 sady hirehake tihoe: ‘Nao ty lahy tia nagnoregne tragno abo zao vaho henhenke tsy nivita’e hatrake ampara’e!’
31 Ndra, ia ka ty mpanjaka hialy amy ty mpanjaka hafa, faie tsy mitoboke hey hangalake torohevetse mba hahafantara’e tie hovita’e vao ty handrese i mpanjaka hialy ama’e managne maramila 20 000-y, ie amy izao ty aze 10 000 avao?
32 Naho ohatse tsy hovita’e ty hialy amy i mpanjaka raikey, le hagnirake solontegna reke amy iareo mbe lavitsey mba hipay filongoagne ama’e.
33 Hoe izay ka, fa tsy afake ty ho mpianako ze ndaty tsy mahafoe ty fanagna’e iaby.
34 “Soa vata’e o sirao, faie naho o sirao ro manjare matsatso, le akore ty hagneregnagne i tsiro’ey?
35 Tsy hisy hilagne aze sasa reke fa haria o ndatio, satria tsy raha ndra ho azo atao zezeke reke. Ho anareo ze afake mitsanogne, le mitsanogna soa.”
