Talily Soa Nisorate i Lioka 15:1-32
15 Nivory mbamy i Jesosy mbeo manahake ty fatao iareo o mpitake hetrao iaby naho o mpanotao mba hitsanogne aze.
2 Le nimonomonogne o Fariseò naho o mpampianatse lalànao tie: “Henhenke ty lahy tia, le mifandrambe soa amo o mpanotao sady miarake mihinagne amy iareo ka.”
3 Le nirehake fagnoharagne tamy iareo reke. Hoe reke:
4 “Andao hatao tihoe misy lahilahy raike managne agnondry 100 faie nimontso ty raike. Tsy henga’e am-patrambey agne vao i 99 rey, le mandeha reke mipay i raike nimontsoy amparake ty hahatreava’e aze?
5 Naho fa nitrea’e amy izay i agnondri’ey, le tarazoe’e sady falefale reke.
6 Naho fa avy an-tragno’e agne reke, le avori’e iaby ty nama’e naho ty mpiharo tanàgne ama’e sady horehafe’e iareo tie: ‘Andao hifale miarake amako fa nitreako i agnondriko nimontsoy.’
7 Rehafeko ama’areo, fa hisy hafaleam-bey hoe izay ka ty an-dagnitse agne naho fa misy mpanota raike mibebake. O raike iohoe ro tena hahafale iareo naho ampitahaegne amy i ndaty 99 maregne, tsy mila mibebake rey.
8 “Andao ka hatao tihoe misy ampela raike managne vola drakima folo faie nimontso ty raike amy i vola’ey. Tsy hamelogne jiro vao reke, le hamafa i tragno’ey sady hikodebe i vola’ey amparake ty hahatreava’e aze?
9 Naho fa trea’e i vola’ey, le havori’e ty nama’e naho ty mpiharo tanàgne ama’e, le hirehake amy iareo reke tie: ‘Andao hifale miarake amako fa nitreako i volako nimontsoy.’
10 Rehafeko ama’areo, fa ho fale hoe izay ka o anjelin’Agnahareo naho fa misy mpanota raike mibebake.”
11 Hoe ka reke: “Nisy lahilahy raike nanagne anake roe lahy.
12 Le hoe i zai’ey taman-drae’e: ‘O baba, omeo ahy ty anjara lova toko’e ho ahy.’ Le nizaraen-drae’e tamy iareo roe lahy i fanagna’ey.
13 Ie andro tsy ampeampe tafara izay, le nahoro i zai’ey iaby i fanagna’ey, le nandeha an-tane lavitse agne reke. Nilanilanie’e tamy ty rendrarendra i fanagna’ey naho fa niavy agne reke.
14 Naho fa nilany i fanagna’e rey, le nisy hakeré ty tamy i tane nisy azey agne, hafarà’e reke nipoi’e.
15 Nandeha areke reke nangatake asa tamy ze ndaty tompon-tane tamy i tanàgney eo zay. Le nampiandraze o ndaty iohoe lambo an-tete’e agne reke.
16 Tena nikeré reke, hafarà’e nagniry hihinagne i hanen-dambo rey, faie ndra tie izay aza, le tsy nisy nagnomey aze ka.
17 “Naho fa nahatsapa reke tie tena tsy mete ty raha natao’e, le nirehake tihoe: ‘Maro ty ndaty miasa aman-draeko ao faie tsy mba keré zao. Izaho toy mate ty hakeréko etoa!
18 Handeha hiheregne aman-draeko agne raho, le hirehake ama’e tie: “O baba, nanota tamy i lagnitsey naho tama’o raho.
19 Tsy fagneva ty hatao tihoe ana’o sasa raho. Ampanahafo ty raike amo o mpanompo’o reo raho.”’
20 Niongake reke, le nandeha aman-drae’e agne. Mbe nilavidavitse avao reke, le fa nitalaken-drae’e. Niferenaigne aze ty rae’e, le nilay mbama’e mbeo, le niatsampe am-bozo’e ey sady nagnoroke aze taman-katea.
21 Le hoe reke taman-drae’e: ‘O baba, nanota tamy i lagnitsey naho tama’o raho. Tsy fagneva ty hatao tihoe ana’o sasa raho.’
22 Le hoe ty rae’e tamy i mpanompo’e rey: ‘Akia nareo mandehana malaky, le mangala akanjo ze fara’e soa, le ampiakanjo’areo aze. Asio’areo peratse i tagna’ey, le asio’areo kapa ka ty a tombo’ey.
23 Alao’areo ka ze agnombe fara’e vondrake ao, le vonò’areo. Andao tikagne hihinagne naho hanao fete,
24 satria fa nimate ty anako toy faie nivelogne indraike. Nimontso faie nitrea indraike.’ Le nanao fete iareo.
25 “Tan-teteke agne i ana-dahi’e voaloha’ey tamy izay. Naho fa noly reke, le naharey mozike naho ndaty nandihy naho fa narine i tragnoy.
26 Le nitokave’e ty raike amy i mpanompo iareo rey sady nagnontenea’e ty anto’e anoa iareo fete.
27 Le hoe i mpanompoy tama’e: ‘Niavy i zai’oy, le namonoan-drae’areo i agnombe fara’e vondrakey satria niheregne ama’e eo sady salama soa.’
28 Faie niboseke i zoke’ey sady tsy nipaoke hizilike. Le nimbama’e mbeo ty rae’e sady nihalale ama’e.
29 Hoe reke taman-drae’e: ‘Fa tagnate ty taogne maro raho ro nanompo azo sady mbeliako naho tsy nagnorike ty raha nisaontsie’o. Faie ndra anak’ose raike tsy nimei’o ahy mba hiarahako mifale amo o namakò.
30 Ie vaho niavy i ana-dahi’oy, le namonoa’o i agnombe fara’e vondrakey, ie amy izao reke nandanilany i fanagna’oy tamo o makorelio agne.’
31 Le hoe ty rae’e tama’e: ‘O anake, ihe anio tamako teto avao amparake izay! Le ze fanagnako, azo iaby.
32 Faie itika tsy maintsy manao fete sady mifale, satria fa nimate o zai’ò faie nivelogne indraike. Nimontso faie nitrea indraike.’”
