Talily Soa Nisorate i Lioka 19:1-48
19 Nizilike a Jeriko ao reke naho fa niavy eo, le nanegnategna i tanàgney.
2 Nisy lahilahy raike mpitake hetra sady mpagnarivo zay ty tao. I Zakaiosy ty agnara’e.
3 Nite hahatrea mafe ze o Jesosy zao reke, faie tsy nahatrea aze satria nimaro loatse i ndatỳ sady ireke ka boribory.
4 Nilay aloha amy i lalagne handehana i Jesosỳ areke reke, le nanganike tamy ze hatae* zay mba hahatreava’e i Jesosy.
5 Naho fa niavy tamy i hatae nanganiha i Zakaiosỳ eo ty Jesosy, le niandra sady nirehake tama’e tie: “O Zakaiosy, mizotsoa malaky rehe fa tsy maintsy ho ambahini’o raho tie androany.”
6 Le nizotso malaky ty Zakaiosy sady nifalefale reke nandrambe i Jesosy ho an-tragno’e agne.
7 Naho fa nahatrea izay i vahoakey, le nimonomonogne tie: “Niambahiny an-tragno i lahilahy mpanotay agne reke.”
8 Faie nitsangagne ty Zakaiosy sady nirehake tamy i Tompo tie: “O Tompo, homeako o mahantrao ty an-tsasa ty fanagnako. Ze raha o ndaty nisengeako hery ka, le hahereko sady hampitomboeko inempatse.”
9 Hoe ty Jesosy tama’e: “Niavy amy ty tragno toy eto i famonjeagney tie androany, satria ana i Abrahama ka rehe.
10 Ty anto’e, ty hipay naho hagnavotse ze nimontso ty niavia i Ana o ndatỳ.”
11 Tamy i mpiana’e rey mbe nitsanogne azey, le nirehake fagnoharagne hafa tamy iareo reke, satria fa narine i Jerosalema reke sady iareo ka nieretseretse tie le avy le hiseho i Fanjakàn’Andrianagnaharey.
12 Le hoe reke: “Nisy ana ty mpanjaka zay nandeha an-tane lavitse agne mba hotendregne ho mpanjaka. Le afara izay reke mbe hiheregne.
13 Faie aloha ty ho nandehana’e, le nitokave’e ty folo amy i mpanompo’e rey, le nimea’e folo mina.* Le hoe reke tamy iareo: ‘Manoa balike amy ty volako retoa nareo amparake ty hiaviako.’
14 Faie niheje i ndaty firenena raike ama’e rey reke, le nagnirake solontegna amy i tane handehana’ey agne iareo mba hirehake tie: ‘Tsy tea’ay ho mpanjaka’ay ty lahilahy tiagne.’
15 “Ie naho fa tinendre ho mpanjaka reke naho fa tafara tatoy, le niheregne. Tinoka’e amy izay i mpanompo’e nimea’e i vola’ey rey mba hagnontenea’e miomba ty vola niazo iareo tamy ty balike natao iareo.
16 Le nimbama’e mbeo i voaloha’ey sady nirehake tie: ‘O Tompo, nahazoako tombo’e folo i mina* nimei’o ahikey.’
17 Le hoe reke tamy i mpanompo’ey: ‘Fanjaka zay. Mpanompo soa vata’e rehe! Satria rehe niazo atokisagne tamy i raha kedekedey, le hotendreko hifehe tanàgne folo.’
18 Naho fa nimbama’e mbeo ka ty mpanompo’e magnarake, le izao ty rineha’e: ‘O Tompo, nahazoako tombo’e dime i mina nimei’o ahikey.’
19 Le hoe reke tama’e: ‘Hotendreko hifehe tanàgne dime ka rehe.’
20 Naho fa nimbama’e mbeo ka ty magnarake, le izao ty rineha’e: ‘O Tompo, ingo i mina nimei’o ahikey fa nahajako agnate lamba ao avao,
21 satria rehe natahorako fa ndaty sarotsarote’e. Alae’o avao ty raha tsy navori’o, le rofota’o avao ka ty raha tsy nitongise’o.’
22 Le hoe reke tamy i mpanompo’ey: ‘Ty reha’o avao ro hitsarako azo ty mpanompo raty fagnahy tia! Hai’o soa fa ndaty sarotsarote’e raho, le mangalake ty raha tsy navoriko sady mandrofotse ty raha tsy nitongiseko.
23 Nagnino areke ro tsy napetra’o amy i banke agne i volakoy, amy izay naho fa niheregne raho, le ho nahazo ana’e boake ama’e?’
24 “Le hoe i mpanjakay tamy i ndaty nitsangagne teo rey: ‘Alao’areo i mina ama’ey, le omeo i raike nahazo tombo’e foloy.’
25 Faie hoe iareo tama’e: ‘O Tompo, fa managne mina folo anio reke!’—
26 Le hoe reke tamy iareo: ‘Rehafeko ama’areo fa ze managne, ro homeagne maro. Fa ze tsy managne, ndra i kede anagna’ey aza mbe halaegne ama’e ka.
27 Ankoatse izay, le indeso’areo mbetoagne ka i fahavaloko malaigne ahy ty ho mpanjaka iareoy, le vonò’areo tsy misy indra-fò agnatrehako etoa.’”
28 Naho fa boake nirehake ze raha rezay ty Jesosy, le tinohi’e i lia’e ho a Jerosalema agney.
29 Naho fa narine i Betifaga naho i Betania reke, i tanàgne amy i Vohitse Olivay eoy, le nagnirake roe lahy tamy i mpiana’e rey.
30 Hoe reke tamy iareo: “Mandehana amy ty tanàgne roy ey nareo. Naho fa mizilike ao nareo, le hahatrea anam-birìke mirohy mbe tsy nitingira o ndaty. Hahao’areo reke, le indeso’areo mbetoa.
31 Faie naho misy ndaty magnontane anareo tie: ‘Hatao’areo inogne io ie hahà’areò?’ Le valeo’areo hoe izao: ‘Paliae i Tompo.’”
32 Naho fa nandeha i mpiana’e nirahe’e rey, le nitrea iareo i raha nirehafe’e tamy iareoy.
33 Faie naho fa nihahà iareo i anam-birìkey, le nirehake tamy iareo i tompo’ey tie: “Hatao’areo inogne io ie hahà’areò?”
34 Le namale iareo tie: “Paliae i Tompo.”
35 Le nindese iareo mbamy i Jesosy mbeo i anam-birìkey, le natao iareo ambone’ey i akanjobey iareoy mba hitoboha i Jesosy.
36 Naho fa nandeha reke, le nalafy o ndatio tagn’arabey ey i akanjobey iareoy.
37 Naho vaho narine i lalagne mizotso mbamy i Vohitse Olivay eoy reke, le nanomboke nifalefale naho nidera an’Agnahare tamy ty feo mafe i mpiana’e maro rey noho ty amy i fahagagagne maro nitrea iareo rey.
38 Hoe iareo: “Hotahiegne abey i Mpanjaka avy amy ty tahina i Jehovah-y! Lonike abey hisy filongoagne ty amo o ndatio naho aman’Andrianagnahare, le voninahitse abey hoahy i andindìgne agney!”
39 Faie ty ila’e amy i Fariseo tamy i vahoakey teo rey nirehake tamy i Jesosy tie: “O Mpagnanatse, ampitsigno o mpiana’o reo.”
40 Faie hoe ty navale’e iareo: “Rehafeko ama’areo fa naho mitsigne reo, le o vatò ro hikorakorake.”
41 Naho fa narine i Jerosalema reke, le nitagny naho fa nahatalake aze.
42 Le hoe reke: “Naho mba nihai’o i raha ho nahazoa’o fiadagnagne rey! Faie naetake rey amy izao mba tsy hotrea ty maso’o.
43 Satria ho avy ty andro hagnoregna o fahavalo’ò fahetse maragnitse magnodidigne azo, le hatao iareo arikobogne rehe.
44 Hatonta iareo an-tane eo rehe reketse o ana’ò sady tsy hisy vato henga iareo hifanongoa ty ama’o eo, satria fa nitsaraegne* rehe faie tsy nifanta’o.”
45 Nizilike tamy i tempolỳ tao reke tafara izay, le niroahe’e ze nivarotse tao.
46 Hoe ka reke tamy iareo: “Voasoratse* tie: ‘Ty tragnoko hatao tragno fivavahagne’, faie inareo manao aze ho lakato fietaha o malasò.”
47 Le nampianatse isan’andro isan’andro tamy i tempolỳ ao reke. Faie ty lahibey o mpisorogneo naho o mpampianatse lalànao vaho ty lahibey o vahoakeo nite hamono aze.
48 Faie tsy nahatrea fomba mba hanoagne izay iareo satria naina i vahoakey hombama’e mbeo avao mba hitsanogne aze.
Fagnamarehagne ambane peje
^ Grike: Sikamorea. Mitovitovy amo o fihamio ndra o aviavio o hatae iohoe.
^ Vola ze o mina zao, le ty mina raike 100 drakima.
^ Vola karama o ndaty raike agnate ty telo volagne eo ho eo ty mina raike.
^ Abt: “narahegne maso.”
^ Ndra: “rehafe ty Soratse Masigne.”
