Talily Soa Nisorate i Lioka 20:1-47
20 Tamy i Jesosy nampianatse o ndatio tamy i tempolỳ aoy naho nagnambara tamy iareo i talily soaỳ, le nimbama’e mbeo o lahibey ty mpisorogneo naho o mpampianatse lalànao vaho o mpitarike jiosio.
2 Le hoe iareo tama’e: “Rehafo ama’ay tie fahefagne boake aia ty anoa’o izao? Ndra, ia ty nagnomey azo ze fahefagne zay?”
3 Le hoe ty navale’e iareo: “Hagnontane raha raike anareo ka raho, le ambarao’areo ahy ty vale’e.
4 Boake an-dagnitse agne sa boake ama o ndaty ty nahazoa i Jaona fahefagne hanao badisa?”
5 Niarake nidineke iareo, le nifampirehake tie: “Naho mirehake tika tie: ‘Boake an-dagnitse agne’, le hirehake reke tie: ‘A nagnino ie tsy inoa’areò?’
6 Fa naho mirehake tika tie: ‘Boake ama o ndaty’, le hifamoria o ndatio tika sady hotorahe iareo vato, satria iareo mino tie mpaminany ty Jaona.”
7 Le namale iareo tie tsy fanta iareo.
8 Le hoe ty Jesosy tamy iareo: “Tsy horehafeko ama’areo ka areke tie fahefagne boake aia ty ahafahako manao o raha reo.”
9 Le nirehake ty fagnoharagne raike toy tamo o ndatio reke: “Nisy lahilahy raike zay nanagne teteke famboleagne voaloboke. Nambole voaloboke tao reke, le nampagnofae’e i tete’ey, le nandeha an-tane lavitse agne reke sady ela bey reke tie tagne.
10 Naho fa niavy ty fotoagne fimasaha i voalobokey, le nagnirake ty raike amy i mpanompo’e rey reke handeha amy i mpambole rey agne mba hangalake ty anjara’e. Faie jinera i mpambole rey i mpanompo’ey, le nampolie iareo tagnam-polo naho fa niavy eo.
11 Le nagnirake mpanompo hafa indraike reke. Faie jinera iareo naho nafaha iareo baraka ka io, sady nampolie iareo tagnam-polo.
12 Nagnirake mpanompo fagnintelo’e indraike reke, faie trinabotrabo iareo io, le nampolie iareo avao ka.
13 Le hoe i tompo i tane famboleagne voalobokeỳ: ‘Ino koahe ty hataoko? Aleo i ana-dahiko teakoy ro hiraheko agne. Mino raho fa hohajae iareo reke.’
14 Naho vaho nitrea i mpambole rey reke, le nifampirehake iareo tie: ‘Itike i mpandovay. Andao hovonoentikagne reke amy izay hoazontikagne i lova’ey.’
15 Le tinaritary iareo ambaly i teteke famboleagne voalobokey agne reke, le vinono iareo. Ino areke ty hatao i tompo i teteke famboleagne voalobokeỳ amo o mpambole rehoe?
16 Ho avy reke, le hamono iareo, sady homea’e ndaty hafa i teteke famboleagne voalobokey.”
Naho fa naharey izay iareo, le nirehake tie: “Raha tsy hisy zay!”
17 Faie nagnente iareo ty Jesosy, le nirehake tie: “Ino areke ty dika i raha rehafe ty Soratse Masigne manao tihoey tie: ‘Ty vato niheje o mpamboatse tragnò ro hanjare vato fara’e lahibey* amy i tragnoy’?
18 Ndra ia ndra ia mitonta amy ze vato zay, le hopotepoteke. Le ze itontà’e ka, le hotorotoro.”
19 Le nitea o mpampianatse lalànao naho o lahibey ty mpisorogneo hotsepahegne ty Jesosy tamy izay, satria nitaka iareo tie iareo ty tan-tsai’e ao naho fa nirehake i fagnoharagney reke. Faie natahotse i vahoakey iareo.
20 Naho fa boake nagnara-maso i Jesosy iareo, le nagnarama ndaty mba ho mbama’e mbeo hanao sare ndaty maregne, mba hamandrihagne aze amy ty raha rehafe’e, amy izay iareo ho afake hanolotse aze amo o manam-pahefagneo naho amo o mpitondrao.
21 Le hoe i ndaty nikaramà iareo rey tamy i Jesosy: “O Mpagnanatse, fanta’ay fa maregne ty raha rehafe’o naho ty fampianara’o, sady tsy mifily volo o ndaty ka rehe. Mampianatse ty maregne miomba an’Andrianagnahare ka rehe.
22 Izao areke, azo atao vao sa tsy azo atao ty mandoa hetra amy i Kaisara?”
23 Faie nihai’e tie te hamandrike aze avao iareo, le hoe reke tamy iareo:
24 “Torò’areo denaria raike raho. Sare ia io, le agnara ia o misoratse eò?” Le hoe iareo: “I Kaisara.”
25 Le hoe reke tamy iareo: “Naho izay areke, le aloao amy i Kaisara ze ahy i Kaisara fa aman’Andrianagnahare ka ze an’Andrianagnahare.”
26 Tsy nahavita namandrike aze tamy ty raha nirehafe’e tagnatreha o ndatio eo iareo, fa ndra nilatsa tamy ty fomba namalea’e i fagnontenea iareoy, hafarà iareo nitsìgne.
27 Faie ndra tie teo zay, le nimbama’e mbeo ty ila’e amo o Sadoseò. Tsy nino ty famelomagne amy ty mate iareo. Le nagnontenea iareo i Jesosy tie:
28 “O Mpagnanatse, nanoratse ho antika ty Mosesy tie, ‘naho misy lahilahy raike manambaly faie nimate tsy niterake, le toko’e hovalie ty rahalahi’e i valy nenga’ey, mba hagnomey taranake i rahalahi’e fa nimatey.’
29 Nisy fito mirahalahy zay ty tama’ay tetoa. Nanambaly i raike voaloha’ey, faie nimate tsy niterake.
30 Le nanambaly i ampelay ty rahalahi’e faharoe
31 naho i fahateloy. Le nanao hoe izay iaby iareo fito, faie sambe nimate tsy niterake iaby.
32 Tamy ty fara’e, le nimate ka i ampelay.
33 Naho fa ho avy amy izay areke i famelomagne ty matey, ia amy iareo ty ho valy i ampelay? Ty anto’e, sambe fa nanambaly aze iaby iareo fito lahy.”
34 Le hoe ty Jesosy tamy iareo: “Ty ana ty tontolo toy ro magnengavao naho engaem-bao.
35 Fa ze fagneva ty hiaigne amy i tontolo hoavỳ naho fagneva ty hovelomegne amy ty mate, le tsy mba hagnengavao ndra hengaem-bao.
36 Tsy ho mete mate sasa ka iareo satria hanahake o anjelio. Ho anan’Agnahare iareo satria nivelomegne amy ty mate.*
37 Ndra i Mosesy ka anio toe fa nampahafantatse miomba ze famelomagne ty mate zay, amy i fitantaragne miomba i hatae* nirehetseỳ. Ty anto’e, tamy io reke le nikanjy i Jehovah tie, ‘Andrianagnahare i Abrahama naho Andrianagnahare i Isaka vaho Andrianagnahare i Jakoba.’
38 Naho izay areke, le tsy Andrianagnahare ty mate reke fa Andrianagnahare ty velogne satria velogne iareo iaby tie ama’e.”
39 Le namale ty ila’e amo o mpampianatse lalànao tie: “O Mpagnanatse, maregne ze reha’o zay.”
40 Lelia’e tsy nahavany nagnontane i Jesosy sasa iareo.
41 Hafarà’e ty Jesosy nagnontane iareo tie: “Nagnino o ndatio ro mirehake tie, ana i Davida ty Kristy?
42 Ie amy izao, le ty vatantegna i Davida ro nirehake amy boke i Salamo ao tie: ‘Hoe ty Jehovah tamy i Tompokoy: “Mitoboha ankavanako etoa,
43 amparake ty hanoako o fahavalo’ò ho fisia tombo’o.”’
44 I Davida aza nitoka aze tihoe ‘Tompo’, le akore ty maha ana’e aze?”
45 Tamy i vahoakey mbe nitsanogne azey, le hoe reke tamy i mpiana’e rey:
46 “Mitaoa nareo amo o mpampianatse lalànao satria tea iareo ty magnisy akanjo lava mireparepa, ty ho salamaegne am-pagnajagne naho fa a bezara ey, ty mitoboke aloha ey naho fa amo o sinagogao ao vaho ty mitoboke amy ty toeragne miambake natokagne hoahy ty ndaty ambone naho fa amo o feteo agne.
47 Lanie iareo ka ty fanagna* o vantotseo sady manao vavake lava bey iareo mba ho fisehosehoagne avao. Ho mafe areke ty fagnamelohagne hahazo iareo naho ampitahaegne amy ty ndaty hafa.”
Fagnamarehagne ambane peje
^ Vato bey amy ty zoro o tragnò mikalagne i rindrigne roey mba hahavy i tragnoy ho mafe.
^ Ndra: “ana ty famelomagne amy ty mate.”
^ Hatae misy fatipatike mitovitovy amo o ropitekeo naho o robikagneo.
^ Abt: “tragno.”
