Talily Soa Nisorate i Lioka 22:1-71
-
Nipay fomba mba hamonoagne i Jesosy o mpisorogneo (1-6)
-
Fiomanagne amy i Pasake fara’ey (7-13)
-
I Mahakama Hariva i Tompo voaloha’ey (14-20)
-
“An-databatse eto miarake amako i hifotetse ahỳ” (21-23)
-
Nifamale tie ia ty fara’e ambone amy iareo (24-27)
-
Nanao fifagnekeagne miomba i fanjakagney ty Jesosy (28-30)
-
Nirehafegne mialoha tie handietse ty Petera (31-34)
-
Mila miomagne; mesabey roe (35-38)
-
Nivavake tamy i Vohitse Olivay agne ty Jesosy (39-46)
-
Nitsepahegne ty Jesosy (47-53)
-
Nandietse i Jesosy ty Petera (54-62)
-
Nitsikihegne ty Jesosy (63-65)
-
Nitsaraegne tagnatreha o Fitsaragne Ambone Jiosio eo (66-71)
22 Fa nihanarine i Fete ty Mofo Tsy Misy Lalivaỳ* ndra i fete atao tihoe Pasakey.
2 Nipay fomba mete soa mba hitsepahagne i Jesosy o lahibey ty mpisorogneo naho o mpampianatse lalànao, satria natahotse i vahoakey iareo.
3 Nizilike tamy i Jodasy Iskariota ao areke ty Satana. Agnisa i 12 lahy rey ty Jodasy.
4 Nandeha tamy ty lahibey o mpisorogneo agne naho ty lahibey ty mpiambegne o tempolio agne ty Jodasy mba hirehake ty fomba hifotera’e aze naho hanolora’e aze amy iareo.
5 Nifale iareo naho fa naharey izay, le nifagnarake tie hagnomey aze vola.
6 Nagneke izay ka ty Jodasy. Nanomboke teo reke, le nipay fotoagne avao mba hagnampeagne iareo hitsepake i Jesosy. Faie tsy nitea’e hotrea o ndatio ty hitsepahagne i Jesosy.
7 Niavy i andro voaloha’e amy i Fete ty Mofo Tsy Misy Lalivaỳ. Amo o andro iohoe ty famonoagne biby mba hohanegne amy i Pasakey.
8 Nagnirake i Petera naho i Jaona areke ty Jesosy sady nirehake tie: “Akia mandehana, le omano’areo i hanegne hariva amy i Pasakeỳ hohanentikagne.”
9 Le hoe iareo tama’e: “Aia ty tea’o hagnomana’ay aze?”
10 Le hoe reke tamy iareo: “Naho fa mizilike a Jerosalema ao nareo, le hifanojo amy ze lahilahy raike minday rano amy ty siny tane zay. Oriho’areo reke, le miziliha amy ze tragno idira’e.
11 Le izao ty raha rehafo’areo amy i tompon-tragnoy: ‘Izao ty nirehafe i Mpagnanatsey: “Aia ty tragno fandrambesagne ambahiny afake hihinanako i hanegne hariva amy i Pasakeỳ miarake amo o mpianakò?”’
12 Le hotoroa o lahilahy iohoe efetse malalake zay nareo. Ambone amy i tragno’e etazey ty misy o efetse iohoe. Fa misy ze raha ilaegne ty ao, le ao ty agnomano’areo i Pasakey.”
13 Nandeha areke iareo, le nitrea iareo ze raha nirehafe i Jesosy tamy iareo. Le nagnomagne i Pasakey iareo.
14 Naho fa niavy i lera fihinanagney, le nandre nitso-kiho tamy i latabatsey eo reke naho i apostoli’e rey.
15 Le hoe reke tamy iareo: “Nirieko mafe ty ho nihinagne miarake ama’areo amy ty Pasake toy, aloha ty hijaleako.
16 Rehafeko ama’areo, fa tsy hihinagne i hanegne amy i Pasakeỳ sasa raho, amparake ty hahantanteraha ze kila raha amy i Fanjakàn’Andrianagnaharey ao.”
17 Nirambese i Jesosy i kope nisy divaỳ, le nisaotse an’Agnahare reke sady nirehake tihoe: “Ifanoloro’areo toy, le minoma ama’e nareo tsikiraidraike.
18 Rehafeko ama’areo, fa manomboke amy izao raho, le tsy hinogne divay sasa amparake ty hiavia i Fanjakàn’Andrianagnaharey.”
19 Nalae’e ka i mofoy, le nisaotse an’Agnahare reke. Nitapahe’e i mofoy naho fa niavy eo, le nimea’e iareo sady hoe reke: “Intoy i vatako homeagne anareoy. Anò’areo avao zao ho fahatsiarovagne ahy.”
20 Hoe izay ka ty natao’e tamy i kope misy divaỳ naho fa boake nihinagne i hanegne hariva amy i Pasakeỳ iareo. Le hoe reke: “Ty kope toy, i fifagnekeagne vaovaoy. I lioko hatégne ho anareoy ty hampanan-kery aze.
21 “Miarake amako an-databatse etoa ty tagna i hifotetse ahỳ.
22 Maregne fa hotanterake iaby ze raha nisorategne miomba i Ana o ndatỳ. Faie hoazon-doza ze ndaty mifotetse aze!”
23 Le nanomboke nifagnontane iareo tie, ia amy iareo ty hahavany hanao ze raha zay.
24 Ndra tie teo zay, le nifamale ka iareo tie ia amy iareo ty fara’e ambone.
25 Faie hoe ty Jesosy tamy iareo: “Manjakazaka amy ty firenena ente’e o mpanjakao. Le ze manam-pahefagne tokave iareo tihoe Mpanao Asa Soa.
26 Faie tsy toko’e hanao hoe izay nareo. Fa ze fara’e ambone ama’areo ro ho fara’e kedekede, le ze mitarike ama’areo ro ho mpanompo.
27 Ty aia ty bey, i mihinagney, sa i manjotso hanegney? Tsy i mihinagney vao? Faie iraho manompo anareo manahake ty atao o mpanompò.
28 “Nipiteke amako avao nareo ndra tie teo aza i raha sarotse natreheko rey.
29 Manao fifagnekeagne ama’areo areke raho manahake ty nanoan-dRaeko fifagnekeagne tamako, fa hahazo i fanjakagney nareo.
30 Amy izay nareo hihinagne naho hinogne divay miarake amako, amy i latabako amy i Fanjakakoy aoy. Hitoboke amy ty sezan-droandriagne ka nareo, le hitsara ty foko 12 o Israelio.
31 “O Simona, Simona, tea i Satana hosivagnegne manahake o vareo nareo iaby.
32 Faie fa nihalale ho azo raho mba tsy ho levogne ty finoa’o. Faie naho fa tafaregne rehe, le hamafeso ty finoa o rahalahi’ò.”
33 Le hoe ty Petera tama’e: “Vognogne hiarake ama’o avao raho Tompo, ndra hogadraegne rehe ndra hovonoegne.”
34 Faie hoe ty Jesosy tama’e: “Rehafeko ama’o Petera, fa aloha ty kekeo akoho androany, le intelo rehe ro hirehake tie tsy mahay ahy.”
35 Hoe ka reke tamy iareo: “Tamy inareo niraheko faie tsy nampindeseko kitapo fisiagne vola ndra kitapo fisiagne hanegne ndra kapay, le tsy nisy raha nahaore anareo. Sa tsy izay?” Le hoe iareo: “Eka, tsy nisy.”
36 Le hoe reke tamy iareo: “Faie amy izao, ze managne kitapo fisiagne vola, le toko’e hinday i azey. Le hoe izay ka ze managne kitapo fisiagne hanegne. Ze tsy managne mesabey, le toko’e hivarotse ty akanjobei’e mba hiviliana’e izay.
37 Rehafeko ama’areo, fa tsy maintsy tanterake amako ty raha voasoratse* manao tihoe toy tie: ‘Natao manahake o mpandika lalànao reke.’ Fa hotanterake amako ze raha voasoratse miomba ahy zay.”
38 Le hoe iareo: “O Tompo, intoa misy mesabey roe.” Le hoe reke tamy iareo: “Ampe reo.”
39 Nandeha tamy i Vohitse Olivay agne reke manahake ty fatao’e. Niarake tama’e ka i mpiana’e rey.
40 Naho fa niavy agne iareo, le hoe reke tamy iareo: “Mivavaha avao nareo mba hahatohetse tsapa hevetse.”
41 Niala lavidavitse* iareo reke, le nitongaleke sady nivavake
42 tihoe: “O Baba, afaho amako ty kope toy naho zoto’o. Faie tsy ty sitram-poko ro hatao fa ty azo.”
43 Le nisy anjely raike boake an-dagnitse agne niseho tama’e sady nampahery aze.
44 Faie niore mafe ty Jesosy, hafarà’e reke vao mainke nivavake mafe. Nikararake manahake o liò ka ty fana’e naho fa nipoke an-tane eo.
45 Naho fa boake nivavake ty Jesosy, le nandeha mbamy i mpiana’e rey mbeo. Faie aheo’e naho niroro iareo satria nirokake noho iareo nalahelo mafey.
46 Hoe reke tamy iareo: “Nagnino nareo ie mirorò? Mifohaza, le mivavaha avao mba tsy ho rese ty tsapa hevetse.”
47 Tamy i Jesosy mbe nirehake tamy iareoy, le nisy ndaty maro ty niavy boake agne. I Jodasy, i agnisa i 12 lahy reỳ ty nitarike o ndaty reo. Le nandeha mbamy i Jesosy mbeo reke mba hagnoroke aze.
48 Faie hoe ty Jesosy tama’e: “Oroke vao Jodasy ty ifotera’o i Ana o ndatỳ?”
49 Naho fa nahatrea ze raha niseho zay i ndaty nagnodidigne aze rey, le hoe iareo: “O Tompo, firae’ay amy ty mesabey toa vao iareo?”
50 Ty raike amy iareo aza, le avy le namira ty mpanompo i mpisorombeỳ, le nihifike mberoagne agne ty sofi’e havana.
51 Faie hoe ty Jesosy: “Soa hinane zay.” Nitsapae i Jesosy i sofy i mpanompoỳ, le nisitragne.
52 Le hoe ty Jesosy tamo o lahibey ty mpisorogneo naho o lahibey ty mpiambegne i tempolỳ rey vaho i mpitarike jiosy niavy mbama’e mbeo mba hitsepake aze rey: “Le ndra kitra’e ka nareo tie hitsepake mpangalatse naho le minday doda naho mesabey!
53 Niarake tama’areo avao tamy i tempolỳ ao isan’andro isan’andro raho faie tsy nitsepahe’areo. Faie avy hinane zao ty lera’areo naho ty fahefà i iegney.”
54 Nitsepahe iareo areke ty Jesosy, le nindese iareo an-tragno i mpisorombeỳ agne. Faie nagnorike lavidavitse tey avao ty Petera.
55 Naho fa nandrehetse afo tam-pagnivoa i kiririsay eo iareo sady nitoboke teo, le niarake nitoboke tamy iareo teo ka ty Petera.
56 Faie nisy mpanompovave raike zay nahatrea aze tamy ireke namindroy, le nihentea’e soa ty Petera sady hoe reke: “Niarake tama’e ka ty lahilahy tia!”
57 Faie nandietse ty Petera sady nirehake tie: “Tsy fantako reke ty ampela tia!”
58 Ie tafara kede izay, le nisy ndaty hafa nahatrea aze sady nirehake tihoe: “Nama iareo ka rehe.” Faie hoe ty Petera: “Tsy nama’e raho kahe!”
59 Lera’e raike teo ho eo tafara izay, le nisy lahilahy raike zay nizizo mafe tie: “Tena nama iareo vata’e reke satria te Galelia!”
60 Faie hoe ty Petera: “Tsisy raha rendreko ndra raike o raha rehafe’o zao kahe!” Tamy ireke mbe nirehake izaỳ, le avy le nisy akoho nikekeo.
61 Le nitolike mba hagnente i Petera ty Tompo tamy izay. Le avy le nitsiaro i Petera areke i raha nirehafe i Tompo tama’e tihoey tie: “Mbe tsy mikekeo i akohoy tie androany, le handietse ahy intelo rehe.”
62 Le niakatse ambalike agne reke sady nangoihoy ty tagny.
63 Nitsikihe i lahilahy niambegne aze rey ty Jesosy sady jinera iareo.
64 Naho fa boake nitakona iareo ka ty tarehe’e, le izao ty nagnontenea iareo aze: “Naho toe mpaminany vata’e rehe, le rehafo tie ia o nijera azò?”
65 Maro ka ty raha nirehafe iareo mba hanivetiveagne aze.
66 Ie nimaraindray, le nivory ty ndaty bey tamy i tanàgney eo, agnisa izay o lahibey ty mpisorogneo naho o mpampianatse lalànao. Le nindese iareo tamy ty tragno nisy o Fitsaragne Ambone o Jiosio ao reke. Le hoe iareo:
67 “Naho toe ihe vata’e o Kristio, le rehafo ama’ay.” Faie hoe reke tamy iareo: “Ndra tie horehafeko ama’areo aza zay, le tsy hinoa’areo.
68 Naho agnonteneako ka nareo, le tsy hamale.
69 Faie manomboke amy izao, le hitoboke an-kavana i Andrianagnahare maherỳ eo i Ana o ndatỳ.”
70 Le hoe iareo naho fa naharey izay: “Anan’Agnahare zane rehe?” Le hoe reke tamy iareo: “Fa ie i nirehafe’areo zay. Ana’e raho.”
71 Le hoe iareo: “Mbe ino ka ty ipaliantika vavolombelogne? Le ty vatantegnantikagne zao ty naharey i raha nirehafe ty vava’e anianỳ.”
Fagnamarehagne ambane peje
^ Ndra: “Karbonatỳ.”
^ Ndra: “rehafe ty Soratse Masigne.”
^ Amy ty toeragne avy ty torake indraike.
