Talily Soa Nisorate i Lioka 23:1-56
23 Nitsangagne areke i vahoakey iaby, le nindese iareo amy i Pilato agne ty Jesosy.
2 Nanao kitomboke aze iareo tie: “Mampikorontagne o firenentikagneo ty lahy tia, satria mandrara o ndatio mba tsy handoa hetra amy i Kaisara sady manao ty vata’e ho Kristy Mpanjaka.”
3 Le nagnontenea i Pilato ty Jesosy tie: “Ihe zane ty mpanjaka o Jiosio?” Le namale ty Jesosy tie: “Fa ie ze tsarae’o zay.”
4 Hoe ty Pilato tamo o lahibey ty mpisorogneo naho tamy i vahoakey tafara izay: “Tsy treako ty raha raty natao ty lahy tiagne!”
5 Faie nizizo iareo, le nirehake tie: “Mandrisike o ndatio higoreve reke tamy ireke nampianatse magneneke i Jodiay. Nanomboke a Galelia agne zay hatrake atoy.”
6 Naho fa naharey izay ty Pilato, le nagnontane naho toe te Galelia vata’e reke.
7 Naho fa nihay i Pilato tie boake amy ty tane fehé i Heroda agne ty Jesosy, le nalefa’e amy i Heroda agne reke. Ta Jerosalema agne ty Heroda tamy izay.
8 Tena nifale ty Heroda naho fa nahatrea i Jesosy. Fa ela reke ro nite hahatrea i Jesosy satria nimaro ty raha nirei’e miomba aze. Nitamà hahatrea i Jesosy hanao fahagagagne agnatreha’e eo ka reke.
9 Le nagnontenea’e raha maro ty Jesosy faie tsy namale ndra raike.
10 Faie o lahibey ty mpisorogneo naho o mpampianatse lalànao nitsanga tsy vora* sady tena romotse iareo amy iareo manao kitomboke azey.
11 Le nambanémbané i Heroda naho i maramila’e rey ty Jesosy, sady nampagnisie’e akanjo tena fanjaka mba hitsikihagne aze. Nahere iareo amy i Pilato agne reke naho fa niavy eo.
12 Le nanjare nimpiragnetse ty Heroda naho i Pilato tamy ze andro zay, ie amy izao iareo taloha izay tena mpifahavalo.
13 Le navory i Pilato o lahibey ty mpisorogneo naho o manam-pahefagneo vaho i vahoakey,
14 le hoe reke tamy iareo: “Nente’areo amako atoy ty lahy tiagne satria nao mandrisike o ndatio mba higoreve zao, hoe nareo. Fa nifotopotoreko agnatreha’areo eo reke faie tsy mitombegne i raha nirehafe’areo tie nao natao’e rey.
15 Ndra i Heroda ka aza tsy nahatrea anto’e toko’e hamonoagne aze. Izay ty nahavy i Heroda nagneregne aze amantikagne atoy. Tsy fagneva ty hovonoegne areke reke satria tsy misy raha raty natao’e.
16 Faie hosazeako reke, le hovotsorako.”
17 ——
18 Faie nikorakorake i vahoakey iaby tie: “Vonò agne o lahilahy iohoe fa i Barabasy ro votsoro.”
19 (Nigadraegne ty Barabasy satria nanohetse ty fanjakagne tamy i tanàgney eo sady namono ndaty.)
20 Le nirehake tamy iareo indraike ty Pilato satria tea’e hovotsoragne ty Jesosy.
21 Le niboseke iareo sady nirehake tihoe: “Peho amy ty boda-katae reke! Peho amy ty boda-katae reke!”
22 Le nirehake fagnitelo’e ty Pilato tie: “Fa nagnino? Ino ty raha raty natao’e? Tsy treako ty anto’e toko’e hamonoagne aze. Hosazeako areke reke, le hovotsorako.”
23 Faie nizizo iareo sady vao mainke nikorakorake mafe tie tsy maintsy vonoegne reke,
24 hafarà i Pilato nanapa-kevetse tie hotanterahe’e i fangataha iareoy.
25 Nivotsora i Pilato areke i lahilahy nigadraegne satria nanohetse fanjakagne naho namono ndaty nangatahe iareoy, fa i Jesosy natolo’e iareo mba hanoa iareo ze raha tea iareo hatao ama’e.
26 Naho fa nindese iareo ty Jesosy, le nitrea iareo ty Simona te Kirena. Boake ambanevohitse agne reke tamy izay. Nisakana iareo reke, le niforeseva iareo mba hinday i hazo fijalea i Jesosỳ sady hagnorike aze boake afara’e ao.
27 Maro ka ty ndaty nagnorike aze, agnisa izay i ampela nijerajera ty aragna’e noho ty alahelo iareo sady nitagny aze rey.
28 Le nitolike tamy i ampela rey agne ty Jesosy sady hoe reke: “O ry anak’ampela i Jerosalema, ko tomagny ahy sasa nareo, fa ty vata’areo naho ty ana’areo ro itagnio’areo,
29 satria ho avy ty andro hirehafa o ndatio tie: ‘Sambatse ty ampela betsiterake, ty troke mbe lia’e naho nisy ajaja vaho ty nono mbe tsy ninonoan’ajaja!’
30 Hirehake amo o vohitseo iareo tie: ‘Mitontà ama’ay!’ Le amo o haboagneo tie: ‘Rakofo zahay!’
31 A naho izay ty atao iareo amy i hataey mbe legney, ino ty hanjò aze naho fa maike reke?”
32 Nisy malaso roe lahy rezay ka nindesegne mba hovonoegne miarake ama’e.
33 Naho fa niavy amy i toeragne atao tihoe Karakan-doha zay eo iareo, le nipehe iareo tamy ty boda-katae ty Jesosy naho i malaso roe lahy rey. Le ty malaso raike natao iareo tankavana i Jesosy eo, fa ty raike tankavia’e eo.
34 Faie hoe ty Jesosy tamy izay: “O Baba, mamelà ty fahotà iareo satria tsy fanta iareo ty raha atao iareo.” Nanao kitsapake ka i maramila rey mba hahafantaragne tie ia ty hahazo i akanjo’ey.
35 Le nitsangagne teo i vahoakey mba hagnente ze raha miseho. Fa i ndaty manam-pahefagne rey nitsikike i Jesosy sady nirehake tihoe: “Ty ndaty hafa navota’e. Naho toe ie vata’e i Kristy jinobon’Agnaharey, le toko’e havota’e ka ty tegna’e.”
36 Ndra i maramila rey ka aza nitsikike aze, le nandeha mbama’e mbeo sady nagnomey divay makira aze.
37 Nirehake iareo tie: “Naho toe ihe vata’e ty Mpanjaka o Jiosio, le vonjeo ty vata’o.”
38 Nisy soratse hoe izao ka ty tambone’e teo: “Intoy ty Mpanjaka o Jiosio.”
39 Le nanomboke nanivetive aze ty raike amy i malaso nahantogne tagnila’e teoy tie: “Ataoko ihe o Kristio? Vonjeo areke ty vata’o, le vonjeo ka zahay!”
40 Le nendaha i malaso faharoe’ey reke tie: “Le mbe tsy matahotse an’Agnahare avao v’iheo kahe, ie amy izao rehe voaheloke manahake aze?
41 Itika anio rare’e naho izao ty raha manjò antika satria vale ty raha nataontikagne zao. Fa o lahilahy iohoe tsy nanao raha raty.”
42 Hoe reke tamy i Jesosy naho fa niavy eo: “O Jesosy, tsiarovo raho naho fa avy amy i Fanjakà’oy ao rehe.”
43 Le hoe ty Jesosy tama’e: “Volagneko ama’o androany, fa hiarake amako amy i Paradisay agne rehe.”
44 Dizera mena i androy tamy izay faie le naiegne i taney iaby hatrake amy telo folakandro* eo ho eo,
45 satria tsy niboake i masoandroy. Nizara roe agnivo’e eo ka i ridò tamy i tempolỳ aoy.
46 Le nitoka mafe an-dRae’e ty Jesosy nanao tihoe: “O Baba, ankineko ama’o ty fiaiko.”* Naho fa boake nirehake izay reke, le nimate.
47 Naho fa nahatrea izay i maramila manam-boninahitsey, le nagnomey voninahitse an’Andrianagnahare sady nirehake tihoe: “Ndaty maregne vata’e ty lahy tia!”
48 Naho fa nahatrea i raha niseho rey i vahoake teo rey, le nandeha noly tamy ty alahelo’e.*
49 Fa ze ndaty nahafantatse aze nitsangagne lavidavitse tey. Agnisa izay i ampela nagnorike aze boake a Galelia agne naho nahatrea ze raha niseho teo rey.
50 Nisy lahilahy atao Josefa zay agnisa ty Fitsaragne Ambone o Jiosio. Ndaty maregne naho soa fagnahy reke.
51 (Tsy nanohagne ty hevetse raty natao iareo* mba hamonoagne i Jesosy o lahilahy iohoe.) Boake a Arimatia agne reke. A Jodia agne ty misy o tanàgne iohoe. Nandigne i Fanjakàn’Andrianagnaharey ty Josefa.
52 Nandeha amy i Pilato agne o lahilahy iohoe mba hangatake i fate i Jesosỳ.
53 Nazotso’e areke i fate i Jesosỳ, le nifognose’e tamy ty lamba rongony tena fanjaka. Le naleve’e tamy ze kibory lamilamy nilavahagne zay ao reke. Mbe tsy nandevegnagne o kibory iohoe.
54 Andro fiomanagne tamy izay sady fa hanomboke ka i Sabatay.
55 Faie i ampela nagnorike aze boake a Galelia agne rey nandeha an-kibory agne mba hagnente ty fomba nametrahagne i fate i Jesosỳ.
56 Le noly iareo mba hagnomagne raha magnitse naho menake magnitse. Faie azo antoke fa nitofa iareo tamy i Sabatay, satria izay ty nitaké i Lalànay.
Fagnamarehagne ambane peje
^ Ndra: “tsy nahatoboke.”
^ Abt: “tamy ty lera fahaenegne hatrake tamy ty lera fahasive.”
^ Abt: “fagnahiko.”
^ Abt: “nijerajera ty tratra’e.”
^ Ty ila’e amo o ndaty agnisa ty Fitsaragne Ambone Jiosio ty teagne horehafegne.
