Talily Soa Nisorate i Lioka 5:1-39
5 Tie indraike zay, le nifanisike tamy i Jesosy eo o ndatio mba hitsanogne i saontsin’Agnahare nirehafe’ey. Nitsangagne ta moro i antara i Genesaretay eo reke tamy izay.
2 Nahatrea lakagne roe ta moro i ranoy eo reke. Tsy nisy ndaty ty tao, satria nanasa i harato iareoy i mpagnarato rey.
3 Nijogne tamy ty raike amy i lakagne rey reke, le i laka i Simonay. Nirehafe’e ty Simona mba hampikisake i lakagney kedekede mbagnate i ranoy mbeo. Nitoboke tagnate lakagne ao ty Jesosy naho fa niavy eo, le nanomboke nampianatse i vahoakey.
4 Ie naho fa nivita i fampianara’ey, le hoe reke tamy i Simona: “Andao tika ho agnate’e ey, le atoraho i harato’areoy naho fa avy ey.”
5 Faie hoe ty navale i Simona aze: “O Mpagnanatse, fa nagnarato tey avao zahay lia’e aniankale faie tsy nahazo raha ndra raike. Faie hatorako avao i haratokoy noho ze reha’o zay.”
6 Naho fa norihe iareo i reha i Jesosỳ, le nahazo fiagne maro iareo. Fa ho niriatse iaby aza i harato iareoy.
7 Nanao fihetseke areke iareo mba hitokavagne i nama iareo rey hagnampe iareo. Naho fa niavy iareo, le sambe nifenoe iareo fiagne i lakagne roe rey, hafarà i lakagne rey fa ho nilenteke.
8 Naho fa nahatrea izay ty Simona Petera, le nanongaleke tamy i Jesosy eo sady nirehake tie: “Tsy fagneva ty hiharine azo raho Tompo, satria ndaty mpanota.”
9 Ty anto’e, nigaga reke naho i nama’e rey noho ty hamaro ty fiagne niazo iareo.
10 Nahatsapa hoe izay ka ty Jakoba naho i Jaona mpiara-miasa amy i Simona. Ana-dahy i Zebedio iareo roe lahy. Faie hoe ty Jesosy tamy i Simona: “Ko matahotse fa manomboke amy izao, le ndaty velogne ro hoharatoe’o.”
11 Niheregne a moro’e ey areke iareo. Nenga iareo iaby ze kila raha, le nagnorike i Jesosy iareo.
12 Naho fa niavy tamy ze tanàgne raike zay ao ty Jesosy, le nisy lahilahy raike feno habokagne* zay ty tao. Naho fa nahatrea i Jesosy reke, le nimbama’e mbeo. Niankohoke tagnatreha’e eo reke sady nihalale ama’e tie: “O Tompo, vita’o ty magnalio ahy, le mba liovo raho naho zoto’o.”
13 Le nitsapae i Jesosy i lahilahỳ sady hoe reke: “Zotoko zay! Maliova rehe.” Teo naho eo avao, le avy le niliove’e i habokagne nahazo azey.
14 Rinara i Jesosy i lahilahỳ mba tsy hitalily ndra amy ia ndra amy ia, faie nirehafe’e ka reke tie: “Fa malio ihe hinaneo, le akia mandehana amo o mpisorogneo agne, le manoa fagnatetse arake i nandilia i Mosesỳ, soa tie hotrea iareo tie fa sitragne vata’e rehe.”
15 Faie ndra vao mainke niely ty laza’e, hafarà o ndatio nimbama’e mbeo mba hitsanogne aze naho mba hositragne’e.
16 Ndra tie teo zay, le mateteke reke ro nandeha tamy ty toeragne mitokagne mba hivavake.
17 Ie tie indraike zay, tamy i Jesosy nampianatse o ndatioy, le nisy Fariseo naho mpampianatse lalàna boake amy ty tanà i Galelia naho i Jodia vaho boake a Jerosalema agne ka nitsanogne aze teo. Nimea i Jehovah hery reke mba hagnasitragne ze marare.
18 Nisy lahilahy raike maleme zay nente o ndatio tamy ty fandreagne. Nitea iareo hoentegne tamy i Jesosy eo i lahilahỳ.
19 Faie tsy nahatrea lalagne mba handehanagne mbamy i Jesosy mbeo iareo noho ty hamaro i ndatỳ, hafarà’e iareo nanganike tambone tafo tragno ao. Niloaha iareo i tafo-tragnoy, le eo ty nanjotsoa iareo i lahilahy mararey tamy i fandreagne nisy azey mba ho amy i Jesosy eo.
20 Naho fa nahatrea ty finoa iareo ty Jesosy, le hoe reke: “O kahe, voavela ty fahota’o.”
21 Le nifampirehake o mpampianatse lalànao naho o Fariseò tie: “Ty lahy ia ka ty manivetive an’Agnahare tiao? Ia ty ndaty afake mamela heloke ankoatse an’Agnahare?”
22 Faie nihay i Jesosy ze eretsere iareo zay, le hoe reke tamy iareo: “Nagnino nareo ro mieretseretse hoe izay?
23 Ty aia ty mora, ty mirehake tihoe ‘voavela ty fahota’o’ vao sa ty mirehake tihoe ‘mitsangana, le akia mandehana’?
24 Fa mba hahafantara’areo tie managne fahefagne hamela heloke an-tane etoy i Ana o ndatỳ...”, le hoe reke tamy i lahilahy malemey: “Mitsangana rehe, le andeso o fandrea’ò, le molia an-tragno’o agne.”
25 Nitsangagne areke i lahilahỳ, le nente’e i fandrea’ey. Nandeha noly reke sady nagnomey voninahitse an’Agnahare.
26 Tena nigaga areke i ndaty teo iaby rey, le nagnomey voninahitse an’Agnahare. Izao ty raha nirehafe iareo noho ty halatsà iareo: “Mbe tsy nahatrea raha fanjaka hoe izao indraike tika!”
27 Nandeha ty Jesosy tafara izay, le nahatrea lahilahy raike nitoboke tamy i birò famoriagne hetray ao. I Levy ty agnara’e. Le hoe reke tama’e: “Andao hagnorike ahy.”
28 Nenga i Levy eo iaby ze kila raha, le nitsangagne reke sady nandeha nagnorike i Jesosy.
29 Le nagnomagne fete bey hoahy i Jesosy an-tragno’e agne ty Levy. Nisy mpitake hetra maro naho ndaty hafa ka niavy tao, le niarake nihinagne tamy iareo.
30 Naho fa nahatrea izay o Fariseò naho o mpampianatse lalànao, le nigneogneogne tamy i mpiana i Jesosy rey tie: “Nagnino nareo ie mihinagne naho miarake minogne divay amo o mpitake hetrao naho o mpanotaò?”
31 Le hoe ty navale i Jesosy iareo: “Tsy ty ndaty salama ro mipay dokotera fa ty ndaty marare.
32 Tsy niavy mba hitoka ty ndaty maregne raho, fa o mpanotao mba hibebake.”
33 Hoe iareo tamy i Jesosy: “Mifaly hanegne mateteke naho manao vavake fihalaleagne mateteke o mpiana i Jaonao naho ty mpiana o Fariseò, fa o azò mifanehake ty fihinagne naho ty finogne divay avao.”
34 Le hoe ty Jesosy tamy iareo: “Tsy hovita’areo ty hampifaly hanegne ty nama i mpagnengay naho mbe amy iareo eo i mpagnengay, sa akore hoe nareo?
35 Faie ho avy ty andro hampialagne i mpagnengay tsy ho amy iareo eo, le amy ze andro zay iareo ro hifaly hanegne.”
36 Nirehake fagnoharagne tamy iareo ka reke. Hoe reke: “Tsy misy ndaty hangalake tapa-damba vaovao mba hanakefagne vorodea. Satria naho izay ty atao’e, le horirite i tapa-damba vaovaoy i vorodeay sady toe tsy hifagneva amy i tapa-damba vaovaoy ka i vorodeay.
37 Tsy misy ndaty ka hagniligne divay vaovao amy ty siny holitse fa voroke, satria naho izay ty atao’e, le horiatse i siny holitsey, le i divaỳ ka hirarake an-tane eo.
38 Fa tsy maintsy siny holitse vaovao ro hisiagne divay vaovao.
39 Naho misy ndaty raike minogne divay fa ela, le tsy hipay divay vaovao. Ty anto’e, hoe i ndatỳ: ‘O divay fa elao ro soa.’”
Fagnamarehagne ambane peje
^ Ndra: “angamae.”
