Talily Soa Nisorate i Marka 13:1-37
13 Naho fa niakatse boake amy i tempolỳ ao reke, le hoe ty raike tamy i mpiana’e rey tama’e: “O Mpagnanatse, henteo moa ty hasoa ty vato rey ronegne naho ty hasoa ty tragno amy i tempolỳ ao!”
2 Faie hoe ty Jesosy tama’e: “Trea’o o tragno fanjaka rehoe? Hahomake iaby reo sady tsy hisy vato hifanongoa ndra raike.”
3 Tamy iareo nitoboke nanandrife i tempolỳ tamy i Vohitse Olivay eoy, le nagnontane aze mitokagne ty Petera, i Jakoba naho i Jaona vaho i Andrea.
4 Hoe iareo: “Ambarao anay tie ombia ty hisehoa ze raha rezay, le ino ty ho famantaragne tie fa marine ty handravàgne o raha rehoe?”
5 Le hoe ty Jesosy tamy iareo: “Mitaoa nareo mba tsy ho voafitake.
6 Maro ty ho avy amy ty agnarako, le hirehake tihoe: ‘Izaho o Kristio’, le maro ty ho voafita’e.
7 Ankoatse izay, le ko matahotse nareo naho fa maharey aly naho talily miomba ty aly. Tsy maintsy hiseho o raha rehoe, faie mbe tsy ho avy i fara’ey.
8 “Hisy firenena hanafike firenena, le hisy fanjakagne hialy amy ty fanjakagne. Hisy horohoron-tane amy ty tane sambe hafa agne, le hisy hakeré ka. O raha rehoe ty ho fanomboha i haoreagney.
9 “Faie inareo mivognona avao. Hanolotse anareo amo o fitsaragneo ey o ndatio, le hojerae iareo amy i sinagoga iareoy ao naho hoente iareo amo o governorao vaho amo o mpanjakao agne nareo. Faie amy izay nareo, le ho afake hirehake amy iareo ty raha inoa’areo.
10 Ankoatse izay, le hotoriegne amy ty firenena iaby hey i talily soay.
11 Naho fa tsepahe iareo ka nareo, le ko minekoneko amy ty raha horehafe’areo. Fa ze raha homey i fagnahy masigney anareo amy ze lera zay ro rehafo’areo. Ty anto’e, tsy inareo ro mirehake fa i fagnahy masigney ro mirehake amy ty alala’areo.
12 Hisy ndaty ka hanolotse ty rahalahi’e mba hovonoegne, le ty rae hanolotse ty ana’e mba hovonoegne, le ty anake hanohetse ty rae’e naho ty rene’e sady hampamono iareo.
13 Hoheje ze kila ndaty iaby ka nareo noho ty agnarako. Faie ze miaretse hatrake am-para’e ro ho voavonje.
14 “Faie naho fa trea’areo amy i toeragne tsy toko’e hisy azey ao, i raha mampangorìgne mahavy faharavagney (mandineha soa ze mamaky io), le ao ze ndaty a Jodia ao hilay am-bohitse agne.
15 Ao ka ze ambone tafo-tragno ao tsy hizilike an-tragno’e ao mba hangalake raha ao naho fa mizotso.
16 Le ao ze ndaty an-teteke agne tsy holy hey mba hangalake raha an-tragno’e agne, ndra ty akanjobei’e aza.
17 Loza ty hanjò ty ampela mivesatse naho ze mampinono amy ze andro zay!
18 Mivavaha lognandro ka mba tsy ho amy ty andro asotry ty hisehoa ze raha rezay.
19 Ty anto’e, amy ze andro zay, le hisy haoreagne mbe tsy nisy nanahake aze nanomboke tamy ty namorognan’Agnahare o ndatio hatrake amy izao sady tsy hisy sasa ka.
20 Naho tsy nihafoheze i Jehovah aza ze andro zay, le tsy hisy ndaty ho voavonje. Faie noho ty amo o ndaty jinobogneo, le nihafoheze’e ze andro zay.
21 “Naho misy ndaty ka areke mirehake ama’areo tie: ‘Itia ty Kristy,’ ndra, ‘Aroa ty Kristy,’ le ko inoagne.
22 Ty anto’e, hisy Kristy sandoke naho mpaminany sandoke ho avy, le hanao famantaragne naho fahagagagne mba hitarihagne o ndatio amy ty lalan-diso. Ndra o ndaty jinobogneo ka aza va’e mbe ho voatary iareo.
23 Mitaoa areke nareo satria fa nambarako anareo mialoha ze kila raha.
24 “Faie afara i haoreagne amy ze fotoagne zaỳ, le haiegne i masoandroy, tsy hagnomey hazavagne i volagney,
25 vaho hopoke boake an-dagnitse ey o vasiagneo. Hohezegnezegnegne ka ty hery i lagnitsey.
26 Hotrea iareo amy i rahogney ey ka i Ana o ndatỳ sady ho avy amy ty heri’e lahibey naho ty voninahi’e.
27 Le hagnirake o anjeli’eo reke mba hamory o ndaty jinobogne boake amy ty tane toy iabio,* naho boake amy ty fara ty tane toy agne hatrake amy ty fara i lagnitsey agne.
28 “Mandrambesa lesogne boake amo o fihamio.* Naho vaho misy rave’e mitiry ty amy i sampa’e miboakey eo, le hai’areo fa ho avy i asaray.
29 Hoe izay ka fa naho fa mahatrea i raha iaby rey nareo, le fantaro fa marine reke sady fa an-dalagne eo.
30 Volagneko ama’areo,* fa tsy hofoagne ty taranake toy, amparake ty hisehoa ze raha zay iaby.
31 Hofoagne i lagnitsey naho ty tane toy, fa ty raha rehafeko tsy ombia hofoagne.
32 “Tsy misy mahay ty andro naho ty lera hiavia ze raha zay, ndra o anjely an-dagnitse agneo ndra i Anakey naho tsy i Rae raike avao.
33 Miambena naho mifohaza avao satria tsy hai’areo tie ombia ty hiavia i fotoagne fa tinondroy.
34 Manahake ty lahilahy raike nandeha an-tane hafa agne zay. Nagnomey fahefagne ty mpanompo’e mba hikarakara i tragno’ey reke. Nagnomey asa iareo tsikiraidraike ka reke sady nandily i mpiambegne vavahadỳ mba hiambegne lognandro.
35 Miambena lognandro areke satria tsy fanta’areo tie ombia ro ho avy i tompon-tragnoy. Tsy hay reke ndra ho avy takariva, ndra vakimira halegne, ndra kekeo akoho, ndra maraindray bey tsikiake.
36 Amy izay naho avy tampoke reke, le tsy hozoe’e miroro nareo.
37 Faie ty raha rehafeko ama’areo toy, le tsy ho anareo avao fa hoahy ze kila ndaty: Miambena lognandro.”
Fagnamarehagne ambane peje
^ Abt: “boake amy i tioke efatsey.” Ty teagne horehafegne le i tioke boake avaratse, atignanagne, atimo naho ahandrefagney.
^ Ndra: “aviavio.”
^ Abt: “Volagneko ama’areo to vata’e.”
