Talily Soa Nisorate i Marka 5:1-43
5 Le nitoly amy ty faritse misy o Gerasianao ey iareo.
2 Naho vaho nizotso boake agnate lakagne ao ty Jesosy, le nifanampe tamy ze lahilahy raike misy demonia boake an-kibory ey zay,
3 satria tey ty nisy aze. Tsy nisy ndaty nahavita nandrohy aze tamy izay, ndra tamy ty seny aza.
4 Mateteke nirohizagne seny ty tombo’e naho ty tagna’e, faie lava tapatapahe’e avao i seny narohy aze rey. Tsy nisy ndaty ka nahavita nitagne aze.
5 Ndra handro reke ndra halegne, le mandehandeha an-kibory ey naho am-bohitse ey avao, le mikorakorake sady rasarasae’e amy ty vato ty vata’e.
6 Faie naho vaho nahatalake i Jesosy reke, le nilay mbama’e mbeo sady niankohoke tagnatreha’e eo.
7 Ie naho fa niavy eo, le nikorakorake mafe reke sady nanao tihoe: “O Jesosy, Ana i Andrianagnahare Fara’e Amboney, ino ty idira’o amy ty aferako? Mifantà aman’Agnahare rehe fa tsy hampijale ahy.”
8 Nirehake izay i lahilahỳ satria hoe ty Jesosy tamy i demoniay: “Miakara boake amo o lahilahy iohoe ao rehe.”
9 Faie nagnontenea i Jesosy reke tie: “Ia ty agnara’o?” Le hoe reke: “I Legiona ty agnarako, satria maro zahay.”
10 Le nihalale mafe tamy i Jesosy reke mba tsy handroahagne iareo hiala i faritsey.
11 Nisy lambo maro narazegne rezay ty narine i vohitsey teo.
12 Nihalale tamy i Jesosy i demonia rey tie: “Mba engao hizilike amy ty lambo rey ronegne ey zahay!”
13 Neke i Jesosy ze fangataha iareo zay. Le avy le niakatse areke i demonia rey, le nizilike tamy i lambo* rey ao. Nirifatse ty lay i lambo rey, le nitonta tamy ty hantsagne, sady nimatemate tan-driake agne. Nisy 2 000 eo ho eo ty isa i lambo rey.
14 Faie nilay i mpiara-dambo rey, le nitalily ze raha zay tamy ty ndaty tan-tanàgne ao naho tamy ty faritse nagnodidigne ey. Le niavy o ndatio mba hagnente ze raha zay.
15 Nandeha mbamy i Jesosy mbeo iareo, le nahatrea i lahilahy nisy demonia maroy. Nitoboke i lahilahỳ tamy izay, le fa niakanjo sady fa niaregne ka ty sai’e. Le nanjare natahotse i ndaty rey.
16 Ze nahatrea ty raha niseho tamy i lahilahy nisy demoniay naho i tamy i lambo reỳ ka, le nitantara izay tamy iareo.
17 Nihalale tamy i Jesosy areke iareo mba hiala i faritse misy iareoy.
18 Naho fa nijogne agnate lakagne ao ty Jesosy, le nangatake ama’e i lahilahy nisy demoniay mba hiarake ama’e.
19 Faie tsy nimete ty Jesosy fa izao ty nirehafe’e tamy i lahilahỳ: “Akia rehe molia, le tantarao amy ty longo’o ze raha iaby natao i Jehovah ho azo naho ty famindram-po naseho’e tama’o.”
20 Le nandeha i lahilahỳ sady natalili’e ty ndaty ta Dekapolisy agne ty raha iaby natao i Jesosy tama’e, le nilatsa i ndaty rey iaby.
21 Le nandeha tamy i lakagney ty ry Jesosy mba ho a moro’e raike eroy. Ie iareo naho fa narine ho nitoly, le fa nisy ndaty maro nivory ty ta moron-driake ey.
22 Nisy mpifehe sinagoga zay niavy boake agne. I Jairo ty agnara’e. Naho fa nahatrea i Jesosy reke, le niankohoke tan-tombo’e eo,
23 sady nihalale tama’e tie: “Marare mafe ze anak’ampelako zay. Ajafady, andao rehe mba hametra-tagnagne ama’e amy izay reke ho sitragne fa tsy ho mate.”
24 Le nandeha niarake tamy i Jairo ty Jesosy. Nagnorike aze ka i ndaty maroy sady nifanisike tama’e teo.
25 Nisy ampela raike niazo ty lio lava tagnate ty 12 taogne zay ka tamy izay.
26 Maro ty dokotera fa nitsabo aze faie ndra nampijale aze ty fitsaboagne natao iareo. Fa nilany nitsaboagne aze iaby ka ty fanagna’e faie tsy mba nihasoa ty fahasalama’e fa ndra vao mainke niharaty.
27 Naho fa naharey ty miomba i Jesosy reke, le nandeha boake afara i Jesosy ao tagnate i ndaty maroy ao. Le nitsapae’e i akanjo i Jesosỳ,
28 satria hoe avao reke: “Ndra i akanjo’ey avao aza ro tsapaeko, le hositragne raho.”
29 Le avy le nijanogne i lio nandeha tama’ey le nitsapa’e ka tie nisitragne tamy i aretem-bey nahazo azey reke.
30 Le avy le nitsapa i Jesosy tie nisy hery niala ty tama’e, le nitolike reke sady nagnontane tihoe: “Ia o nitsapa i akanjokoio?”
31 Faie hoe ty navale i mpiana’e rey aze: “O ndaty maro trea’o mifanisike ama’o eò vao, le mbe magnontane rehe tie: ‘Ia o nitsapa ahio?’”
32 Faie le mbe nitolitolike avao ty Jesosy mba hahatreava’e tie ia o nitsapa azeo.
33 Naho fa nahay ty raha niseho tama’e i ampelay, le natahotse sady nihondrahondra. Le nandeha mbamy i Jesosy mbeo reke sady niankohoke tagnatreha’e eo. Nambara’e aze iaby ka ty maregne.
34 Le hoe ty Jesosy tamy i ampelay: “Ty finoa’o ro nahasitragne azo anake. Akia mandehana, le ko minekoneko sasa satria fa sitragne amy i aretegne nampijale azoy rehe.”
35 Tamy i Jesosy mbe nirehakey, le nisy lahilahy boake an-tragno i mpifehe sinagogay agne niavy teo sady nirehake tihoe: “Fa nimate anio i anak’ampela’oy, le ino ka ty mbe anahiragna’o o Mpagnanatseo?”
36 Faie nirey i Jesosy ze reha iareo zay, le hoe reke tamy i mpifehe sinagogay: “Ko matahotse, fa managna finoagne avao.”
37 Tsy nisy ndaty nenga i Jesosy hagnorike aze, ankoatse i Petera naho i Jakoba vaho i Jaona rahalahy i Jakoba.
38 Ie iareo niavy an-tragno i mpifehe sinagogay agne, le nahatrea ndaty nitabataba naho nangoihoy ty tagny ty Jesosy.
39 Naho fa nizilike iareo, le hoe reke tamy i ndaty rey: “Nagnino nareo ro mangoihoy ty tagny naho mitabataba hoe izao? Tsy raha mate o ajajao fa miroro.”
40 Le nihehea iareo ty Jesosy. Naho fa boake nampiakatse i ndaty rey ty Jesosy, le nente’e amy ty toeragne nisy i ajajay agne ty Jairo mirovaly naho i mpiana’e nente’e niarake ama’e rey.
41 Le nirambese’e ty tagna i ajajay naho fa niavy eo, le hoe reke tama’e: “Talita komy.” Izao ty dika o rehake iohoe: “O pelake, hoe raho ama’o tie: ‘Mifohaza!’”
42 Le avy le nitsangagne i somondraray, le nanomboke nandeha. (Roe amby folo taogne reke tamy izay.) Tsy nisy hoe’e ty hafalea i rae aman-drene’e rey naho fa nahatrea izay.
43 Faie rinara’e mafe iareo mba tsy hirehadrehake ty miomba izay amo o ndatio. Nirehafe’e ka iareo mba hagnomey hanegne i ajajay.
Fagnamarehagne ambane peje
^ Ndra: “kosogne.”
