Talily Soa Nisorate i Marka 6:1-56
-
Tsy nihajae ty ndaty boake amy i tane niavia’ey ao ty Jesosy (1-6)
-
Nimeigne toromareke i 12 lahy rey naho fa nirahegne hitory (7-13)
-
Nimate ty Jaona Mpanao Badisa (14-29)
-
Nagnomey hanegne ndaty 5 000 ty Jesosy (30-44)
-
Nandeha ambone rano ey ty Jesosy (45-52)
-
Fagnasitragnagne ta Genesareta tao (53-56)
6 Naho fa niala ty eo reke, le nandeha amy i tane nahabey azey agne. Niarake tama’e ka i mpiana’e rey.
2 Ie naho fa niavy i Sabatay, le nanomboke nampianatse tamy ze sinagoga zay ao reke. Le nigaga ty ankamaroa ty ndaty nitsanogne aze sady nirehake tie: “Boake aia ty nianara o lahio ze o raha zao iaby? Ia ty nagnomey aze ze hilala zay naho ty nagnomey hery aze mba hahavita’e hanao fahagagagne?
3 Tsy i lahy mpandrafitsey v’iò, i ana-dahy i Mariay? Tsy i rahalahy i Jakoba naho i Josefa vaho i Jodasy naho i Simonay v’iò? Tsy amantikagne eto iaby avao ka vao i zai’e ampela rey?” Tsy nimete nino aze areke iareo.
4 Faie hoe ty Jesosy tamy iareo: “Amy ty tane niavia’e naho amy ty longo’e vaho an-tragno’e ao avao o mpaminanio ro tsy hajaegne.”
5 Tsy nanao fahagagagne maro teo sasa areke ty Jesosy, fa ze marare tsiampe teo rezay avao ro nametraha’e tagnagne naho nisitràgne’e.
6 Tena nigaga ty Jesosy noho ty tsy finoa iareo aze. Faie ndra tie teo zay, le nandeha nampianatse tamy ty tanàgne magnodidigne ey reke.
7 Nitokave’e i apostoli’e 12 rey, le nirahe’e tsikiroedroe sady nimea’e fahefagne mba handroake demonia.
8 Nandily iareo ka reke mba tsy hinday ndra inogn’ino, ndra mofo zay, ndra kitapo fisiagne hanegne ndra vola* fa le fa fitognogne
9 naho kapa avao. Nirehafe’e ka iareo mba tsy hinday akanjo roe.
10 Hoe ka reke tamy iareo: “Ndra aia ndra aia tragno idira’areo, le mijanogna ao amparake ty ialà’areo i toeragney.
11 Le ndra aia ndra aia ka toeragne tsy mandrambe anareo, ndra tsy mitsanogne anareo, le mialà boake ao sady ahitsagno ty lemboke amy ty tombo’areo mba ho vavolombelogne amy iareo.”
12 Nandeha iareo naho fa niavy eo, le nitory tamo o ndatio tie toko’e hibebake iareo.
13 Nandroake demonia maro ka iareo, le nihosora iareo menake oliva ze narare sady nisitràgne iareo.
14 Nirey i Heroda Mpanjaka zay, satria ze kila ndaty le nirehake miomba i Jesosy iaby. Nirehake o ndatio tie: “Nivelomegne amy ty mate ty Jaona Mpanao Badisa, le izay o ahavita’e manao fahagagagneo.”
15 Fa ty ila’e nirehake tihoe: “I Elia zay.” Le nisy ka ty nanao tihoe: “Mpaminany manahake i aze taloha rey avao zay.”
16 Faie hoe ty Heroda naho fa naharey izay: “I Jaona zay. I nitapaheko ty loha’ey. Ie o nivelogne indraikeo.”
17 Ty anto’e, taloha izay ty Heroda, le nagnirake ndaty mba hitsepake i Jaona naho hampigadra aze am-pirizò agne, noho ty amy i Herodiasy. Valy i Filipo rahalahi’e ty Herodiasy faie nivalie’e.
18 Mateteke ty Jaona ro nirehake tamy i Heroda tie: “Naho i lalànay ro henteagne, le tsy azo’o valiegne o valy i rahalahi’oy io.”
19 Nitagne am-po tamy i Jaona avao areke ty Herodiasy sady nitea’e hovonoegne ka reke, faie tsy niafake nanao izay reke.
20 Ty anto’e, natahora i Heroda ty Jaona, satria nihai’e tie ndaty maregne naho ndaty masigne reke. Narova’e ka ty Jaona. Isake tie nitsanogne aze ty Heroda, le tsy nihai’e ty hatao’e, satria tena nahafinaritse aze ty nitsanogne aze.
21 Faie nisy andro raike zay tena nahafaha i Herodiasy nagnatanterake i fagniria’ey. Nankalaza ty andro niterahagne aze ty Heroda tamy izay, le nagnomagne hanem-bey reke sady nasae’e o manam-pahefagne amboneo naho o mpitari-tafikeo vaho ty ndaty ambone ta Galelia ao.
22 Le nizilike ze anak’ampela i Herodiasy zay sady nandihy.* Nitea i Heroda naho i ndaty nasae’e rey ty nidihy i somondraray. Le hoe i mpanjakay tamy i somondraray: “Angataho amako ze raha tea’o fa homeako azo.”
23 Nanao vava tamy i somondraray aza reke tie: “Ndra inogn’ino raha angatahe’o, le homeako azo, ndra ty an-tsasa o fanjakàkò aza.”
24 Niakatse i somondraray le nirehake taman-drene’e tie: “Inogne ty raha toko’e hangataheko?” Le hoe ty rene’e: “Ty loha i Jaona Mpanao Badisa.”
25 Le avy le nandeha malaky mbamy i mpanjakay mbeo reke, sady nirehake tihoe: “Teako naho le avy le omei’o ahy amy izao agnate finga ty loha i Jaona Mpanao Badisa.”
26 Tena nalahelo i mpanjakay naho fa naharey izay, faie tsy afake nandietse i fangataha i somondraraỳ ka reke, noho i vava natao’e tagnatreha i ndaty nasae’e rey teoy.
27 Le avy le nagnirake mpiambegne areke i mpanjakay mba hanapake ty loha i Jaona sady hinday aze amy ty finga ama’e eo. Le nandeha nanapake ty loha i Jaona am-pirizò agne i mpiambegney
28 sady ninday aze tamy ty finga. Le nimea’e i somondraray i lohay, le i somondraray ka nagnomey aze an-drene’e.
29 Naho fa nirey i mpiana i Jaona rey ze raha zay, le niavy iareo mba hangalake i fate’ey sady nandevegne aze.
30 Naho fa niheregne i apostoly rey, le nitantarae iareo tamy i Jesosy iaby ty raha natao iareo naho nampianare iareo.
31 Hoe reke tamy iareo naho fa niavy eo: “Andao tika hamonje toeragne bangigne, le mitofàtofà nareo.” Ty anto’e, maro ty ndaty nifandimbelimbe niavy tamy iareo eo, le ndra ty fotoagne ho nitofà iareo naho ho nihinana iareo aza tsy nisy.
32 Nijogne agnate lakagne ao areke iareo, le namonje toeragne bangigne.
33 Faie nitrea o ndatio ty nandehana iareo sady nihay ty ankamaroa iareo ka ty tane homba iareo, hafarà’e ze ndaty boake amy i tanàgne rey eo nilay aloha amy i toeragne handehana iareoy agne, le iareo ty niavy aloha.
34 Naho fa nizotso boake agnate lakagne ao ty Jesosy, le nahatrea i ndaty maroy. Niferegnesa’e iareo satria nanahake o agnondry tsy misy mpiarakeo, le nanomboke nampianatse iareo raha maro reke.
35 Ie nifolakandrokandro i androy, le nimbama’e mbeo i mpiana’e rey sady nirehake tie: “Mitokagne ty toeragne toy sady fa ho hariva ka i androy.
36 Magnino naho ravà’o agne o ndatio mba holia’e hipaliava iareo toeragne naho tanàgne hiviliana iareo hanegne?”
37 Le hoe ty navale i Jesosy iareo: “Meo’areo raha hohane’e iareo.” Le hoe iareo tama’e: “Toko’e handeha hivily mofo vilina 200 denaria vao zahay mba homeagne ty ndaty retoa? Faie ndra izay anio tsy hahampe iareo!”
38 Le hoe reke tamy iareo: “Managne mofo fire nareo? Akia henteo’areo hey zay.” Naho fa boake nagnente aze iareo, le nirehake tie: “Mofo dime, le misy fiagne roe ka.”
39 Le nirehafe i Jesosy i ndaty maroy mba hitoboke amy i ahetsey eo.
40 Nitambatse tsiki-100 naho tsiki-50 iareo.
41 Nalae i Jesosy i mofo dimey naho i fiagne roey naho fa niavy eo, le niandrandra i lagnitsey reke sady nivavake. Nitapatapahe’e i mofo rey tafara izay, le nimea’e i mpiana’e rey, le i mpiana’e rey ty nizara aze tamy i ndaty rey. Nizarae iareo ka i fiagne rey.
42 Nihinagne areke iareo iaby, le nivontsy.*
43 Le navory iareo ty sisa tsy lany tamy i mofoy naho i fiagney. Nahafeno 12 vaha ty sisa i mofoy.
44 Lahilahy 5 000 teo ho eo ty nihinagne tamy i mofoy.
45 Le avy le nampijogne’e agnate lakagne ao i mpiana’e rey, le nampandehane’e ta moro i Betsaida ey, fa ireke mbe nampoly i vahoakey.
46 Naho fa boake nanao veloma iareo reke, le nandeha am-bohitse agne mba hivavake.
47 Ie naho fa nihariva i androy, le fa tagnivo i riakey ey i lakagney fa ireke mbe tamy i toeragne nisy azey agne avao.
48 Naho fa nitrea’e areke tie nisahiragne i mpiana’e rey ty nivey i lakagney, satria nitohere i tiokey iareo, le nandeha mbamy iareo mbeo tambone i riakey ey reke, tamy i lera fiambenagne fahaefatse* amy i halegneỳ. Faie le hoe raha handriogne iareo avao zay reke.
49 Naho fa nahatrea aze nandeha ambone riake eỳ iareo, le nirehake tihoe: “Indroy misy raha hafahafa rikiahe!” Le nikorakorake iareo,
50 satria natahotse naho fa nahatrea aze. Faie le avy le hoe reke tamy iareo: “Ko matahotse nareo, fa iraho avao toy.”
51 Nijogne tagnate lakagne ao niarake tamy iareo reke naho fa niavy eo, le nijanogne i tiokey. Tena nigaga iareo naho fa nahatrea izay,
52 satria tsy nandrambe lesogne boake amy i fahagagagne tamy i mofoỳ.
53 Naho fa nandeha avao iareo, le niavy ta Genesareta agne. Le natao iareo narine i moro’ey ey i laka iareoy.
54 Faie naho vaho nizotso boake agnate lakagne ao ty Jesosy, le avy le nihay o ndatio.
55 Le nilay iareo mba hitalily tamy ty ndaty hafa tamy i tanàgney teo. Ze naharey izay, le ninday ze ndaty narare mbamy i Jesosy mbeo.
56 Ndra aia ndra aia areke toeragne nandehana’e, ndra an-drova zay ndra ambanevohitse, le napetra o ndatio a bezara ey ty longo iareo narare. Amy izay iareo afake mangatake amy i Jesosy mba hitsapa i ramborambo i akanjo’eỳ. Nisitragne ze nitsapa aze.
Fagnamarehagne ambane peje
^ Abt: “vola agnate mozete.”
^ Ndra: “nitsinjake.”
^ Ndra: “nivoky.”
^ Manomboke amy 3 halegne hatrake amy ty anjiriha i masoandroy o lera iohoe.
