Talily Soa Nisorate i Marka 8:1-38
-
Nagnomey hanegne ndaty 4 000 ty Jesosy (1-9)
-
Fangatahagne famantaragne (10-13)
-
Ty lalivay o Fariseò naho i Heroda (14-21)
-
Lahilahy raike goa nisitragnegne ta Betsaida tao (22-26)
-
Nihay i Petera tie ia o Kristio (27-30)
-
Nirehafe i Jesosy mialoha ty hovonoegne reke (31-33)
-
Ty mpiana i Jesosy vata’e (34-38)
8 Nisy ndaty maro indraike ty tamy i Jesosy teo. Tsy nisy raha hohanegne iareo. Nitokave’e areke i mpiana’e rey, le hoe reke tamy iareo:
2 “Mahaferenaigne ahy ty vahoake retoa, satria fa telo andro zay iareo ro nijanogne tetoa, hafarà iareo fa tsy misy raha hohanegne.
3 Faie naho ampolieko amy iareo keré hinaneo iareo, le ho fanegne an-dalagne ey, ie amy izao ty ila’e amy iareo lavitse ty misy aze.”
4 Faie hoe ty navale i mpiana’e rey aze: “Aia ty hahatreavagne mofo hahavontsigne* ty ndaty retoa amy ty toeragne mitokagne toy?”
5 Le hoe reke tamy iareo: “Fire ty mofo ama’areo agne?” Le hoe iareo: “Fito.”
6 Le nirehafe i Jesosy i vahoakey mba hitoboke amy i taney eo. Tafara izay, le nalae’e i mofoy sady nisaotse an’Agnahare reke. Nitapatapahe’e i mofoy naho fa niavy eo, le nimea’e i mpiana’e rey mba hozarae iareo, le i mpiana’e rey ty nizara aze tamy i vahoakey.
7 Nanagne fiagne madineke tsiampeampe ka iareo. Naho fa boake nisaotse an’Agnahare ty Jesosy, le nampanjarae’e i mpiana’e rey tamy i vahoakey i fiagne rey.
8 Nihinagne areke iareo, le nivontsy. Naho fa navory iareo ty sisa tsy nilany, le nahafeno vaha bey fito.
9 Lahilahy 4 000 ty teo tamy izay. Nampolie’e i vahoakey naho fa niavy eo.
10 Le avy le nijogne agnate lakagne ao reke naho i mpiana’e rey tafara izay, le nandeha tamy ty faritse Dalmanota agne iareo.
11 Nisy Fariseo nimbama’e mbeo, le nialy hevetse ama’e. Nangatake aze haneho famantaragne boake an-dagnitse agne iareo mba hitsapagne aze.
12 Nifoaigne areke ty Jesosy, le nirehake tihoe: “Nagnino ty taranake toy ro lava mipay famantaragne avao? Volagneko ama’areo,* fa tsy hisy famantaragne homeagne ty taranake toy.”
13 Le nenga i Jesosy eo iareo, le nijogne agnate lakagne ao reke mba ho a moro’e raike ey.
14 Faie nagnaligno ninday hanegne iareo, fa i mofo raike zay avao ty nivoa enta iareo.
15 Le tsy niolakolake ty Jesosy nampitao iareo tie: “Mitaoa soa nareo amy ty lalivay* o Fariseò naho amy ty lalivay i Heroda.”
16 Le nifagnomey tsiny iareo satria tsy ninday mofo.
17 Naho fa nahatrea izay ty Jesosy, le hoe reke tamy iareo: “Nagnino nareo ro mifagnomey tsiny amy inareo tsy ninday mofò? Le mbe tsy azo’areo avao vao ty raha rehafeko ama’areo? Mbe mihily avao vao ty sai’areo?*
18 ‘Mana-maso nareo faie tsy mahatrea, manan-tsofigne faie tsy maharey.’ Tsiaro’areo vao tie,
19 fire vaha ty sisa tsy nilany tamy i mofo dime nizaraegne tamy ty lahilahy 5 000-y?” Le hoe iareo: “Roe amby folo.”
20 “A naho fa nizara i mofo fitoy tamy i lahilahy 4 000-y raho, fire vaha ty nisisa’e?” Le hoe ka iareo: “Fito.”
21 Hoe areke ty Jesosy tamy iareo: “Mbe tsy azo’areo avao vao ty teako horehafegne hinane zay?”
22 Niavy ta Betsaida agne iareo tamy ty fara’e. Nisy lahilahy raike goa zay, nindese o ndatio mbama’e mbeo. Le nihalale tamy i Jesosy iareo mba hitsapa i lahilahy goay.
23 Le nitarihe’e amy ty tagna’e i lahilahỳ sady nente’e niala i tanàgney. Naho fa boake nandrorà’e ty maso i lahilahỳ, le nametra-tagnagne ama’e reke sady nagnontane tihoe: “Ino ty raha trea’o hinane zao?”
24 Le nisokafe i lahilahỳ i maso’ey sady hoe reke: “Va’e ndaty varagne io satria manahake o hataeo faie mandeha.”
25 Natao’e tamy i maso i lahilahỳ eo indraike i tagna’ey, le nahatrea indraike i lahilahỳ sady nazava soa ze raha nitrea’e.
26 Nampolie i Jesosy areke i lahilahỳ faie izao ty nirehafe’e ama’e: “Ko miheregne amy ty tanàgne tiagne ao rehe.”
27 Naho fa nandeha ho amy ty tanà i Kaisaria Filipo agne ty Jesosy naho i mpiana’e rey, le nagnontenea’e iareo tamy iareo tan-dalagne eỳ tie: “Ia ty fahaia o ndatio ahy?”
28 Le hoe iareo tama’e: “I Jaona Mpanao Badisa. Fa ty ila’e mirehake tie i Elia. Misy ka ty mirehake tie ty raike amy i mpaminany taloha rey.”
29 Le hoe reke tamy iareo: “A inareo, ia ty fahaia’areo ahy?” Le hoe ty Petera: “I Kristy.”
30 Le rinara’e mafe iareo mba tsy hirehadrehake amo o ndatio ty miomba aze.
31 Nanomboke nampianatse iareo ka reke tie, tsy maintsy hampijalé o mpitarike jiosio naho o lahibey ty mpisorogneo vaho o mpampianatse lalànao i Ana o ndatỳ sady holiere iareo naho hovonoe iareo ka. Faie hovelomegne reke telo andro afara izay.
32 Nirehafe’e tamy iareo mivantagne ze raha zay. Le nente i Petera nitolake ty Jesosy sady nendaha’e.
33 Niambohoa i Jesosy ty Petera, le nitolike tamy i mpiana’e rey agne reke sady nendaha’e ty Petera tie: “Ajanogno agne ze rehake zay Satana!* Satria tsy ty fomba fiheven’Agnahare ro eretserete’o fa ndra ty fomba fiheve o ndatio.”
34 Nitokave i Jesosy mbama’e mbeo i mpiana’e rey naho i vahoakey sady hoe reke: “Naho misy ndaty te hagnorike ahy, le tsy maintsy mandietse ty vata’e naho minday ty hazo fijalea’e sady magnorike ahy avao.
35 Ty anto’e, ndra ia ndra ia te hamonje ty fiai’e, le hamoe aze. Fa ndra ia ndra ia mamoe ty fiai’e noho ty amako naho i talily soay, le hamonje aze.
36 Ino moa ty soa hoazo ty ndaty raike naho mahazo ze kila raha amy ty tontolo toy eto reke, faie afoe’e ty fiai’e?
37 Sa ino ty raha azo ty ndaty raike omeigne mba hotakalo ty fiai’e?
38 Ndra ia ndra ia megnatse ahy naho ty rehako amy ty taranake mpagnitsakitsa-baly naho mpanota toy, le ho megnatse aze ka i Ana o ndatỳ naho fa ho avy amy ty voninahin-dRae’e miarake amo o anjely masigneo.”
Fagnamarehagne ambane peje
^ Ndra: “hahavoky.”
^ Abt: “Volagneko ama’areo to vata’e.”
^ Ndra: “karibonaty.”
^ Abt: “fo’areo.”
^ Abt: “Mihova afarako ao rehe Satana!”
