Talily Soa Nisorate i Matio 21:1-46
21 Naho fa narine i Jerosalema iareo, le niavy a Betifaga ao, tanàgne raike amy i Vohitse Olivay ey. Le nagnirake roe lahy tamy i mpiana’e rey reke.
2 Hoe reke tamy iareo: “Mandehana amy ty tanàgne roy ey nareo. Naho fa avy ey nareo, le hahatrea birìke mirohy reketse ty ana’e. Hahao iareo, le ento mbamako mbetoa.
3 Naho misy ndaty mirehake anareo, le valeo’areo tie: ‘Palie i Tompo ty birìke retoa.’ Le henga’e hindese’areo iareo.”
4 Niseho ze raha zay, mba hahatanterake ty raha nirehafe o mpaminanio tihoe toy tie:
5 “Rehafo i anak’ampela i Zionay tie: ‘Ho avy ama’o eo i mpanjaka’oy. Soa fagnahy reke sady mitingitse birìke. Ie, anam-birìke, i biby mpinday entagne rey.’”
6 Nandeha areke i mpianatse roe lahy rey, le nanoe iareo iaby i raha nampanoe i Jesosy iareoy.
7 Nindese iareo mbamy i Jesosy mbeo i birìkey reketse i ana’ey, le natao iareo ambone i birìkey ey i akanjobey iareoy, le nitoboke ambone’e ey ty Jesosy.
8 Maro amy i vahoake rey ty nagnafake ty akanjobey iareo, le nalafy iareo tagn’arabey ey. Misy amy iareo ka ty nanapake ran-katae, le nalaha iareo an-dalagne eo.
9 Nandeha taloha’e ao ka ty ila i vahoakey, le ty ila’e tafara’e tao, sady nikorakorake iareo tie: “Mba rombaho i Ana i Daviday! Hotahiegne abey i avy amy ty tahina i Jehovah-y! Mba rombaho reke, ihe miambesatse an-dindìgne ao!”
10 Naho fa niavy a Jerosalema ao reke, le nihorentsegne ty ndaty amy i tanàgney, sady nagnontane tie: “Ia iò?”
11 Le nagnerenkeregne nirehake i vahoake rey tie: “I Jesosy io, i mpaminany boake a Nazareta a Galelia agney.”
12 Nizilike tamy i tempolỳ ao ty Jesosy naho fa niavy eo, le niroahe’e iaby i ndaty mpamarotse naho mpivily raha amy i tempolỳ aoy. Natonta’e ty lataba o ndaty mpanakalo volao naho ty seza o mpamarotse voromahilalao.
13 Le hoe reke tamy iareo: “Voasoratse tie: ‘Ty tragnoko hatao tragno fivavahagne’, fa inareo manao aze ho lakato fietaha o malasò.”
14 Nisy ndaty goa naho kepeke ka nagnatogne aze tamy i tempolỳ tao, le nisitragne’e.
15 Niboseke o lahibey ty mpisorogneo naho o mpampianatse lalànao naho fa nahatrea i raha mahalatsa natao i Jesosỳ, naho i ajaja nikorakorake tamy i tempolỳ ao tihoey tie: “Mba rombaho i Ana i Daviday!”
16 Le hoe iareo tama’e: “Rei’o vao ze o raha rehafe iareo zao?” Le hoe ty navale i Jesosy iareo: “Eka. Mbe tsy nivakie’areo vao i tihoey tie: ‘Irehe ty nahavy ty vava o ajajao naho o anak’ajaja mbe minonò hidera azo’?”
17 Le niala i tanàgney reke naho fa niavy eo, le niavy tamy i tanàgne raike atao tihoe Betania zay. Tagne reke ro niroro tamy i halegney.
18 Ie naho fa nimaraindray bey, le niheregne a Jerosalema agne ty Jesosy. Nikeré reke tamy izay.
19 Nahatrea fihamy* reke naho fa nandeha an-dalagne ey, le nimbeo. Faie tsy nisy voa’e i fihamỳ fa rave’e avao. Le nirehafe’e i fihamỳ tie: “Lelia’e tsy hamoa sasa rehe manomboke androany.” Eo naho eo avao, le avy le nimate i fihamỳ.
20 Nilatsa i mpianatse rey naho fa nahatrea izay, le hoe iareo: “Nagnino i fihamỳ le avy le nimateo?”
21 Le hoe ty navale i Jesosy iareo: “Volagneko ama’areo,* fa naho managne finoagne nareo sady tsy misalasala, le tsy ty raha nataoko tamy i fihamỳ avao ro hovita’areo, fa ndra ty vohitse roy aza ro rehafe’areo tie: ‘Miongaha, le mitontà an-driake agne’, le hiseho zay.
22 Naho manam-pinoagne ka nareo, le hoazo’areo ze raha angatahe’areo amy ty vavake.”
23 Nizilike tamy i tempolỳ ao ty Jesosy, le nampianatse. Tamy ireke mbe nampianatsey, le nimbama’e mbeo o lahibey ty mpisorogneo naho o mpitarike jiosio, sady nagnontane aze tihoe: “Fahefagne boake aia ty anoa’o izao? Le ia ty nagnomey azo ze fahefagne zay?”
24 Hoe ty navale i Jesosy iareo: “Hagnontane raha raike anareo ka raho. Le naho ambara’areo ahy ty vale’e, le hambarako anareo ka tie fahefagne boake aia ty anoako i raha rey.
25 Boake aia ty nahazoa i Jaona fahefagne hanao badisa? Boake an-dagnitse agne sa boake ama o ndaty?” Le nifampirehake iareo tie: “Naho mirehake tika tie: ‘Boake an-dagnitse agne’, le hagnontane antika reke tie: ‘A nagnino ie tsy ino’areò?’
26 Faie naho manao izao ka tika tie: ‘Boake ama o ndaty, le hifotera o vahoakeo tika satria mino iareo iaby tie mpaminany ty Jaona.”
27 Le hoe ty navale iareo i Jesosy: “Tsy fanta’ay.” Le namale ka ty Jesosy tie: “Tsy horehafeko ama’areo ka areke tie fahefagne boake aia ty anoako o raha rehoe.
28 “Akore ty heve’areo amy itoy? Nisy ndaty nanagn’anake roe lahy. Le hoe reke tamy i voalohan’ana’ey: ‘O anake, akia rehe hiasa an-tanem-boaloboke agne tie androany.’
29 Le namale i ana’ey tie: ‘Iraho tsy ho agne.’ Faie nanegnegne reke naho fa niavy eo, le nandeha avao.
30 Nirahe’e ka i ana’e faharoey. Le namale i ana’ey tie: ‘Eka baba handeha raho.’ Faie ie naho fa niavy eo, tsy nandeha reke.
31 Ty aia amy iareo roe lahy ro nagnorike ty saontsin-drae’e?” Le hoe iareo: “I ana’e voaloha’ey.” Le hoe ty Jesosy tamy iareo: “Volagneko ama’areo, fa hizilike aloha’areo amy i Fanjakàn’Andrianagnaharey ao o mpitake hetrao naho o makorelio.
32 Ty anto’e, niavy ty Jaona nanoro anareo ty lala i hamarenagney, faie tsy ninoa’areo. Faie o mpitake hetrao naho o makorelio tena nino aze. Ndra tie nitrea’areo aza zay, le tsy mba niova nareo sady tsy nino aze.
33 “Intoy ka misy fagnoharagne raike: Nisy lahilahy raike nanagne teteke famboleagne voaloboke. Nambole voaloboke tao reke, le nifahera’e ty magnodidigne i tete’ey sady nihaly lavake fandiàliàgne voaloboke agnate’e ao ka reke. Le namboatse tragno abo reke hatao’e fiambenagne i tete’ey. Nampagnofae’e ndaty mpambole i tete’ey, le nandeha an-tane hafa agne reke.
34 Naho fa niavy ty fotoagne fimasaha i voalobokey, le nagnirake amo o mpanompo’eo mbamy i mpamboley mbeo reke, mba hangalake ty anjara’e amy i vokatsey.
35 Faie nitsepahe i mpambole rey i mpanompo rey, le ty raike jinera iareo, ty raike vinono iareo, ty raike nitorahe iareo vato.
36 Le mbe nagnirake mpanompo maro mandikoatse i taloha rey indraike reke. Faie mbe manahake i taloha rey avao ka ty nanoa i mpambole rey aze.
37 Tamy ty fara’e, le nirahe’e ho amy iareo agne i ana-dahi’ey, satria nieretseretse reke tie: ‘Mba hohajae iareo i ana-dahikoy.’
38 Faie naho fa nitrea i mpambole rey i ana-dahi’ey, le nifampirehake iareo tie: ‘Itike i mpandovay, andao hovonoentika reke mba hahazoantika i lova’ey.’
39 Nitsepahe iareo reke sady nitaritarihe iareo ivela i tetekey agne, le avy eo vinono iareo.
40 Naho fa avy i tompo i tanem-boalobokeỳ, hatao’e akore i mpambole rey?
41 Le hoe iareo tama’e: “Hovonovonoe’e iaby iareo satria raty saigne. Hampagnofae’e mpambole hafa hagnomey ty anjara’e amy i vokatsey ka i tanem-boalobokey.”
42 Le hoe ty Jesosy tamy iareo: “Mbe tsy nivakie’areo agnate Soratse Masigne ao vao i tihoey tie: ‘Ty vato niheje o mpamboatse tragnò ro hanjare vato fara’e lahibey* amy i tragnoy. Boake amy i Jehovah zay sady tena mahalatsa antikagne’?
43 Izay mahavy ahy mirehake ama’areò tie hafahagne ama’areo i Fanjakàn’Andrianagnaharey, le homeigne ze firenena manao* ty zoton’arofo’e.
44 Ze ndaty mitonta amo o vato iohoe, le hopotepoteke. Le ze itontà’e ka, le hotorotoro.”
45 Naho fa nirey o lahibey ty mpisorogneo naho o Fariseò ze fagnoharagne zay, le nihay iareo tie iareo o rehafe’eo.
46 Faie ndra tie te ho nitsepake aze aza iareo, le natahotse o vahoakeo satria nino o vahoakeo tie mpaminany ty Jesosy.
Fagnamarehagne ambane peje
^ Ndra: “aviavy.”
^ Abt: “Volagneko ama’areo to vata’e.”
^ Vato bey amy ty zoro o tragnò mikalagne i rindrigne roey mba hahavy i tragnoy ho mafe.
^ Abt: “mamoa mifagnarake.”
