Talily Soa Nisorate i Matio 25:1-46
25 “I Fanjakà i lagnitseỳ, le manahake ty ampela virjiny* folo ninday jiro mba handrondrogne i mpagnengavaoy.
2 Ty dime amy iareo minegne, le ty dime mahimbagne.
3 Ninday jiro i ila’e minegne rey, faie tsy nivaty menake.
4 Fa i ila’e mahimbagne rey ninday jiro sady nivaty menake amy ty tavoangy.
5 Nitara ty niavia i mpagnengavaoy, le ninkonkogne iareo iaby, hafarà iareo niroro.
6 Ie naho fa nivakimira halegne, le nisy ndaty nitoka mafe tie: ‘Fa inge i mpagnengavaoy, akia nareo hanalaka aze!’
7 Nitsangagne areke i ampela virjiny rey, le namboamboatse i jiro iareoy.
8 Le hoe i ila’e minegne rey tamy i mahimbagne rey: ‘Mba omeo’areo menake zahay fa homate ty jiro’ay retoa.’
9 Le namale i ila’e mahimbagne rey tie: ‘Va’e tsy hahampe antikagne anio ty menake toa, akia nareo hivily amo o mpamarotseo agne.’
10 Ie iareo nandeha nivily menake, le niavy i mpagnengavaoy. Le niarake amy i mpagnengavaoy nizilike amy i tragno misy i fete beỳ agne, i ampela virjiny fa nivognogne soa rey, le narindrigne i lalagney.
11 Niavy i ampela virjiny ila’e rey tafara izay, le hoe iareo tie: ‘O Ragnandria, mba vohao zahay!’
12 Le hoe ty navale’e iareo: ‘Volagneko ama’areo,* fa tsy fantako nareo.’
13 “Miambena lognandro areke nareo satria tsy fanta’areo ndra i androy ndra i leray.
14 “I Fanjakà i lagnitseỳ ka, le manahake ty lahilahy raike handeha an-tane hafa agne. Navori’e i mpanompo’e rey, le nankine’e amy iareo ty fanagna’e.
15 Le ty raike amy i mpanompo’e rey, nimea’e vola dime talenta,* le ty raike nimea’e roe talenta, le ty raike nimea’e talenta raike.
16 Le avy le nampiasae i raike nahazo dime talentay i volay, le nahazoa’e tombo’e dime talenta.
17 Nampiasae i nahazo roe talentay hoe izay ka i vola niazo’ey, le nahazoa’e tombo’e roe talenta.
18 Faie i mpanompo nimeagne talenta raikey le avy le nibiogne, le nihaly lavake sady naleve’e tao i vola i tompo’eỳ.
19 “Ie ela bey tafara tatoy, le niavy i tompo iareoy mba hagnontane iareo ty miomba i vola’ey.
20 Nimbamy i tompo’ey mbeo i raike nimeagne dime talentay, sady ninday i tombo’e dime talentay, le hoe reke: ‘O Ragnandria, nagnankigna’o dime talenta raho, le henhenke fa dime talenta ka ty tombo’e niazoko.’
21 Le hoe i tompo’ey tama’e: ‘Fanjaka ty raha natao’o! Mpanompo soa naho azo atokisagne vata’e rehe! Trea tie azo atokisagne amy i raha kedekedey rehe, le hotendreko hiandraikitse raha maro. Mifalea miarake amy i tompo’oy.’
22 Ie naho fa niavy eo, le nimbama’e mbeo ka i raike nimeagne roe talentay. Le hoe reke tie: ‘O Ragnandria, nagnankigna’o roe talenta raho, le henhenke fa roe talenta ka ty tombo’e niazoko.’
23 Le hoe i tompo’ey tama’e: ‘Fanjaka ty raha natao’o! Mpanompo soa naho azo atokisagne vata’e rehe! Trea tie azo atokisagne amy i raha kedekedey rehe, le hotendreko hiandraikitse raha maro. Mifalea miarake amy i tompo’oy.’
24 “Tamy ty fara’e, le nimbama’e mbeo ka i aze nimeagne talenta raikey sady nirehake tie: ‘O Ragnandria, haiko tie ndaty sarotsarote’e rehe. Alae’o avao ty raha tsy nambolé’o, le avori’o avao ka ty raha tsy nikororohe’o.
25 Natahotse amy izay anio raho, le naleveko i vola’oy. Intoy ao reke ahereko ama’o.’
26 Le hoe i tompo’ey tama’e: ‘Ty mpanompo kamo naho raty fagnahy tiagne! Toe fa hai’o tie, mangalake ty raha tsy namboleko raho sady mamory ty raha tsy nikororoheko,
27 le nagnino ro tsy nahaja’o amy i banke agne i volakoy, amy izay mba ho nahazoako ana’e naho fa niheregne raho?
28 “‘Alao ama’e areke i vola talenta raikey, le omeo i raike managne folo talentay.
29 Satria ze fa managne ro homeagne maro, amy izay vao mainke hanan-draha maro reke. Faie ze tsy managne, ndra i kede anagna’ey aza mbe halaegne ama’e ka.
30 Ento’areo o mpanompo tsisy ilagne aze iohoe, le atoraho’areo amy i iegne ambalike agney. Agne reke ro hangoihoy ty tagny naho ho romotse.’*
31 “Naho fa ho avy amy ty voninahi’e i Ana o ndatỳ reketse o anjelio iaby, le hitoboke amy i sezan-droandria’e bey voninahitsey eo.
32 Havory agnatreha’e eo o firenenao iaby, le hagnambake o ndatio reke, manahake ty atao o mpiarake magnambake o agnondrio amo o oseò.
33 Ze agnondry hatao’e ankavana’e eo, le ze ose hatao’e ankavia’e eo.
34 “Le izao ty horehafe i Mpanjakay amy i ankavana’e eoy: ‘Mbetoa nareo nahazo fitahiagne boake amy i Raekoy, mandovà i Fanjakagne nomanegne ho anareo nanomboke tamy ty namorognagne o ndatioy.*
35 Satria naho fa nikeré raho, le nimea’areo hanegne, narandrano raho, le nimea’areo rano hinomeko. Nirambese’areo soa an-tragno’areo ao ka raho ndra tie tsy nifanta’areo aza.
36 Tsy nanagne lamba hisikinagne raho, le nimea’areo. Nikarakarae’areo ka raho naho fa nisiloke, le nitilihe’areo raho tamy iraho nigadray.’
37 Le hamale aze hoe izao i ndaty maregne rey tie: ‘O Tompo, ombia rehe ro nitrea’ay nikeré, le nimea’ay hanegne, ndra narandrano, le nimea’ay rano hinome’o?
38 Ombia ka rehe ro nitrea’ay tsy nisy hivantagnagne, le nirambese’ay soa, ndra tsy nanan-damba hisikinagne, le nimea’ay?
39 Ombia rehe ro nitrea’ay nisiloke ndra nigadra tam-pirizò ao, le nitilihe’ay?’
40 Le hoe ty navale i Mpanjakay iareo: ‘Volagneko ama’areo, fa ze raha natao’areo, amy ty raike amy ty fara’e kidikidy amy ty rahalahiko retoa, le natao’areo tamako ka.’
41 “Le izao ty hatao’e amy i ankavia’e eo rey: ‘Misintaha agne nareo, fokopatse retoa! Mandehana mbamy i afo maharetse nainai’e nomanegne hoahy i Devoly naho o anjeli’eo agney nareo.
42 Nikeré raho faie tsy nimea’areo hanegne hohaneko, narandrano ka raho faie tsy nimea’areo rano hinomeko.
43 Tsy nisy hivantagnagne raho faie tsy nirambese’areo soa, tsy nanagne lamba hisikinagne raho faie tsy nimea’areo lamba, nisiloke naho nigadra tam-pirizò ao raho faie tsy nikarakarae’areo.’
44 Le izao ka ty havale iareo aze: ‘O Tompo, ombia rehe ro nitrea’ay nikeré, ndra narandrano, ndra tsy nisy hivantagnagne, ndra tsy nanan-damba hisikinagne, ndra nisiloke, ndra nigadra tam-pirizò ao faie tsy nikarakarae’ay?’
45 Le izao ty horehafe’e amy iareo: ‘Volagneko ama’areo, fa ze raha tsy natao’areo amy ty raike amy ty fara’e kidikidy amy ty rahalahiko retoa, le tsy natao’areo tamako ka.’
46 Hovonoegne nainai’e* areke iareo fa i ndaty maregne rey hovelogne nainai’e.”
Fagnamarehagne ambane peje
^ Ndra: “mbe tsy niharo aman-dahilahy; mbe tsy nahavany lahy.”
^ Abt: “Volagneko ama’areo to vata’e.”
^ Abt: “hagnily vazagne.”
^ Ndra: “ty nampisy ty tarira i Adama naho i Evay.”
^ Abt: “‘Tapatapahegne nainai’e’ manahake o hatae rantsagnegneo.”
