Talily Soa Nisorate i Matio 26:1-75
-
Nipay hevetse mba hamonoagne i Jesosy o mpisorogneo (1-5)
-
Menake magnitse nailigne tamy i Jesosy (6-13)
-
I Pasake fara’ey naho ty hifoteragne i Jesosy (14-25)
-
Ty fankalazagne i Mahakama Hariva i Tompoy voaloha’e (26-30)
-
Nirehafegne mialoha tie handietse ty Petera (31-35)
-
I Jesosy nivavake ta Getsemane ao (36-46)
-
Nitsepahagne ty Jesosy (47-56)
-
Ty raha natrehe’e tagnatreha o Fitsaragne Ambone Jiosio eo (57-68)
-
Nandietse tie tsy mahafantatse i Jesosy ty Petera (69-75)
26 Naho fa boake nirehake ze raha rezay ty Jesosy, le hoe reke tamy i mpiana’e rey:
2 “Hai’areo tie, roe andro ty sisa, le ho avy i pasakey, hatolotse an-tagna o fahavalo’eo eo i Ana o ndatỳ, le hopehe iareo amy ty boda-katae.”
3 Tafara izay, le nivory tamy ty kiririsa i mpisorombey raike zay eo, o lahibey ty mpisorogneo naho o mpitarike jiosio. I Kaiafa ty agnara i mpisorombeỳ.
4 Le nipay hevetse iareo mba hahavy i Jesosy hotsepahegne naho hovonoegne.
5 Faie nirehake iareo tie: “Aleo tsy ataontikagne amo o andro feteo, amy izay tsy mikorontagne o vahoakeo.”
6 Tamy i Jesosy ta Betania agney, tamy ireke tan-tragno i Simona bokay aoy,
7 le nisy ampela raike ninday menake magnitse lafo vily tamy ty tavoangy kedekede zay nimbama’e mbeo, le naili’e tan-doha i Jesosy eo i menakey, tamy ireke mbe nihinagney.*
8 Niboseke i mpianatse rey naho fa nahatrea izay, le hoe iareo: “Nagninogne i menakey, ie ariariagne avaò?
9 Naho navily igne, le nahazoagne vola bey ho nimeagne o mahantrao.”
10 Nihay i Jesosy i raha nirehafe iareoy, le hoe reke: “Nagninogne ty ampela tia, ie rehadrehafe’areò? Raha fanjaka ty natao’e tamako.
11 Ty ama’areo eo lava hisy ndaty mahantra avao. Fa iraho tsy raha ho ama’areo eo avao.
12 Naili’e amy ty vatako i menake magnitsey mba ho fagnomanagne i fandevegnagne ahỳ.
13 Volagneko ama’areo,* fa ndra aia ndra aia itoriagne i talily soay amy ty tane toy iaby, le horehafegne ka i raha natao i ampelaỳ mba ho fahatsiarovagne aze.”
14 Ie naho fa niavy eo, le nandeha amy ty lahibey o mpisorogneo agne ty Jodasy Iskariota, raike amy i apostoly 12 rey.
15 Hoe reke: “Ino ty homei’areo ahy fa hatoloko anareo reke?” Nifagnarake areke iareo fa hagnomey aze vola volafotsy 30.
16 Nanomboke tamy izay reke, le nipay fotoagne mete soa hifoteragne i Jesosy.
17 Tamy ty andro voaloha i Fete ty Mofo Tsy Misy Lalivaỳ,* le nimbamy i Jesosy mbeo i mpiana’e rey sady nirehake tie: “Aia ty tea’o hagnomana’ay i hanegne hariva amy i Pasakeỳ?”
18 Le hoe reke: “Mandehana an-tanà i anogne agne nareo, le rehafo ama’e tie: ‘Izao ty nirehafe i Mpagnanatsey: “Fa marine ty fotoagne hamonoagne ahy, le an-tragno’o ao ty hiarahako amo o mpianako reo hankalaza i Pasakey.”’”
19 Le nanoe i mpianatse rey iaby ze raha nampanoe i Jesosy iareo mba hagnomanagne i Pasakey.
20 Ie naho fa nihariva i androy, le nandre nitso-kiho tamy i latabatsey eo reke, reketse i mpiana’e 12 rey.
21 Amy iareo mbe mihinagney, le hoe reke: “Volagneko ama’areo, fa hifotetse ahy ty raike ama’areo.”
22 Nalahelo mafe iareo naho fa naharey izay, le hoe ty tsikiraidraike amy iareo tamy i Jesosy: “O Tompo, iraho vao zay?”
23 Le hoe reke tamy iareo: “Ze miarake mandògne ty mofo’e reketse ahy agnate finga bole ao ro hifotetse ahy.
24 Maregne fa ho mate i Ana o ndatỳ arake ty fa nirehafe ty Soratse Masigne, faie hoazon-doza ty ndaty mifotetse i Ana o ndatỳ! Soa aza naho tsy naterake ze ndaty zay.”
25 Le hoe ty Jodasy i hifotetse azey: “Iraho vao zay Raby?”* Le hoe ty Jesosy tama’e: “Hai’o soa.”
26 Tamy iareo mbe nihinagney, le nangalake mofo ty Jesosy. Naho fa boake nivavake reke, le nitapatapahe’e i mofoy, le nimea’e i mpiana’e rey sady hoe reke: “Rambeso’areo toy, le hano. Intoy ty vatako.”
27 Nirambese’e ka i kope misy divaỳ tafara izay. Naho fa boake nivavake reke, le natolo’e iareo sady hoe reke: “Rambeso toy, le minoma amy itoy nareo iaby,
28 satria intoy ty lioko,* le i ‘lio ty fifagnekeagne’ hatégne hoahy ty ndaty maroy, amy izay ho voavela ty fahotà iareo.
29 Faie rehafeko ama’areo, fa tsy hinogne divay hoe itone sasa raho, amparake ty hiavia i andro hinomako divay vaovao miarake ama’areo, amy i Fanjakà i Raekoy aoy.”
30 Nandeha amy i Vohitse Olivay agne iareo naho fa boake nanao hira fideragne an’Agnahare.
31 Le hoe ty reha i Jesosy tamy iareo: “Hienga ahy iaby nareo tie androany halegne noho ty raha hanjò ahy, satria nirehafe i Soratse Masigney tie: ‘Hovonoeko i mpiarakey, le hiparitake iaby i agnondri’ey.’
32 Faie afara ty hamelomagne ahy indraike amy ty mate, le hozoe’areo a Galelia agne raho.”
33 Le hoe ty navale i Petera aze: “Ndra tie hienga azo iaby iareo amy ty raha hanjò azo, iraho tsy ombia hienga azo zao!”
34 Le hoe ty Jesosy tama’e: “Volagneko ama’o, fa aloha i kekeo akohoy, le handietse ahy intelo rehe tie androany halegne.”
35 Le hoe ty Petera tama’e: “Ndra tie ho mate reketse azo aza raho, le tsy ombia handietse azo zao!” Nirehake hoe izay ka i mpianatse ila’e rey.
36 Ie tafara izay, le nandeha ty Jesosy naho i mpiana’e rey, le niavy a Getsemane ao. Hoe reke tamy iareo: “Mitoboha etoa hey nareo, fa iraho handeha hivavake eroy.”
37 Le nindese’e niarake ama’e ty Petera naho i ana-dahy i Zebedio roe lahy rey. Nanomboke nalahelo mafe naho tena nivali-doha reke.
38 Ie naho fa niavy eo, le hoe reke tamy iareo: “Tsemboke mafe manahake o ndaty fa ho mateo raho. Mijanogna etoa nareo, le ko miroro fa miambena avao.”
39 Niala lavidavitse iareo reke, le niondreke naho nitongaleke sady nivavake tie: “O Baba, naho mete, le afaho amako ty kope toy. Faie tsy ze raha teako ro hatao fa ze zoton’arofo’o.”
40 Niheregne mbamy i mpianatse rey eo reke naho fa niavy eo, le nizoe’e niroro iareo, le hoe reke tamy i Petera: “Le tsy mba nahavita tsy niroro naho niambegne tagnate ty lera’e raike reketse ahy rehe?
41 Miambena naho mivavaha lognandro mba hahatohetse tsapa hevetse. Maregne fa mazoto* avao i saigney faie i nofotsey ro maleme.”
42 Nandeha indraike reke, le nivavake fagnindroe’e sady hoe reke: “O Baba, naho mete, le mba afaho agne ty kope toy. Fa naho tsy maintsy inomeko, le ty zoton’arofo’o ro hatao.”
43 Le niheregne mbamy iareo mbeo indraike reke, le nizoe’e niroro iareo satria navesatse ty maso iareo.
44 Niala ty eo indraike reke, le nandeha nivavake fagnitelo’e, faie mbe nitovy tamy i raha nirehafe’e taloha teoy avao ty nangatahe’e.
45 Niheregne mbamy i mpiana’e rey eo reke naho fa niavy eo, le hoe reke tamy iareo: “Le mbe miroro naho mitofa avao nareo amy ty fotoagne hoe izao? Fa marine ty lera hifoteragne i Ana o ndatỳ, le hatolotse an-tagna o mpanotao eo reke.
46 Mitsangana, le andao tika handeha, fa marine i mpifotetse ahỳ.”
47 Tamy ireke mbe nirehakey, le niavy boake agne ty Jodasy, i raike amy i apostoly 12 reỳ. Nisy vahoake maro ninday mesabey naho doda ty niarake tama’e. O lahibey ty mpisorogneo naho o mpitarike jiosio ty nagnirake iareo.
48 Fa nirehake ty fomba hamantara i ndaty rey aze i mpifotetsey tie: “Ze orofako amy iareo ro ie. Tsepaho’areo reke.”
49 Le avy le nagnitsy mbamy i Jesosy mbeo reke sady nirehake tie: “Akore Raby!” Le norofa’e reke.
50 Faie hoe ty Jesosy tama’e: “Ento are ty lia’o atoy!” Tafara izay, le nimbamy i Jesosy mbeo i ndaty rey, sady nitsepake aze naho ninday aze.
51 Faie nisy raike amy i mpiana i Jesosy rey nanarike i mesabei’ey, le namira ty mpanompo i mpisorobeỳ, le nihifike mberoagne agne ty sofi’e raike.
52 Le hoe ty Jesosy tama’e: “Aheregno amy i tragno’ey ao i mesabei’oy, satria ze mampiasa mesabey ro hovonoegne amy ty mesabey.
53 Sa tsy hai’o vao tie, afake mangatake an-dRaeko raho, mba hagnirake anjely agnale’e* hagnampe ahy ndra amy izao amy izao aza.
54 Faie naho manao izay raho, le akore ty hahatanteraha i raha nirehafe ty Soratse Masigne miomba ze o raha miseho zaoy?”
55 Hoe ty Jesosy tamy i vahoakey naho fa niavy eo: “Minday doda naho mesabey manahake o ndaty hitsepake malasò vao nareo tie hitsepake ahy? Nampianatse isan’andro isan’andro tamy i tempolỳ tao avao raho, faie tsy nitsepahe’areo.
56 Faie tsy maintsy miseho ze raha iaby zao, amy izay tanterake ty raha nisorate o mpaminanio.” Ie naho fa niavy eo, le nienga aze iaby i mpiana’e rey sady nilay.
57 Le nindese i ndaty nitsepake aze rey mbamy i Kaiafa mpisorombey mbeo ty Jesosy, sady fa nivory tao iaby o mpampianatse lalànao naho o mpitarike jiosio.
58 Faie nagnorike i Jesosy lavidavitse tey avao ty Petera, le niavy tamy i kiririsa i mpisorombeỳ tao. Le niarake nitoboke tamy ty mpanompo tao reke, mba hagnente ty raha hiseho.
59 Nipay vavolombelogne mavande mba hanoagne kitomboke i Jesosy o lahibey ty mpisorogneo naho o Fitsaragne Ambone Jiosio, amy izay reke hovonoegne.
60 Maro areke ty vavolombelogne mavande niavy teo, faie tsy nahatrea raha hanoagne kitomboke aze iareo. Tafara izay, le nisy vavolombelogne roe hafa niavy,
61 sady hoe iareo: “O lahio nirehake tie: ‘Vitako ty mandrava i tempolin’Andrianagnaharey, le haoreko agnate ty telo andro.’”
62 Le nitsangagne i mpisorombeỳ sady nirehake tama’e tie: “Nagnino ihe ie tsy mamaleo? Tsy rei’o vao o raha rehafe o lahireo miomba azo zaò?”
63 Faie le nitsìgne avao ty Jesosy. Le hoe indraike i mpisorombeỳ tama’e: “Mifantà amy i Andrianagnahare velogney rehe tie, ihe vata’e o Kristy Anan’Agnahareo.”
64 Le hoe ty Jesosy tama’e: “Fa ie i nitsarae’o zay. Faie ambarako azo fa manomboke amy izao, le hotrea’o mitoboke ankavana i Fara’e Maherỳ eo, i Ana o ndatỳ sady ho avy amy i rahogne amy i lagnitsey ey.”
65 Le nandriatse i akanjo’ey i mpisorombeỳ sady nirehake tie: “Manivetive an’Agnahare reke! Ino ka ty mbe ipaliavantika vavolombelogne? Fa nirei’areo ie nanivetive an’Andrianagnahare anianỳ.
66 Akore are ty heve’areo?” Le namale iareo tie: “Fagneva ty hovonoegne reke.”
67 Ie naho fa niavy eo, le nandrorà iareo ty tarehe’e sady nikomondroe iareo reke. Ty ila’e ka nitakapike aze,
68 le nirehake tie: “Maminania ama’ay ihe Kristy zao. Ia nijera azo teoy?”
69 Tamy izay ty Petera, le nitoboke an-kiririsa ivela’e ao. Le nisy ampela* raike ty nimbama’e mbeo sady nirehake tie: “Niarake tamy i Jesosy te Galelia rehe!”
70 Faie niliere’e tagnatreha iareo eo zay, le hoe reke: “Le morogn’ahy o raha rehafe’o zao!”
71 Ie hiakatse i vavahadỳ ty Petera, le nisy ampela hafa ka nahatrea aze sady nirehake tie: “Nama i Jesosy boake a Nazareta agney ka ty lahilahy tiagne!”
72 Le mbe nifanta indraike reke sady nandietse tie: “Tsy fantako ndra raike ze lahilahy zay!”
73 Tsy ela tafara izay, le nimbamy i Petera mbeo i ndaty nitsangagne narine teo rey, le nirehake tie: “Nama iareo vata’e rehe, satria le avy le fantatse amy ty vendreha’o tie boake a Galelia agne rehe.”
74 Faie niozogne naho nifanta indraike ty Petera tie tena tsy fanta’e ze o lahilahy zao. Tafara izay, le avy le nisy akoho nikekeo.
75 Le nitsiaro i Petera i reha i Jesosy tihoey tie: “Aloha i kekeo akohoy, le handietse ahy intelo rehe.” Le niakatse ambalike agne ty Petera sady nitoreotoreo ty tagny satria nalahelo mafe.
Fagnamarehagne ambane peje
^ Ndra: “nandre nitso-kiho amy i latabatsey eo.”
^ Abt: “Volagneko ama’areo to vata’e.”
^ Ndra: “Karibonatỳ.”
^ Agnaram-boninahitse nirehafagne ty Mpampianatse jiosy.
^ Abt: “midika ho lioko toy,”
^ Ndra: “vognogne.”
^ Abt: “tafike 12.”
^ Ndra: “mpanompovave.”
