Talily Soa Nisorate i Matio 3:1-17
3 Ie tafara tatoy, le nitory tam-patrambey i Jodia agne ty Jaona Mpanao Badisa.
2 Hoe reke: “Mibebaha nareo satria fa marine i Fanjakà i lagnitseỳ.”
3 Toe i Jaona naho ty maregne i nirehafe i Isaia mpaminany tihoey tie: “Inay ty feo o ndaty mikoike am-patrambey agne manao tihoe: ‘Omano ty lala i Jehovah! Anò mahitsy i lala’ey.’”
4 Volon-drameva ty akanjo nagnisia i Jaona, le holitse ty sentira’e. Valala naho tantele ka ty nifihane’e.
5 Nandeha mbamy i Jaona mbeo ze ndaty ta Jerosalema tao naho ta Jodia agne vaho tamy ty faritse nagnodidigne i Jordana.
6 Le natao’e badisa tamy i Renerano i Jordanay teo iareo sady nieke ty fahota iareo tagnatreha o ndatio eo ka.
7 Naho fa nitrea i Jaona i Fariseo naho i Sadoseo maro niavy tamy i toeragne nanoa’e badisay eoy, le hoe reke tamy iareo: “Inareo foko o meregne misy poizigneo, ia o nampitao anareo mba tsy hotra ty havigneran’Agnahareo?
8 Atorò’areo amy ty raha atao’areo areke tie mibebake vata’e nareo.*
9 Ao nareo tsy hieretseretse tie: ‘Izahay anio ana i Abrahama!’ Rehafeko ama’areo fa hain’Agnahare ty magnova ty vato retiagne hanjare ho ana i Abrahama.
10 Fa am-poto i hataey eo i famakỳ. Ze hatae tsy mamoa voa soa areke, le hofiraegne sady hatorake agnate afo ao.
11 Iraho manao badisa anareo amy ty rano satria nareo mibebake. Fa i ho avy afarako zay mahery amboneko, le ndra iraho aza tsy fagneva hagnafake ty kapa’e. Hanao badisa anareo amy ty fagnahy masigne naho amy ty afo reke.
12 Fa an-tagna’ey i fitaovagne fikororohagney sady hatao’e malio i toeragne famofoham-barey. Le havori’e an-driha ao ze vare, fa i kafo’ey reketse i taho’ey horoa’e amy ty afo tsy mete mate.”
13 Niala ta Galelia agne ty Jesosy, le nandeha mbamy i Jaona mbeo, amy i Renerano i Jordanay agne, mba hatao’e badisa.
14 Faie nisakagne aze ty Jaona, le nirehake tie: “Nagnino rehe ie mbamako mbetoa hataoko badisao, ie amy izao iraho ro toko’e hatao’o badisa?”
15 Faie hoe ty navale i Jesosy aze: “Ko sakana’o raho satria izay ty ahafahantika magnatanterake ze zoton’arofon’Andrianagnahare.” Le natao i Jaona badisa reke.
16 Naho vaho nivita badisa ty Jesosy, le niakatse boake agnate rano ao. Le nisokake i lagnitsey, le nitrea i Jaona nizotso manahake o voromahilalao tambone i Jesosy teo ty fagnahin’Andrianagnahare.
17 Nisy fiaragnanagne boake an-dagnitse agne ka nanao hoe izao: “Io i Anak’isokoy sady tena mahafale ahy ze raha atao’e.”
Fagnamarehagne ambane peje
^ Abt: “mamoa voa mifagnarake amy ty fibebahagne.”
