Talily Soa Nisorate i Matio 5:1-48
-
TORITENY TAM-BOHITSE TEY (1-48)
-
Nanomboke nampianatse ty Jesosy tamy ireke tam-bohitseỳ (1, 2)
-
Raha sive mahasambatse (3-12)
-
Sira naho jiro (13-16)
-
Hagnatanterake i Lalànay ty Jesosy (17-20)
-
Torohevetse miomba ty habosehagne (21-26), fagnitsakitsaham-baly (27-30), fisaraham-panambaliagne (31, 32), vava atao (33-37), vale fate (38-42), naho hatea ty fahavalo (43-48)
-
5 Naho fa nahatrea i vahoakey ty Jesosy, le nionjogne amy ty toeragne aboabo tamy i vohitsey teo, le ey reke ty nitoboke. Le nimbama’e mbeo i mpiana’e rey.
2 Nanomboke nampianatse reke naho fa niavy eo tie:
3 “Sambatse ze mahatsapa tie mipay an’Agnahare satria hoahy iareo i Fanjakà i lagnitseỳ.
4 “Sambatse ze malahelo satria hampionognegne.
5 “Sambatse ze ndaty soa fagnahy* satria handova ty tane toy.
6 “Sambatse ze keré naho maeake ty hamaregnagne satria homean’Andrianagnahare fahafaham-po amy ze raha irie’e zay iareo.
7 “Sambatse ze mamindra fo satria hamindragne fo.
8 “Sambatse ze malio ty am-po’e ao satria hahatrea an’Agnahare.
9 “Sambatse ze mpampilongo satria hatao tihoe anan’Agnahare.
10 “Sambatse ze enjehegne* noho ty hamaregnagne satria hoahy iareo i Fanjakà i lagnitseỳ.
11 “Sambatse nareo naho haratie o ndatio vaho enjehe iareo sady amorogna iareo vande tie nanao ze kila raha raty, noho inareo mino ahy.
12 Mifalea naho mirebeha nareo satria homean’Agnahare valesoa lahibey. Mitovy amy ty fomba nagnenjeha iareo o mpaminany talohao ka ze raha atao iareo anareo zay.
13 “Mitovy amo o sirao nareo amy ty tontolo toy eto. Faie naho o sirao ro manjare matsatso, le ino ka ty mbe hahasira aze? Tsy ho azo ampiasaegne sasa reke fa hariagne, le holiàlià o ndatio.
14 “Mitovy amo o hazavagneo nareo amy ty tontolo maiem-bey toy eto. Tsy hay aetake ty tanàgne ambone o vohitseo ey.
15 Naho fa mamelogne jiro o ndatio, le tsy atao’e ambane latabatse ao, fa atao’e amy i fisiagne azey eo, amy izay mazava ze agnate tragno ao.
16 Hoe izay ka fa toko’e henga’areo hamilepiletse agnatreha o ndatio eo ty hazava’areo, soa tie hotrea iareo ty raha fanjaka atao’areo, mba hagnomea’e voninahitse i Rae’areo an-dagnitse agney.
17 “Ko mieretseretse nareo tie hamoagne i Lalànay naho ty raha nisorate o mpaminanio ty niaviako. Tsy ty hamoagne irey ty niaviako fa ty hagnatanterake aze.
18 Volagneko ama’areo,* fa ndra mbe moramora ka ty hahafoagne i lagnitsey naho ty tane toy ta tie hahafoagne ty rene-tsoratse raike ndra ty rambo ty rene-tsoratse raike amy i lalànay ao, amparake ty ahatanteraha iareo iaby.
19 Ndra ia ndra ia areke tsy magnorike ty raike amy i lily hevere o ndatio tie tsy le lahibey rey sady mampianatse ty hafa hanao hoe izay ka, le tsy fagneva ty hizilike amy i Fanjakà i lagnitsey ao. Fa ze magnorike irey sady mampianatse aze ro fagneva ty hizilike amy i Fanjakà i lagnitsey ao.
20 Volagneko ama’areo, fa tsy tena ndaty maregne o mpampianatse lalànao naho o Fariseò. Le naho ohatse mitovy amy ty raha atao iareo avao ka ty atao’areo, le tsy hizilike amy i Fanjakà i lagnitsey ao nareo.
21 “Fa hai’areo i raha nirehafegne tamy ty raza’areo tihoey tie: ‘Ko mamono ndaty satria ze mamono ndaty, le hoentegne amo o fitsaragneo ey.’
22 Faie iraho mirehake ama’areo tie ze mitagne am-po amy ty rahalahi’e, le hoentegne amo o fitsaragneo ey. Ze magnambanembane naho magnompa ty rahalahi’e, le hoentegne amy ty Fitsaragne Fara Tampo’e. Le ze manao tihoe: ‘Ty sagnagna tỳ!’, le fagneva ty amy i Gehena agne.
23 “Naho minday fagnomezagne mbamy i alitaray mbeo areke rehe, le ie rehe avy agne vaho mahatsiaro tie misy rahalahi’o tsy mifagnarake ama’o,
24 le engao aloha i alitaray eo hey i fagnomeza’oy, le akia hey rehe milongoa amy i rahalahi’oy. Naho fa miheregne rehe vaho izay atoloro i fagnomeza’oy.
25 “Naho misy ndaty managne trosa ama’o, le te hitory azo amo o fitsaragneo ey, le mifandamina ama’e malaky amy inareo mbe an-dalagne eỳ. Tsy mone hanolotse azo amo o zizio reke, le o zizio ka hanolotse azo amo o mpagnatanterake lilim-pitsaragneo, le o mpagnatanterake lilim-pitsaragneo hanjilike azo am-pirizò ao.
26 Rehafeko ama’o vata’e, fa tsy hovotsotse boake ao rehe, naho tsy vita’o loa iaby ze vola* toko’e haloa’o.
27 “Fa hai’areo ka i tihoey tie: ‘Ko magnitsakitsa-baly.’
28 Faie iraho mirehake ama’areo fa ze mikiroke ampela lognandro vaho te hila aze, le fa nagnitsakitsa-baly am-po’e ao.
29 Naho i maso’o havanay areke ro mahavy azo hanota, le afaho sady ario lavitse azo. Tsy ndra aleo vao toka-maso ta tie i vata’oy iaby ro hatorake amy i Gehena agne?
30 Naho i tagna’o havanay ka ro mahavy azo hanota, le tapaho sady ario lavitse azo. Tsy ndra aleo vao mamoe tagnagne raike ta tie i vata’oy iaby ro hatorake amy i Gehena agne?
31 “Fa nirei’areo ka i tihoey tie: ‘Ze misarake amy ty vali’e, le toko’e hagnomey aze taratasy fisaraham-panambaliagne.’
32 Faie izao ty rehafeko ama’areo: Tsy mahazo misarake amy ty vali’e ty lahilahy raike naho tsy nagnitsakitsake aze* ty vali’e. Naho ohatse i lahilahỳ misarake amy i vali’e, le va’e hahavy i ampelay hagnitsakitsa-baly zay. Le ze manambaly i ampela nisaraha ty vali’ey, le magnitsakitsa-baly ka.
33 “Fa hai’areo ka i raha nirehafegne tamy ty raza’areo tihoey tie: ‘Ko manao vava, ie naho fa avy eo tsy magnatanterake. Fa ze vava natao’o tamy i Jehovah, le tsy maintsy tanterahe’o.’
34 Faie iraho mirehake ama’areo tie: Ko mifantafanta avao! Ndra amy i lagnitsey zay satria sezan-droandrian’Agnahare io,
35 ndra amy ty tane toy satria fasia’e ty fandia’e io, ndra amy i Jerosalema satria tanà i Mpanjaka Lahibeỳ* io.
36 Ko mifanta amy i loha’oy ka satria ndra ty raike amy ty volo’o aza tsy vita’o ty magnova aze ho foty ndra ho mainte.
37 Aleo areke naho fa ‘Eka’ ty reha’areo le eka, naho fa ‘Aha’a’ le aha’a. Fa ze maro rehake ankoatse ireo, le manahake i Devoly.*
38 “Fa hai’areo i tihoey tie: ‘Maso hosolo ty maso, le nife hosolo ty nife.’
39 Faie iraho mirehake ama’areo tie: Ko manohetse ze manao raty ama’areo. Naho misy ndaty areke mitakapike i fifi’o havanay, le atoliho ama’e agne ka i fifi’o haviay.
40 Naho misy ndaty mitory azo amo o fitsaragneo ey mba hahazoa’e i akanjo’o agnate’ey, le meo aze ka i akanjobei’oy.
41 Naho misy manam-pahefagne ka magnirake azo hanao raha raike, le manoa mihoatse i raha agniraha’e azoy.
42 Naho misy ndaty mangatake raha ama’o, le omeo. Naho misy ndaty ka te hitrosa raha ama’o, le ko ilaisagne.
43 “Fa rei’areo ka i tihoey tie: ‘Teavo ty nama’o, le rafeso ty fahavalo’o.’
44 Faie iraho mirehake ama’areo tie: Teavo avao ty fahavalo’areo, le mivavaha ka hoahy ze magnenjeke* anareo.
45 Naho manao izay nareo, le hotrea tie manahake i Rae’areo an-dagnitse agney. Ireke zao magnomey i masoandro’ey o ndaty raty fagnahio naho o ndaty soa fagnahio sady mampiavy o oragneo amy ty ndaty maregne naho amy ty ndaty tsy maregne.
46 Fa naho ohatse ze ndaty tea anareo avao ro tea’areo, le inogne ty valesoa hoazo’areo? Tsy manao hoe izay ka vao o mpitake hetrao?
47 Naho ohatse ka ty rahalahi’areo avao ro salamae’areo, le inogne ty mampiambake ze raha atao’areo zay amy ty atao ty hafa? Tsy manao hoe izay avao ka vao o ndaty firenena hafao?
48 Tsy maintsy voririke manahake i Rae’areo an-dagnitse agney areke nareo.
Fagnamarehagne ambane peje
^ Ndra: “miambane naho mandefetse.”
^ Ndra: “ampijalegne.”
^ Abt: “Volagneko ama’areo to vata’e.”
^ Abt: “kadrana.” Karama o ndaty taloha tagnate ty 10 minitra teo ho eo ty kadrana raike.
^ Ndra: “nila lahilahy hafa.”
^ Andrianagnahare ty tea’e horehafegne.
^ Abt: “boake amy i ratỳ.”
^ Ndra: “mampijale.”
