1. Inogne ty soa ho rambesentikagne naho mahafale an’Andrianagnahare ty fanompoantikagne aze?

MIDARE naho mitari-dalagne antikagne aman-kasoa fagnahy ty Jehovah mba hahasoa antikagne. Ho sambatse sady hahavita hiatreke ze raha manahiragne maro tikagne naho mahafale an’Andrianagnahare ty fanompoantikagne aze. Hotahie’e naho hampea’e ka tikagne. (Isaia 48:17) Fivavahagne an-jato’e ty mirehake fa nao mampianatse ty maregne miomba an’Andrianagnahare. Faie sambe hafa ty raha ampianare iareo miomba aze naho ze raha andilia’e antikagne.

2. Akore ty amantaragne tie mahafale i Jehovah ty fanompoa’o aze sady inogne ty ohatse magnampe antikagne hahafantatse izay?

² Akore ty amantara’o fa mampifale i Jehovah ty fanompoagne anoe’o? Tsy le handineke naho hitsoeke ze raha ampianare ty fivavahagne amy hinane zao rehe. Fa ze raha ampianare ty Baiboly miomba ty fivavahagne maregne avao ro ianaro. Intoy misy ohatse: Raha manahiragne amy ty tane maro ty drala sandoke. Naho ampagnambahegne azo i drala sandokey, akore ty hagnambaha’o aze? Hikezake hipay ze karazan-drala sandoke vao rehe? Tsy izay. Toko’e handineke soa  i drala vata’ey rehe. Naho fa fanta’o soa ty famantaragne i drala vata’ey, le ho hai’o ty magnambake i drala sandokey. Hahay hagnambake ty fivavahan-diso ka rehe naho mianatse ty raha agnambahagne ty fivavahagne maregne.

3. Inogne ty raha rineha i Jesosy fa toko’e hataontikagne mba hiteàn’Andrianagnahare antikagne?

³ Soa ty manompo i Jehovah amy ze iteà’e aze. Maro ty mihevetse fa mampifale an’Andrianagnahare ze fivavahagne. Faie tsy izay ty ampianare ty Baiboly. Tsy ampe ty mirehake tie izaho fa Kirisitianagne. Hoe ty Jesosy: “Tsy ze mirehake amako, manao tihoe: ‘O Andriatompo, Andriatompo’, ro hizilike amy i Fanjakà i lagnitsey ao, fa ze manao ty zoton’arofon-dRaeko amy i lagnitsey ao.” Naho te ho teàn’Andrianagnahare tikagne, le toko’e hikezake hahafantatse naho hagnorike ze raha andilia’e. “Mpagnova lilitse” ty nanognona i Jesosy o ndaty tsy manao ty zoton’arofon’Andrianagnahareo. (Matio 7:21-23) Tsy misy dika’e manahake o drala tsieo ty fivavahan-diso sady misy voka’e raty.

4. Inogne ty teà i Jesosy ho rehafegne miomba i lalagne roe rey, le mbaia iaby iareo roe?

⁴ Sokafe i Jehovah agnatreha o ndatio eo i havelogne nainai’ey. Naho te ho velogne nainai’e amy i Paradisay ao tikagne, le toko’e hampifale aze ty fanompoagne anoentikagne naho ty fiaignantikagne. Mampanahelo fa maro ty tsy mete manao izay. Izay ty mahavy i Jesosy hanao tihoe tie: “Miziliha amy ty lalagne maifitse. Lahibey sady mivagnavagna ty lalagne mbamy i famonoagney mbeo, le maro ty mizilike agne. Maifitse ty lalagne mban-kavelogne mbeo, le tsiampe avao ty mahatrea aze.” (Matio 7:13, 14) Mitarike o ndatio mbamy i havelogne nainai’ey mbeo ty fivavahagne maregne. Fa ty fivavahan-diso mitarike o ndatio mbamy i famonoagney mbeo. Faie heje i Jehovah hisy ho mate o ndatio. Izay ty anto’e agnengà’e o ndatio hianatse ty miomba aze. (2 Petera 3:9) Miankigne amy ty fanompoantikagne an’Andrianagnahare ty hahavelogne ndra hahafate antikagne.

5. Akore ty amantarantikagne ty ndaty magnorike ty fivavahagne maregne?

⁵ Akore ty ahatreavagne “ty lalagne mban-kavelogne mbeo”? Nirehake ty Jesosy fa hibaribary amy ty fiaigna o ndatio tie magnorike ty fivavahagne maregne reke ndra tsy magnorike. Hoe reke: “Ty voa vokare’e ro hahafantara’areo aze. ... Ze hatae soa mamoa voa soa.” (Matio 7:16, 17) Izay ty magnamaregne fa ze raha inoa o ndatio amy i fivavahagne maregney naho ty havagnona’e ty amantaragne iareo. Tsy voririke iareo sady manao hadisoagne, faie mikezake mafe manao ty zoton’arofon’Andrianagnahare ty ankamaroa’e. Andao tikagne handineke raha enegne agnambahagne ty fivavahagne maregne.

6, 7. Akore ty fihevera ty mpanompo i Jehovah ty Baiboly sady inogne ty raha nanoe i Jesosy toko’e ho tsikombegne?

⁶ Mioregne agnate Baiboly ao ty fampianara’e. Hoe ty Baiboly: “Ty Soratse Masigne atoagne iaby le boake amy ty hery ty fagnahy masin’Andrianagnahare, soa hampianaragne, hanoroagne, hagnarenagne ze diso, hagnohagne amy ty hamaren-tane, mba hahavy ty ndatin’Andrianagnahare hahay soa naho ho ampe fitaovagne amy ty asa soa.” (2 Timoty 3:16, 17) Hoe ty apositoly Paoly tamy ze Kirisitianagne: “Rinambe’areo soa i saontsin’Andrianagnahare nitseize’ay tama’areoy, le tsy nirambese’areo ho reha o ndaty zay fa amy ty maha toe saontsin’Andrianagnahare aze.” (1 Tesalonianina 2:13) Tsy boake amy ty heve o ndaty ndra nirein-tsofigne avao ty raha inoa ze magnorike ty fivavahagne maregne naho ty raha anoe’e fa boake amy ty saontsin’Andrianagnahare.

⁷ Nagnomey ohatse ho tsikombegne ty Jesosy Kirisity. Ty Saontsin’Andrianagnahare ty nioregna ty fampianara’e. Izao ty raha rineha’e, naho fa nivavake tamy i Rae’e an-dagnitse agney: “Ty saontsi’o ro hamarenagne.” (Jaona 17:17) Nino ty Saontsin’Andrianagnahare ty Jesosy sady nampifanandrife’e tamy izay ze raha nampianare’e. Fireha’e tihoe: “Fa sinoratse tihoe.” (Matio 4:4, 7, 10) Nirehake andalan-teny reke naho fa avy nirehake izay. Tsy mampianatse ty heve’e ka ty mpanompon’ Andrianagnahare amy izao. Mino iareo fa Saontsin’Andrianagnahare vata’e ty Baiboly. Ampioregne’e agnate Baiboly ao ka ze fagnanaragne anoe’e.

8. Inogne ty agnisa ty fanompoagne i Jehovah?

⁸ I Jehovah raike avao ro tompoe iareo sady mampahafantatse ty tahina’e iareo. Hoe ty Jesosy: “I Jehovah Andrianagnahare’o ro ilolofa’o, le ie raike avao ty anoa’o fanompoagne masigne.” (Matio 4:10) Izay ty mahavy aze, i Jehovah raike avao ro tompoe ze mpivavake vata’e. Agnisa o fanompoagne iohoe ka ty fampahafantaragne ty tahina i Andrianagnahare maregney naho ty miomba aze. Hoe ty Salamo 83:18: “Ihe raike avao ro managne ty tahinagne tihoe, Jehovah, ro Ambone Bey ambone tane etoy.” Nanao raha ho tsikombegne ty Jesosy naho fa nagnampe o ndatio hahafantatse an’Andrianagnahare. Magnamaregne izay i vavake nanoe’e manao tihoey tie: “Fa nampahafantareko ty ndaty natolo’o ahy amy ty tontolo toy ty tahina’o.” (Jaona 17:6) Mampahafantatse ty tahinan’Andrianagnahare naho ty raha safirie’e vaho ty toetoe’e ka ze mpivavake vata’e amy izao.

9, 10. Akore ty ahatreavagne fa mifankatea ty Kirisitianagne vata’e?

⁹ Mifankatea vata’e iareo sady hatea tsy mipay vale’e ty aze. Hoe ty Jesosy: “Naho mifankatea nareo, le izay ty hahafantara ze kila ndaty fa mpianako nareo.” (Jaona 13:35) Nifankatea hoe izay ty Kirisitianagne voaloha’e. Naho manahake ty hatean’Andrianagnahare tikagne, le ho tea ze kila ndaty ndra inogn’inogne ty foko misy aze, ty karaza’e, ndra ty tanàgne misy aze. Mahavy ty ndaty hifankatea hoe ndaty tan-troke raike tsy mifankafoe o hatea iohoe. (Vakio Kolosianina 3:14.) Tsy mifankatea hoe tan-troke raike ty ndaty amo o fivavahan-disò ao. Inogne ty magnamaregne izay? Mifamono iareo, naho fa tsy miharo tanàgne ndra foko. Tsy mandrambe fialiagne hamonoagne ty mpiharo finoagne ama’e ndra ty ndaty hafa ty Kirisitianagne vata’e. Hoe ty Baiboly: “Izao ty ahafantaragne ze anak’Andrianagnahare naho ze ana i Devoly: Ze tsy manao ty maregne tsy boake aman’Andrianagnahare. Hoe izay ka ze tsy tea ty rahalahi’e. ... Mifankatea tikagne, tsy hagnorike  i Kaina, boake tamy ty raty le namono an-drahalahi’e tsy ampiheveagne.”—1 Jaona 3:10-12; 4:20, 21.

¹⁰ Tsy ampe ty tsy mamono ndaty, naho te hatorontikagne tie tea vata’e tikagne. Mahafoe ty andro’e naho ty heri’e vaho ty fanagna’e mba hifagnampeagne naho hifampionognagne ty Kirisitianagne vata’e. (Hebreo 10:24, 25) Manao ty maregne iareo sady mifagnampe, naho fa misy hasahiragne. ‘Manao soa amy ze kila ndaty’ iareo, fa izay ty toroheve ty Baiboly.—Galatianina 6:10.

11. Inogne ty mahavy antikagne magneke fa i Jesosy ty ampiasaen’Andrianagnahare handrombake o ndatio?

¹¹ Magneke iareo fa ampiasaen’Andrianagnahare handrombake o ndatio ty Jesosy. Hoe ty Baiboly: “Toe tsy misy ndaty hafa haharombake, fa tsy misy agnaragne natolotse o ndatio ka ty ambane lagnitsey handrombahagne antikagne.” (Asan’ny Apostoly 4:12) Treantikagne tamy i Toko faha-5 ao fa nanao sorogne ty fiai’e ty Jesosy mba handrombahagne ze ndaty mete anaragne. (Matio 20:28) Ie ka ty tinendren’Andrianagnahare ho Mpanjaka i Fanjakagne an-dagnitse agney, hifehe ty tane toy iaby. Mandily antikagne ty Andrianagnahare hagneke i Jesosy naho hagnorike ze fampianara’e, naho te ho velogne nainai’e. Izay ty irehafa ty Baiboly tie: “Ze manoro ty finoa’e i Anakey ro hanagne havelogne nainai’e. Fa ze tsy mete i Anakey anaragne, le tsy hahatrea havelogne.”—Jaona 3:36.

12. Inogne ty dika tihoe tsy agnisa ty tontolo toy?

¹² Tsy agnisa ty tontolo toy iareo. Hoe ty Jesosy naho fa tsinara i Pilato, mpitondra romana: “Tsy agnisa ty tontolo toy ty Fanjakàko.” (Jaona 18:36) Fehe ty Fanjakà i Jesosy ty Kirisitianagne vata’e ndra aia ndra aia ty tanàgne misy aze. Izay ty mahavy iareo tsy manao polotike sady tsy mandrambe anjara amy ty aly. Tsy mikalagne ty ndaty tsy hizilike amy ty polotike ndra ho agnisa ty ndaty ho jobognegne ndra hijobogne ty mpanompo i Jehovah. Faie magnorike ze lily anoe o ndaty mpitondrao iareo ndra tie tsy mizilike amy ty polotike. Inogne ty anto’e? Mandily iareo ‘hagneke ze manam-pahefàgne’ mitondra ty Baiboly. (Romanina 13:1) Naho fa  mifanipake amy ty lilin’Andrianagnahare ty raha andilia ty fitondràm-panjakagne, le magnorike ty reha i apositoly Paoly toy ty Kirisitianagne vata’e. Hoe reke: “Andrianagnahare fa tsy ndaty ty orihe’ay fa ie ro mpifehe anay.”—Asan’ny Apostoly 5:29; Marka 12:17.

13. Akore ty fihevera ze mpiana i Jesosy vata’e ty Fanjakàn’Andrianagnahare sady inogne ty raha atao iareo?

¹³ Ambara iareo fa ty Fanjakàn’Andrianagnahare avao ty tamae  o ndatio hagnafake ze raha mahaore aze. Hoe ty Jesosy: “Le ho tseizegne mbeombeo amy ty tane toy ty talily soa i Fanjakagney ho fitaliliagne amy ze kilakila o ndaty; vaho izay ho avy ty fara’e.” (Matio 24:14) Tsy mandrisike o ndatio hipay hevetse amy ty ndaty mpitondra mba hagnafake ze raha mahaore aze ty mpiana i Jesosy Kirisity. Ambara iareo fa ty Fanjakàn’Andrianagnahare avao ro tamae o ndatio hagnafake ze raha mahaore. (Salamo 146:3) Nampangatahe i Jesosy antikagne ty hiavia o fitondràm-panjakagne iohoe, naho fa nirehake reke tie: “Ho avy abey i Fanjakà’oy. Hanoegne an-tane etoy abey ze zoton’arofo’o hambagne amy ty an-dagnitse agne.” (Matio 6:10) Mirehake ty Baiboly fa o Fanjakagne an-dagnitse agne iohoe ty ‘hampipotepoteke naho handrava ze fanjakagne iaby [misy amy izao], fa i azey ro haharetse nainai’e.’—Daniela 2:44; Apokalypsy 16:14; 19:19-21.

14. Naho ty heve’o, ia ty fivavahagne mahafeno ze raha andilian’Andrianagnahare miomba ty fivavahagne maregne?

¹⁴ Vetsevetseo iaby i raha nianarantikagney, le dineho tie: ‘Ia ty fivavahagne mampiasa Baiboly mba hioregna ty fampianara’e? Ia ka ty mampahafantatse ty tahina i Jehovah? Ia ty fivavahagne mifankatea, mino i Jesosy, tsy agnisa ty tontolo toy sady magnambara fa ty Fanjakàn’Andrianagnahare avao ro tamaegne hagnafake ze raha mahaore o ndatio? Ia amy ty fivavahagne misy amy hinane zao ty mahambegne o raha rehoe?’ Mibaribary fa ty Vavaolombelo i Jehovah ty manao o raha rehoe.—Vakio Isaia 43:10-12.

15. Inogne ty raha andilian’Andrianagnahare antikagne ankoatse ty finoagne tie misy reke?

¹⁵ Tsy ampe ty mino an’Andrianagnahare, naho te hampifale aze rehe. Mirehake ty Baiboly fa ndra ty demonia mino fa misy reke. (Jakoba 2:19) Faie tsy manao ty zoton’arofo’e iareo sady hejen’Andrianagnahare. Naho te ho teàn’Andrianagnahare tikagne, le mino fa misy vata’e reke sady manao ze zoton’arofo’e. Misintaha amy ty fivavahan-diso tikagne sady magnoriha ty fivavahagne maregne.

16. Inogne ty toko’e hataontikagne, naho nifagnosehose tamy ty fivavahan-diso?

 ¹⁶ Natoro i apositoly Paoly fa tsy toko’e handrambe anjara amy ty fivavahan-diso tikagne. Hoe reke: “ ‘Miakara amy iareo ao, le miambaha’, hoe ty Jehovah. ‘Sady le lia’e ko mitsapa o raha malotò sasa’, ‘le ho rambeseko nareo.’ ” (2Korintianina 6:17; Isaia 52:11) Tsy manao raha misy ifandrambesa’e amy ty fivavahan-diso ty Kirisitianagne vata’e.

17, 18. Inogne ty atao tihoe “Babylona Jabajaba”, sady inogne ty anto’e toko’e hisintaha’o aze tsiela?

¹⁷ “Babylona Jabajaba” ty anognona ty Baiboly ze karaza fivavahan-diso iaby. * (Apokalypsy 17:5) Maniahy antikagne ty tanàn-taolo natao tihoe Babylona o agnaragne iohoe. Tagne ty niatomboha o fivavahan-disò, tafara ty Ranobey faha i Noa. Tagne ka ty niatomboha ty ankamaroa ty fampianaragne naho ty fombafomba anoe ty fivavahan-diso amy izao. Nivavake tamy ty andrianagnahare telo miharo raike o Babylonianao. Fampianaragne ioregna ty fivavahan-diso amy izao ka ty andrianagnahare telo miharo raike. Tsy miolakolake ty Baiboly, naho fa mirehake tie raike avao ty Andrianagnahare maregne. Tsy ia zay fa i Jehovah, sady Ana’e ty Jesosy Kirisity. (Jaona 17:3) Nino ka ty ndaty ta Babylona tagne fa managne fagnahy tsy mete mate o ndatio, le va’e handeha mbamy ty tane fampijaleagne reke naho fa mate. Mampianatse ka ty ankamaroa ty fivavahagne amy hinane zao fa managne fagnahy tsy mete mate o ndatio sady va’e hijale agn’afobey ty fagnahi’e.

¹⁸ Maregne vata’e, naho atao tihoe Babylona Jabajaba ze fivavahan-diso iaby, fa nameno tane i fivavahagne ta Babylona agney. Nisaontsy ty Andrianagnahare fa ho rava tampoke o fivavahagne iohoe. Fanta’o vao hinane zay ty anto’e toko’e hisintaha’o i Babylona Jabajaba? Teà i Jehovah Andrianagnahare ‘hiakatse ama’e ao’ tsiela rehe, fa mbe tsy tara.—Vakio Apokalypsy 18:4, 8.

19. Inogne ty raha ho azo’o naho manompo i Jehovah?

 ¹⁹ Va’e tsy hifagnosehose ama’o sasa ty ndaty ila’e, naho fa misintake ty fivavahan-diso rehe. Ambone ze raha afoe’o ty soa ho azo’o naho fa manompo i Jehovah miharo amy ty mpanompo’e rehe. Hahazo rahalahy naho rahavave kirisitianagne maro manahake i mpiana i Jesosy voaloha’e, nahafoe raha maro hagnorihagne i Jesosy rey rehe. Ho agnisa ty keleian-draike magnene-tane mifankatea rehe. Tsy ia o keleian-draike iohoe fa ty Kirisitianagne vata’e an-tapetrisa’e. Hitamà “havelogne nainai’e amy i tontolo ho avỳ” ao rehe. (Vakio Marka 10:28-30.) Naho fa ela ty ela, va’e handineke ty raha ampianare ty Baiboly avao ka i ndaty nalaigne ty finoa’o rey, sady va’e hanompo i Jehovah.

20. Hanao akore ty hiafarà ze ndaty magnorike ty fivavahagne maregne?

²⁰ Mirehake ty Baiboly fa marine handrava ty tontolo raty toy ty Andrianagnahare sady hagnoregne tontolo vaovao hitoboha ty hamaren-tane, le i Fanjakà’ey ty hifehe aze. (2 Petera 3:9, 13) Fanjaka vata’e i tontolo vaovao zay! Fivavahagne maregne raike avao ty hisy amy izay. Mahilala rehe, naho mikezake mafe manomboke amy izao hiharo amy ty mpivavake vata’e.