INOGNE ty raha le avy le azo’o dineke naho fa maharey ty rehake manao tihoe Andro Fitsaràgne? Maro ty mihevetse fa hindesegne ho tsaraegne tsikiraidraike agnatreha i sezan-droandrian’Andrianagnaharey mbeo ty ndaty agnarivo tapetrisa’e amo o andro iohoe. Hahazo valesoa ty ila’e, le hiaigne amy ty paradisa an-dagnitse agne. Ty ila’e ka hafàtse mba hijale nainai’e. Mifanipake amy izay ty agnazavà ty Baiboly ty atao tihoe Andro Fitsaràgne. Tsy mampatahotse o andro iohoe fa mampisy raha tamaegne, sady andro fagneregnagne amy ty nisy aze.

Hoe ty Apositoly Jaona miomba ty Andro Fitsaràgne amy Apokalypsy 20:11, 12: “Nahatrea sezan-droandriagne foty jabajaba raho, le nitreako ka i miambesatse ambone’eoy. Nibirirìgne tsy ho agnatreha’eo i taney naho i lagnitsey, sady le lia’e tsy nisy toeragne hisy iareo sasa. Talakeko ze nimate ndra bey ndra kede, nitsangagne taolo i sezan-droandriagney eo, le nisy horognam-boke vinelatse. Nisy horognam-boke raike ka vinelatse, i horognam-boke-kavelogney. Le sambe tsinara amy ze raha nanoe’e iaby o nimateo mifanandrife amy ze sinoratse amy i horognam-bokey ao.” Ia o Zizy hitsara rehafegneo?

I Jehovah Andrianagnahare ty Zizy fara’e ambone. Faie misy ndaty hafa nagnankigna’e i fitsaràgney. Nirehake ty Paoly amy Asan’ny Apostoly 17:31 ao “fa nanondro andro raike reke hisafiria’e ty hitsaràgne ty tane itobohagne toy, le ty hitsarà’e amy ty hamarenagne amy ty fampiasàgne ty lahilahy  raike fa noriza’e.” I Jesosy Kirisity nimate, faie vinelogne indraike ty Zizy tinendre’e. (Jaona 5:22) Ombia ty hanomboha i Andro Fitsaràgney? Sady haharetse fire taogne?

Atoro ty Boke i Apokalypsy fa hanomboke afara ty aly Hara-magedona o andro iohoe naho fa rava ty tontolo i Satana toy. * (Apokalypsy 16:14, 16; 19:19–20:3) Hogadraegne agnate ty arivo taogne amy i lavake tsikeokeokey agne ty Satana naho ty demonia’e naho fa tapetse o aly iohoe. Agnate o andro iohoe ao avao ka, le ho zizy ‘hiharo fitondragne amy i Kirisity an-dagnitse agne agnate ty 1 000 taogne’ o 144 000 mpiharo lova ama’e reo. (Apokalypsy 14:1-3; 20:1-4; Romanina 8:17) Tsy raha memeke hatao agnate ty 24 lera avao o Andro Fitsaràgne zao fa maharetse arivo taogne.

‘Hitsara ty velogne naho ty mate’ ty Jesosy agnate o arivo taogne rehoe. (2 Timoty 4:1) Ia o “velogne” rehoe? Ty ndaty “lahialegne” ho votso-belogne amy Hara-magedonay. (Apokalypsy 7:9-17) Nahatrea ‘ty mate nitsangagne taolo i sezan-droandriagney’ eo ka ty apositoly Jaona. Nampitamà ty Jesosy fa ‘hitsanogne ty feo’e ze an-kibory ao le hiakatse’, mba ho velomegne indraike. (Jaona 5:28, 29; Asan’ny Apostoly 24:15) Mifototse amy ty inogne ty fitsaràgne o ndaty rehoe?

“Nisy horognam-boke vinelatse”, hoe ty apositoly Jaona, “le sambe tsinara amy ze raha nanoe’e iaby o nimateo mifanandrife amy ze sinoratse amy i horognam-bokey ao.” (Apokalypsy 20:12) Ty raha natao i ndatỳ taloha vao ro trea agnate i horognam-bokey ao? Tsy ty raha natao’e taloha ty nimateza’e ro hitsaràgne aze. Akore ty ahafantarantikagne izay? Hoe ty Baiboly: “Ze mate le votsotse amy ty hakeo’e.” (Romanina 6:7) Azo rehafegne ho malio hakeo ty ndaty hovelomegne indraike. Hisy raha hafa mbe handilian’Andrianagnahare ty agnate o horognam-boke rehoe ao. Toko’e hagnorike ty lili’e hey ze ndaty te ho votso-belogne  amy i Hara-magedonay naho ze ndaty hovelomegne indraike naho te ho velogne nainai’e. Toko’e hagnorike ze lily vaovao andilia i Jehovah agnate i arivo taogney ka iareo. Ze raha atao o ndatio agnate i Andro Fitsaràgney ao ro hitsaràgne aze.

Ndaty agnarivo tapetrisa’e ty vaho samba’e hianatse naho hanao ty zoton’arofon’Andrianagnahare agnate i Andro Fitsaràgney. Izay ty magnambara fa hisy asa lahibey hanoegne mba hampianaragne iareo. ‘Hianatse ty hamarenagne [vata’e] ty ndaty amy ty tane toy.’ (Isaia 26:9) Faie tsy ze kila ndaty le ho vogno’e hanao ty zoton’arofon’Andrianagnahare. Hoe ty Isaia 26:10: “Ndra tie fa iferenaignagne o raty fagnahio, le mbe tsy hianatse ty hamarenagne. Ndra tie fa agnate ty tane misy hamaren-tane ao reke, le mbe hanao sata raty avao. Sady tsy hahatrea ty maha ambone i Jehovah o raty fagnahio.” Ho vonoegne amy i Andro Fitsaràgney ao ze ndaty raty fagnahy.—Isaia 65:20.

Naho fa ho tapetse i Andro Fitsaràgney, le ho velogne vata’e ze sisa tsy mate fa voririke. (Apokalypsy 20:5) Haheregne ho voririke indraike o ndatio, agnate i Andro Fitsaràgney. (1 Korintianina 15:24-28) Hisy tsapa hevetse fara’e naho fa avy eo. Hovotsoragne ty Satana sady hengàgne hamitake o ndatio fara’e. (Apokalypsy 20:3, 7-10) Ho avy amy ze mahalietse i Satana ty fampitamà ty Baiboly toy: “Ze ndaty maren-tane ro handova ty tane toy, sady ho velogne nainai’e etoy.” (Salamo 37:29) Ho fitahiagne hoahy ze ndaty tsy mivalike i Andro Fitsaràgney!