1. Inogne ty raha nisafirien’Andrianagnahare amy ty tane toy?

FANJAKA ty raha nisafirien’Andrianagnahare amy ty tane toy. Niteà’e ho feno ndaty salama naho sambatse ty tane toy. Mirehake ty Baiboly fa ‘namboatse tonda ta Edena ao ty Jehovah Andrianagnahare. Le nampitirie’e ao ze karazan-katae soasoa sady mampitelegne ive.’ Vaho izay ty Jehovah namboatse lahilahy naho ampela voaloha’e, le nampitobohe’e amy i tonda fanjakay ao. I Adama naho i Eva ty agnara iareo. Nisaontsy tamy iareo reke tie: “Manàgna taranake, le mangetseketseha amy ty tane toy.” (Genesisy 1:28; 2:8, 9, 15) Naho ty safirin’Andrianagnahare, le hiterake o ndatio sady hagnitatse i paradisay amy ty tane toy iaby vaho hikolokolo o bibio.

2. a) Akore ty ahafantarantikagne fa ho avy eo ze raha nisafirien’Andrianagnahare amy ty tane toy? b) Ia ty rehafe ty Baiboly fa ho velogne nainai’e ambone tane etoy?

² Naho ty eretsere’o, ho avy eo vao i safiry i Jehovah Andrianagnahare manao tihoey tie hiaigne amy ty paradisa ambone tane etoy o ndatio? Hoe reke: “Fa rinehako zay le  hefaeko.” (Isaia 46:9-11; 55:11) Atokisagne fa ho avy eo ze raha safirie’e! Nisaontsy reke fa “tsy tihoe tsy misy dika’e ty namboara’e [ty tane toy] fa namboare’e hitobohagne.” (Isaia 45:18) Ndaty manao akore ty teàn’Andrianagnahare hiaigne ambone tane etoy? Sady hiaigne etoy fire taogne? Mamale ty Baiboly tie: “Ze ndaty maren-tane ro handova ty tane toy, sady ho velogne nainai’e etoy.”—Salamo 37:29; Apokalypsy 21:3, 4.

3. Manao akore ty fiaignagne ambone tane etoy amy izao, le inogne iaby ty fagnonteneagne azo eretseretse?

³ Trea amy hinane zao fa mbe tsy avy eo zay. Marare naho mate o ndatio amy izao sady mialy naho mifamonovono avao. Nisy anto’e ty nahavy izay. Faie tsy manahake izao ty nisafirian’Andrianagnahare ty fiaignagne ambone tane etoy! Inogne ty raha niseho? Nagninogne ie tsy niavy eo ze raha nisafirien’Andrianagnahareo? Tsy mahavale izay ze boke tantara sinora o ndaty, fa tan-dagnitse agne ty niatomboha o raha manahiragneo.

4, 5. a) Ia maregne ty nirehake tamy i Eva, faie nampiasa menaragne hirehake ama’e? b) Akore ty hahavy ty ndaty raike ho mpangalatse ndra tie vagnogne naho manao ty maregne reke?

⁴ Mirehake ty boke voaloha’e agnate Baiboly ao fa nisy nandietse ty Andrianagnahare tamy i tonda i Edenay ao. “Menaragne” ty irehafagne aze ndra tie tsy biby. Atoro ty boke fara’e agnate Baiboly ao fa “ie ro atao tihoe Devoly naho Satana, mamitake ze tane misy ndaty.” “Menaragne tamboaloha’e” ka ty mbe irehafagne aze. (Genesisy 3:1; Apokalypsy 12:9) Nampiasa menaragne o anjely mahery iohoe hirehafagne tamy i Eva, soa atao tie i menaragney ro nirehake. Naho ty maregne, i Satana ro nirehake fa tsy i menaragney. Azo antoke fa nahatrea ty namboaran’Andrianagnahare ty tane hitoboha o ndatio toy reke.—Joba 38:4, 7.

⁵ Voririke iaby ze raha namboare i Jehovah. Ia ty namboatse i “Devoly” ndra i “Satana”? Naho boriboriegne, le nivalike  ho Devoly ty raike tamy ty anak’Andrianagnahare tan-dagnitse agne. Akore ty nahavy izay? Va’e hiova ho mpangalatse ty ndaty raike ndra tie nivagnogne naho nanao ty maregne. Fa nagnino? Ty anto’e, va’e hanagne fagniriagne raty reke. Naho eretserete’e avao i fagniriagney, le ho masake andoha’ao. Hampahavie’e eo i fagniria’ey amy ty fara’e naho fa misy raha mitsapa hevetse aze.—Vakio Jakoba 1:13-15.

6. Akore ty nahavy ty raike tamy i anak’Andrianagnahare rey ho Satana Devoly?

⁶ Izay ty raha niseho tamy i Satana Devoly. Nirei’e varagne i saontsin’Andrianagnahare tamy i Adama naho i Eva manao tihoey tie miteraha, le mangetseketseha amy ty tane toy. (Genesisy 1:27, 28) Va’e nieretseretse ty Satana tie: ‘Naho izaho ro nitompoe o ndatio fa tsy Andrianagnahare!’ Nisy fagniriagne raty nitiry ty tagnate fo’e ao. Finita’e ty Eva, le namorota’e vande miomba an’Andrianagnahare. (Vakio Genesisy 3:1-5.) Izay ty nahavy aze ho “Devoly” ndra “Mpandratiraty” naho “Satana” ndra “Mpandietse.”

7. a) Nagninogne ty Adama naho i Eva nimateo? b) Inogne ty anto’e maha antetse naho mahafate ze tarana i Adama?

⁷ Navande naho namitake ty Satana Devoly, le nitarike i Adama naho i Eva tsy hagnorike an’Andrianagnahare. (Genesisy 2:17; 3:6) Izay ty nahavy iareo nimate. Toe fa nisaontsy ty Andrianagnahare fa ho mate iareo naho tsy mete anaragne. (Genesisy 3:17-19) Tsy voririke sasa ty Adama naho fa nanagne tahigne. Izay ty nahavy ty tarana’e handova hakeo. (Vakio Romanina 5:12.) Manahake ty moly fagnendazagne mofo zay. Naho ohatse kemake i moly fagnendazagne mofoy, manao akore ze mofo amboaregne ama’e? Le kemake iaby, sa tsy izay? Manahake izay ka o ndatio, fa nandova hakeo boake amy i Adama. Izay ty mahavy ze kila ndaty ho antetse naho ho mate.—Romanina 3:23.

8, 9. a) Inogne ty tognom-bande nanoe i Satana? b) Nagninogne i mpivalike rey tsy le avy le vinonon’Andrianagnahareo?

⁸ Nitaogne ty hafa hivalike ty Satana naho fa nagnoveove i Adama naho i Eva tsy hagnorike an’Andrianagnahare.  Nandratiraty ty fitondrà i Jehovah reke, sady hoe te hirehake tie: ‘Tsy mahay minday ty Andrianagnahare. Mandagnitse reke, sady misy raha soa toko’e ho nimeigne ze mpanompo’e faie tsy mei’e iareo. Tsy mipay an’Andrianagnahare hinday aze o ndatio. Iareo avao ty mahafantatse ty soa naho ty raty amy ty fiaigna’e. Ho soa ty fiaigna iareo naho izaho ty minday aze.’ Inogne ty raha nanoen’Andrianagnahare  amy ze tognom-bande naho i fandratiratiagne aze zay? Misy mihevetse fa toko’e ho vinono avao o mpivalike reo. Ho nifantatse vao ty vale ty tognom-bande nanoe i Satana? Ho nagnamaregne ka vao zay fa ty fitondràn’Andrianagnahare ro soa?

⁹ Tsy misy tsiko’e ty fanoa i Jehovah ty raha vantagne, izay ty tsy le avy le namonoa’e i mpivalike rey. Nandigne taogne maromaro reke soa tie hahatreavagne fa mpavande ty Satana Devoly sady diso ty tognom-bande nanoe’e. Nengà’e hifampitondra o ndatio, faie i Satana ty mifehe aze. Amy Toko faha-11 ao tikagne vaho handineke ty anto’e nanoa i Jehovah izay naho ty nahavy aze nandigne ela handaminagne o raha manahiragne iohoe. Toko’e hieretseretse tikagne tie: Nimete vao ty nagnoriha i Adama naho i Eva i Satana, ie amy izao tsy mba nanao soa iareo? I Jehovah ty nagnomey iareo ze kila raha. Le ho mete vao ty anoagne aze mpandagnitse raty fagnahy? Akore ty ho natao’o naho ihe ro i Adama naho i Eva?

10. Akore ty anohagna’o i Jehovah mba hamalea’o ty tognom-bande nanoe i Satana?

¹⁰ Toko’e hodinehentikagne zay, fa miatreke fagnonteneagne manahake izay ka itikagne hinane zao. Naho fa manohagne i Jehovah rehe, le magnamaregne fa diso ty tognom-bande nanoe i Satana. Mampibaribary ty maha mpavande i Satana rehe naho magneke fa i Jehovah ro Mpitondra azo. (Salamo 73:28; vakio Ohabolana 27:11.) Mampanahelo fa tsy ampe amy ty ndaty an-tapetrisa’e mitoboke an-tane etoy ty manao izay. Izao ty fagnonteneagne lahibey toko’e ho eretseretegne: Mirehake vata’e vao ty Baiboly fa i Satana ty mitondra ty tontolo toy?

11, 12. a) Hazavao fa ty tsapa hevetse nanoe i Satana tamy i Jesosy ty magnamaregne fa i Satana ty mifehe ty tontolo toy. b) Inogne ka ty magnamaregne fa i Satana ty mifehe ty tontolo toy?

¹¹ Tsy mba nimahimahigne ty Jesosy nirehake fa i Satana  ty mifehe ty tontolo toy. Nanao sahàtse ndra fahagagagne tama’e ty Satana, mba hanoroa’e “ze fanjakagne an-tane etoy naho ty voninahy o fanjakagne rehoe.” Vaho izay reke nampitamà tie: “Homeiko azo iaby reo naho miondreke agnatrehako eto indraike avao rehe.” (Matio 4:8, 9; Lioka 4:5, 6) Dineho hey zao: Le ho tsapa hevetse i Jesosy vao zay naho tsy i Satana ty mifehe o fanjakagne rehoe? Tsy nandietse ty Jesosy fa i Satana ty mifehe o fanjakagne rehoe. Ho niliere i Jesosy zay naho tsy i Satana ty nifehe aze.

¹² Maregne fa i Jehovah ro Andrianagnahare Tompo ty Hery naho Mpamboatse ze kila raha iaby. (Apokalypsy 4:11) Faie tsy mirehake ty Baiboly tie i Jehovah Andrianagnahare ndra i Jesosy Kirisity ty mifehe ty tontolo toy. Naho ty maregne, le nirehake ty Jesosy fa i Satana ty “mpifehe ty tontolo toy.” (Jaona 12:31; 14:30; 16:11) Mirehake ka ty Baiboly fa i Satana Devoly ro “andrianagnahare ty tontolo toy.” (2 Korintianina 4:3, 4) Hoe ty apositoly Jaona miomba o mpandietse iohoe: “Ty tontolo toy ro fehe i ratỳ.”—1 Jaona 5:19.

13. Inogne ty anto’e ipaliantikagne tontolo vaovao?

¹³ Isan-taogne ty tontolo toy magnoho-doza. Maro ty maramila mialy, ty mpanao polotike manao ty raha tsy maregne, ty mpitarike fivavahagne manao soa miatreke naho ty mpamono ndaty. Hoe fa tsy misy fagnafoli’e sasa ty tontolo toy. Mirehake ty Baiboly fa marine hampibaibay ze ndaty raty fagnahy ty Andrianagnahare, amy ty aly Hara-magedona. Hisy tontolo vaovao hitoboha ty hamaren-tane ty afara izay.—Apokalypsy 16:14-16.

14. Ia ty jinobon’Andrianagnahare ho Mpitondra i Fanjakà’ey, le inogne ty raha nirehafegne miaolo miomba ty Mpanjaka’e?

¹⁴ Jinobo i Jehovah ty Jesosy Kirisity mba ho Mpitondra ty Fanjakà’e an-dagnitse agne. Fa ela bey ty nirehafa ty Baiboly fa: “Misy ajaja naterake ho antikagne, anak’ajaja lahilahy ro  homeigne antikagne, ho antsoro’eo ty fahefan-droandriagne. Ty agnara’e hatao tihoe ... Roandria ty Fiadanagne. Tsy ho tapetse i fahefagne lahibey anagna’e zay.” (Isaia 9:6, 7) Nampianare i Jesosy hivavake ty miomba o fitondragne iohoe ze mpanonjohy ty lia’e tie: “Ho avy abey i Fanjakà’oy! Hanoegne an-tane etoy abey ze zoton’arofo’o hambagne amy ty an-dagnitse agne!” (Matio 6:10) Hianarantikagne afarafara agne fa kidikidike ty sisa’e, le hagnafake ze fitondragne an-tane etoy ty Fanjakàn’Andrianagnahare, le i azey amy izay ty hisolo iareo. (Vakio Daniela 2:44.) Naho fa vita zay, le hagnova ty tane toy ho paradisa ty Fanjakàn’Andrianagnahare.

15. Inogne ty atao tihoe “tane vaovao”?

¹⁵ Izao ty raha rehafe ty Baiboly: ‘Faie amy i fampitamàn’Andrianagnaharey tikagne ro mandigne lagnitse vaovao naho tane vaovao hitoboha ty hamaren-tane.’ (2 Petera 3:13; Isaia 65:17) Tsy ty tane itobohagne toy avao ro rehafe ty Baiboly tihoe “tane” fa ze ndaty mitoboke ama’e etoy ka. (Genesisy 11:1) O “tane vaovao” hitoboha ty hamaren-tane zao, ndaty teàn’Andrianagnahare.

16. Inogne ty raha fanjaka ho mein’Andrianagnahare ze ndaty teà’e, le inogne ty toko’e hataontikagne naho te hahazo izay?

¹⁶ Nampitamà ty Jesosy fa ho meagne “havelogne nainai’e” ze ndaty teàn’Andrianagnahare naho fa ho avy i tontolo vaovaoy. (Marka 10:30) Sokafo amy i Jaona 3:16 naho ty Jaona 17:3 i Baiboli’oy, le vakio ze raha nirehafe i Jesosy fa toko’e hataontikagne mba hivelomagne nainai’e. Dineho agnate Baiboly ao ka ty ndaty fagneva ty hahazo o raha fanjaka boake aman’Andrianagnahare iohoe naho fa Paradisa ty tane toy.

17, 18. Akore ty atokisantikagne fa hiadagne naho tsy hisy raha hatahora’e ty ndaty amy ty tane toy iaby?

¹⁷ Tsy hisy sasa ty haratiagne, ty aly, fifamonovonoagne naho ty hampiarotegne. “Tsy hisy sasa ty ndaty raty  fagnahy ... Ze ndaty mpandefetse avao ro handova ty tane toy.” (Salamo 37:10, 11) Hisy fiadanagne, fa ‘hajanon’Andrianagnahare ze aly an-tane etoy.’ (Salamo 46:9; Isaia 2:4) “Le hahazo lalagne ty ndaty maren-tane sady ho bey ty fiadanagne naho mbe misy avao i volagney.” Ty dika izay haharetse nainai’e ty fiadanagne!—Salamo 72:7.

¹⁸ Tsy hisy raha hampatahotse aze ze mpanompo i Jehovah. Tsy nisy raha nampatahotse aze o Isiraelitao naho fa nagnorike ty fagnanaran’Andrianagnahare. (Levitikosy 25:18, 19) Tsy hisy raha hampatahotse ka ty amy i Paradisay ao, fa ho soa ty fiaignagne!—Vakio Isaia 32:18; Mika 4:4.

19. Akore ty ahafantarantikagne fa ho maro ty hanegne amy i tontolo vaovaoy ao?

¹⁹ Tsy hisy keré. Izao ty raha nihirae ty ndaty mpanoratse salamo: “Hahavokatse ty tane toy, le ndra ty ambone vohitsey ho vokatse iaby.” (Salamo 72:16) Ho tahie i Jehovah ze ndaty maregne sady ‘hahavokatse ty tane’ toy.—Salamo 67:6.

20. Inogne ty mahavy antikagne matoky fa ho paradisa ty tane toy iaby?

²⁰ Ho paradisa ty tane toy iaby. Ho feno tragno naho tonda fanjaka ty tane sinimba o ndaty behakeò toy. (Vakio Isaia 65:21-24; Apokalypsy 11:18) Hamboleagne ty tane toy, fa ho fanjaka sady hahavokatse hanahake i tonda i Edenay, naho fa ela ty ela. ‘Hamelatse ty fità’e’ ty Andrianagnahare, le ‘hagnomey ze hahafaha-po ty fagniria ze raha miaigne.’—Salamo 145:16.

21. Akore ty ahafantarantikagne fa ho mpiragnetse ty ndaty naho ty biby?

²¹ Ho mpiragnetse ty ndaty naho ty biby. Hiharo fihinagne ty biby hako naho ty biby harégne. Ndra ty anak’ajaja tsy hatahotse ty biby masiake amy izao.—Vakio Isaia 11:6-9; 65:25.

22. Hatao akore o aretegneo?

²² Tsy hisy sasa ty aretegne. Fa nampijangagne ndaty marare ty Jesosy tamy tie mbe nivelogne tambone tane etoy. Faie  mbe ambone izay ty hamaro ty ndaty ho salama naho fa Mpanjaka ty Fanjakàn’Andrianagnahare an-dagnitse agne reke. (Matio 9:35; Marka 1:40-42; Jaona 5:5-9) Amy ze andro zay “tsy hisy sasa ty ndaty hanao tihoe: ‘Marare raho.’ ”—Isaia 33:24; 35:5, 6.

23. Hahafale antikagne ty mahafantatse fa ho velogne indraike o ndaty nimateo. Inogne ty anto’e?

²³ Ho velomegne indraike o longontikagne nimateo, sady va’e le lia’e tsy ho mate sasa. Hovelomegne indraike ze ndaty nimate, faie ze agnate ty fivetsevetsean’Andrianagnahare avao. “Toe hisy [vata’e] ty famelomagne ze maregne naho ze tsy maregne.”—Asan’ny Apostoly 24:15; vakio Jaona 5:28, 29.

24. Akore ty fahatreava’o tihoe hiaigne amy ty Paradisa an-tane etoy zay?

²⁴ Fiadanagne ty mandigne ze ndaty mianatse ty miomba i Jehovah, Mpamboatse Lahibey, naho ze mijobogne hanompo aze! I Paradisa an-tane etoỳ ty teà i Jesosy ho rehafegne naho fa nampitamà i ndaty raty nihantogne tagnila’eoy reke. Hoe reke: “Hiharo amako amy i Paradisay agne rehe.” (Lioka 23:43) Toko’e hianatse ty miomba i Jesosy Kirisity tikagne naho te hahazo o fitahiagne rehoe fa boake ama’e ty hahazoagne aze.