Mora ama’o vao ty magnorike ze raha rehafe i Baba naho i Nene?... Misy andro mahasarotse izay. Fanta’o vao fa nagnorike ty saontsy i Jehovah vaho ty reha i baba’e naho i rene’e ty Jesosy?... Hagnampe azo hagnorike ze raha rehafe i Baba naho i Nene ty raha nanoe i Jesosy. Andao tikagne hianatse miomba ty raha nanoe’e.

Niharo taman-drae’e Jehovah tan-dagnitse agne heike ty Jesosy taloha ty niavia’e an-tane etoy. Faie nanagne rae naho rene an-tane etoy ka reke. I Josefa naho i Maria ty agnara’e. Akore ty nahavy iareo ho rae naho rene i Jesosy?...

Nafindra i Jehovah tagnate trò i Maria ao ty fiay i Jesosy. Izay ty nahavy aze hiaigne an-tane etoy. Mahalatsa ty raha manao izao! Nivesare i Maria manahake o ajaja vesaregneo ka ty Jesosy. Naho fa nifeno sive volagne ty Maria vaho niterake aze. Izay ty mahavy i Maria naho i Josefa ho rae naho ho rene i Jesosy naho fa niavy an-tane etoy reke.

Natoro i Jesosy ty hatea’e i Jehovah naho fa nifeno 12 taogne reke. Nisy andro iareo keleian-draike nandeha lavitse fa hamonje Pasake a Jerosalema agne. Naho fa niheregne ty Josefa naho i Maria, le tsy nitrea iareo ty Jesosy. Fanta’o vao tie nimbaia ty Jesosy?...

Niheregne tsiela mba Jerosalema mbeo indraike ty Josefa naho i Maria nipay i Jesosy. Nivalike ty loha iareo fa tsy nitrea iareo ty Jesosy. Telo andro tafara izay vaho nitrea iareo tamy i hazomangay tao reke. O hazomanga zao tragno bey naoregne hivavahagne amy i Jehovah. Inogne ty nahavy i Jesosy niheo tamy i hazomangay ao?... Tao ty nianara’e ty miomba i Jehovah Rae’e. Teà i Jesosy ty Jehovah, le izay ty nahavy aze te hianatse ze raha hampifalea’e aze. Nimete anaragne nanomboke tamy tie mbe nikede ty Jesosy le niente’e bey avao. Nagnorike ty fagnanara i Jehovah ty reke ndra tie ninday haoreagne tama’e ty fanoagne izay. Nagnorike ty fagnanara i Josefa naho i Maria ka vao ty Jesosy?... Eka. Mirehake izay ty Baiboly.

Akore ty anahafa’o i Jesosy?... Toko’e hagnorike ty fagnanara i Baba naho i Nene ka rehe ndra tie sarotse. Ho vita’o vao ty hanao izay?...