LESOGNE 37
Ino ty Rehafe ty Baiboly Miomba ty Asa Naho ty Vola?
Fa nisy fotoagne vao rehe nivali-doha tamy ty asa ndra tamy ty vola? Misy fotoagne tsy mora tihoe sady mipay ze raha ilaentikagne ro mbe manompo i Jehovah amy ty fo ka. Faie misy torohevetse afake magnampe antikagne amy izay ty amy Baiboly ao.
1. Ino ty rehafe ty Baiboly miomba ty asa?
Tea i Jehovah hankamamy ty asa anoentikagne tika. Mirehake ty Baiboly fa ‘tsy misy mahasoa o ndatio mihoatse tihoe ... mifale noho ty asa mafe atao’e.’ (Mpitoriteny 2:24) Ndra i Jehovah ka aza miasa mafe. Mampifale aze tika sady afa-po naho fa mazoto miasa manahake aze.
Tena ilaegne ty miasa, faie tsy toko’e ho igne ka ro hanjare lahibey noho ty fanompoantikagne i Jehovah. (Jaona 6:27) Mampitamà reke fa hagnomey ze raha ilaentikagne naho ty fanompoagne aze ro ataontikagne voalohan-draha amy ty fiaignantikagne.
2. Akore ty toko’e hiheverantikagne o volao?
Mirehake ty Baiboly tie ‘fiarovagne o volao’, faie mampitao ka reke fa tsy o volao ro tena mahasambatse antika. (Mpitoriteny 7:12) Risihe’e areke tika mba tsy ho tea vola fa “hionogne amy ze fa eo.” (Vakio ty Hebreo 13:5.) Mora kivy ndra soregne lava ty ndaty tsy mete afa-po fa te hahazo raha avao. Faie tsy hoe izay tikagne naho mionogne amy ze anagnantikagne. Tsy voatere hitrosa ka tika. (Ohabolana 22:7) Ankoatse izay, le tsy ho voatarike hiloka tika ndra hanao ty raha rehafegne tie maha mpagnarivo malaky.
3. Ino ty fomba soa azo ampiasagne o volao?
Andrianagnahare matarike ty Jehovah. Manahake aze tikagne naho ‘matarike sady tea mizara.’ (1 Timoty 6:18) Tea mizara tika naho mampiasa ty volantikagne mba hanohagnagne o fiangonagneo naho hagnampeagne ze sahiragne, lohotsie fa o mpiharo finoagne amantikagneo. Tsy ty hamaro ty vola meintikagne ro lahibey amy i Jehovah fa ty anto’e mahavy antikagne hagnomey. Ho sambatse tikagne sady hampifale i Jehovah naho magnomey amy ty fo.—Vakio ty Asan’ny Apostoly 20:35.
ANDAO HANDINEKE TY PITSOPITSO’E
Ho treantikagne ato tie ino ty soa ho azontikagne naho tsy tondregne loatse amy ty asa tika sady afa-po amy ze anagnantikagne.
4. Meo voninahitse ty Jehovah naho fa miasa rehe
Toko’e ho trea amy ty fomba fiasantikagne tie nama i Jehovah tika. Alefaso i VIDEO oy, sady iharò midineke ty fagnonteneagne retoa:
-
Arake i video oy, nanao akore ty toetse i Jason naho fa tam-piasagne agne? Ino ty tena tea’o amy i toetse’ey?
-
Ino ty natao’e mba hahavy aze tsy ho tondregne loatse amy ty asa?
Vakio ty Kolosianina 3:23, 24, sady iharò midineke ty fagnonteneagne toy:
-
Nagnino ro lahibey tihoe miasa amy ty fo?
Tena ilaegne ty miasa, faie tsy toko’e ho io ka ro lahibey mihoatse ty fanompoantikagne i Jehovah
5. Mandrambe soa tika naho fa mahay mionogne
Maro ty ndaty tsy afa-po fa mipay vola bey avao. Faie hafa ty torohevetse mey ty Baiboly. Vakio ty 1 Timoty 6:6-8, sady iharò midineke ty fagnonteneagne toy:
-
Ino ty ampanoe ty Baiboly antikagne?
Afake ty ho sambatse tikagne ndra tie tsy manan-draha maro aza. Alefaso i VIDEO oy, sady iharò midineke ty fagnonteneagne toy.
-
Nagnino i keleiagne tamy i video teo rey ro sambatse ndra tie tsy ampe avao aza ty vola nanagna’e?
A manao akore ka naho fa ampe soa ty volantikagne faie mbe te hahazo avao tika? Trea boake amy i fagnoharagne nirehafe i Jesosỳ fa magnoho-doza zay. Vakio ty Lioka 12:15-21, sady iharò midineke ty fagnonteneagne toy:
-
Inogne ty lesogne rambese’o boake amo o fagnoharagne iohoe?—Henteo ty andine’e 15.
Vakio sady ampitahao ty Ohabolana 10:22 naho ty 1 Timoty 6:10. Iharò midineke ty fagnonteneagne retoa naho fa avy eo:
-
Naho ty heve’o, ino ty tena lahibey: Ty mifandrambe soa amy i Jehovah vao sa ty manam-bola bey? Ino ty anto’e?
-
Ino iaby ty olagne va’e hiseho naho tsy afa-po tikagne fa mipay vola bey avao?
6. Hagnomey ze raha tena ilaentikagne ty Jehovah
Va’e hanagne olagne amy ty asantikagne tika ndra va’e tsy ampe ty volantikagne. Akore ty ampisehoantikagne fa matoky i Jehovah tika? Alefaso i VIDEO oy, sady iharò midineke ty fagnonteneagne retoa.
-
Inogne iaby ty olagne nahazo i rahalahy tamy i video teoy?
-
Ino ty natao’e mba hiatrehagne i olagne rey?
Vakio ty Matio 6:25-34, sady iharò midineke ty fagnonteneagne toy:
-
Ino ty ampitamae i Jehovah antikagne naho ty fanompoagne aze ro ataontikagne voalohan-draha amy ty fiaignantika?
MISY TY MIREHAKE TIE: “Tsy vitako ty mivory isan-keregnandro satria tsy maintsy miasa mafe raho mba hamelomako ty keleiako.”
-
Ino ty andinin-teny mahavy azo ho rese lahatse tie, ty manao voalohan-draha ty fanompoagne i Jehovah ty fara’e soa?
FAMINTIGNAGNE
Ilaegne o asao naho o volao, faie tsy toko’e hengantikagne hagnelengelegne ty fanompoantikagne i Jehovah reo.
Fameregnagne
-
Ino ty hagnampe azo tsy ho tondregne loatse amy ty asa?
-
Ino ty soa ho rambese’o naho afa-po amy ze raha anagna’o rehe?
-
Akore ty ampisehoa’o fa matoky rehe tie hagnomey ze raha ilae ty vahoa’e ty Jehovah?
FAGNAZAVAGNE FAGNAMPE’E
Mirehake vao ty Baiboly tie raty o volao?
“O Volao vao ty Foto ze Raha Raty Iaby?” (Lahatsoratse amy jw.org ao)
Ino ty toko’e hataontikagne naho teantikagne ho fale ty Jehovah naho fa magnomey tika?
“Ino ty Rehafe ty Baiboly Miomba Tihoe Magnomey?” (Lahatsoratse amy jw.org ao)
Tsy mampagninogne vao ty miloka?
“Ty Fihevera ty Baiboly—o Filokagneo” (Mifohaza! Marsa 2015)
Ino ty nampiova ty lahilahy raike mpiloka sady mpangalatse toy?
“Tena Tea Korsa Sovala Raho” (Fitalakesan-davitse 1 Novambra 2011)
Va'e ho Tea'o Ka
FAGNONTENEAGNE FAPETRA O NDATIO
Inogne ty Atao Tihoe Fianaragne Baiboly?
Afake mampiasa ze Baiboly tea’o rehe naho fa mianatse Baiboly amy ty Vavolombelo i Jehovah. Maimaimpoagne i fianaragney sady afake taone’o hiarake hianatse ama’o ka ty keleia’o ndra ty ragne’o.
