Nanomboke nitory hoe izao ty Jesosy tafara i badisa’ey: ‘Fa marine i Fanjakàn’Andrianagnaharey.’ Nagnorike aze mba Galilia naho mba Joda mbeo i mpiana’e rey. Niheregne ta Nazareta agne, tanàgne nahabey aze reke naho fa niavy eo, le nilitse tamy i synagogay ao. Sinoka’e ty boke Isaia, le namaky reke tie: ‘Nagnomey fagnahy masigne ahy ty Jehovah mba hahafahako mitory i talily soay.’ Izao ty dika izay, ndra tie fahagagagne ty teà o ndatio hanoe’e, le ty hitory i talily soay ty anto’e lahibey nahazoa’e i fagnahy masigney. Hoe reke tamy iareo: ‘Tanterake androany ze faminaniagne zay.’

Nandeha tamy ty Ria i Galilia agne ty Jesosy naho fa niavy eo, le tagne ty nifankatreava’e tamo o mpiana’e mpagnarato reo. Nitaone’e iareo tie: ‘Andao hagnorike ahy, fa hataoko mpagnarato ndaty nareo.’ Intoa ty agnara iareo: I Petera, i Andrea, i Jakoba naho i Jaona. Le avy le nenga iareo i harato iareoy, fa nagnorike aze iareo. Nitory ty Fanjakà i Jehovah tamy ty tanà i Galilia iareo. Nitory tamy i synagogay ao, tan-tsena ey, naho tan-dalagney iareo. Maro ty ndaty nagnorike iareo. Nanjare nalaza ty Jesosy, le naharey aze iaby ndra ty a Syria agne.

Nimea i Jesosy hery ka ty mpiana’e ila’e, le afake nagnasitragne naho nandroake demonia. Nagnorike aze tamy ze tane nitoria’e ty mpiana’e ila’e. Maro ty ampela nanjare nino aze, agnisa izay ty Maria Magdalena, i Johana, i Sosana naho ty ila’e nikarakara i Jesosy naho o mpiana’e reo.

Nirahe i Jesosy hitory i mpiana’e rey naho fa boake nampiofagne’e. Maro ty ndaty nanjare mpiana i Jesosy naho natao badisa, naho fa nitory ta Galilia agne iareo. Maro ty nagniry ho mpiana’e, le izay ty nahavy i Jesosy nagnohatse aze tamy ty teteke feno vokatse. Le hoe reke: ‘Mangataha amy i Jehovah mba handefasa’e mpiasa maro hamory o vokatseo.’ Nifily mpianatse 70 ka reke tafara izay, le nandefa iareo tsikiroedroe hitory a Joda agne. Ndaty isan-karaza’e  ty nampianare iareo miomba i Fanjakagney. Naho fa niheregne i mpianatse rey, le nifale nitantara tamy i Jesosy ty raha niseho. Tsy mahakalagne o asa fitoriagneo ty Devoly.

Nandrisike o mpiana’eo mba hanohy hitory avao ty Jesosy, tafara ty niheregna’e tan-dagnitse agne. Hoe reke: ‘Torio magneneke ty tane toy i talily soay. Ampianaro o ndatio ty saontsy i Jehovah, le anò badisa iareo.’