Nisy maramila Romana manam-boninahitse raike ty ta Kaisaria tao. Kornelio ty agnara’e. Nagnaja aze o Jiosio, satria tea magnampe ty ndaty mijale reke. Nino i Jehovah ty Kornelio sady nivavake tsy tapake. Nisy anjely niseho tama’e tie indraike. Hoe i anjelỳ: ‘Nijanjigne ty vavake anoe’o ty Andrianagnahare. Magniraha ndaty ho amy i Petera a Jopa agne rehe, le ampangalao ho ama’o atoy reke.’ Le avy le nandefa ndaty ho agne ty Kornelio, ndra tie eo amy ty 50 kilometatse eo ho eo ty misy i Petera.

Nahatrea fahitagne ty Petera tamy reke mbe ta Jopa agne. Biby faly o Jiosio ty nitrea’e. Nisy feo nampihinagne aze i biby rey faie niliere’e tie: ‘Biby maloto an’ireo.’ Le hoe i feoy: ‘Ko atao maloto ze fa nilioven’Andrianagnahare.’ Le nisy ndaty nirehake tamy i Petera tie: ‘Misy ndaty telo mipay azo ty an-dalagne ao. Akia rehe ho mbeo.’ Nagnontenea i Petera ty foto-dia i ndaty rey. Le hoe iareo: ‘I Kornelio, maramila Romana ty nandefa anay. Tea’e ho ama’e a Kaisaria agne rehe.’ Nasae i Petera hijanogne ama’e ao hey i ndaty rey ty hariva igne. Ie nimaray igne, le nandeha niarake tamy  iareo ty Petera naho ty rahalahy ila’e ta Jopa ao.

Niondreke ty Kornelio naho fa nahatrea i Petera. Faie hoe ty Petera: ‘Mitsangàna fa ndaty manahake azo avao raho. Nirahen’Andrianagnahare ho ama’o atoy raho ndra tie tsy mandeha amo o Zetilisao ty Jiosy. Ino ipalia’o ahio?’

Le hoe ty Kornelio: ‘Nivavake tamy i Jehovah raho efatse andro lasa zay. Le nisy anjely nampagnirake ahy tama’o agne. Mba ampianaro ty saontsy i Jehovah zahay.’ Le hoe ty Petera: ‘Fantako hinane zao fa tsy mifily volo o ndaty ty Jehovah. Fa ze ndaty te hanompo aze, le eke’e iaby.’ Nampianare’e raha maro miomba i Jesosy iareo. Le nizotso tamy i Kornelio naho ze ndaty teo i fagnahy masigney, le natao badisa iareo.