Indraike andro naho fa nandeha irery ty Eva, le nisy menaragne nirehake tama’e tie: ‘Nao zao tsy teà i Jehovah hohane’areo ze voan-katae ato?’ Hoe ty Eva: ‘Raike avao ty voan-katae tsy azo’ay hanegne, satria hahafate anay.’ Hoe i menaragney: ‘Tsy ho mate nareo, fa hanahake an’Andrianagnahare naho mihinagne ama’e.’ Voafitake ty Eva. Arakarake ty nagnentea i Eva i voan-kataey ty nahavy aze te hihinagne ama’e. Nihinagne reke, le nimea’e ka ty Adama. Fanta i Adama fa ho mate iareo naho tsy mankatò an’Andrianagnahare, faie le nihinagne avao reke.

Tamy izay ty Jehovah le nagnontane i Adama naho i Eva tie nagnino iareo nanao izaio. Nagnomey tsiny i menaragney ty Eva, le i Adama ka nagnomey tsiny i Eva. Niroahe i Jehovah boake amy i tete i Edenay ao iareo fa tsy nankatò. Anjely naho mesabey mirehetse ty nampiambene i Jehovah ty lala i tetekey.

Hosazeagne hoe ty Jehovah ze namitake i Eva. Tsy nampirehafe i Jehovah o menaragneo fa anjely raty atao tihoe Satana Devoly ro nampirehake aze, mba hamitahagne i Eva. Hovonoe i Jehovah ty Satana amy ty fara’e, mba tsy hahafaha’e mamitake o ndatio sasa.