Nitoboke ta Midiana agne tagnate ty 40 taogne ty Mosesy. Nanambaly naho nanagn’anake reke. Tamy ty indraike naho fa niarake tamy i Vohitse Sinay agne reke, le nahatrea raha nahagaga. Nisy voaroy nirehetse faie tsy nimae. Naho fa niharine mbeo ty Mosesy, le naharey feo boake agnate i raha mirehetsey ao tie: ‘O Mosesy! Ko miharine mbetoagne rehe. Sady afaho i kapay fa tane masigne itsangana’ò!’ I Jehovah nisaontsio, faie anjely ty nampirehafe’e.

Natahotse ty Mosesy, le tinako’e ty tarehe’e. Hoe i feoy: ‘Treako ty fijalea o Israelitao. Hagnavotse iareo amo o Ejipsianao raho, le hinday iareo amy i tane soay agne. Ihe ty hampitariheko o vahoakò boake Ejipta agne.’ Nitampoke i Mosesy ze raha zay.

Hoe ty Mosesy: ‘Ino ty havaleko naho magnontane iareo tie ia ty nagnirake ahy?’ Hoe ty Andrianagnahare: ‘Rehafo iareo tie i Jehovah Andrianagnahare i Abrahama, Isaka naho i Jakoba ty nagnirake ahy.’ Hoe ty Mosesy: ‘Akore naho tsy mitsanogne ahy iareo?’ Nagnomey porofo i Mosesy ty Jehovah mba hatokisa’e aze. Nampanorahe’e i Mosesy an-taneo i kobai’ey. A tie ndra nanjare meregne aia i kobaigney! Rinambe i Mosesy amy i ohi’ey i meregney, le nanjare kobaigne indraike. Hoe ty Jehovah: ‘Izay ty hahafantara o ndatio fa izaho ty nagnirake azo.’

Hoe ty Mosesy: ‘Izaho anio saro-drehake!’ Le hoe ty Jehovah tama’e: ‘Hovolagneko ama’o ty raha horehafe’o sady ho ama’o ty Arona rahalahi’o hagnampe azo.’ Fanta i Mosesy fa hagnampe aze ty Jehovah, le niente’e hiheregne a Ejipta agne ty valy aman’ana’e.