Talake an-dafinete ty tragno i Ahaba mpanjaka a Jezirela ao, ty tanem-boalobo i Nabota. Teà i Ahaba i tanem-boalobokey, le ho vinili’e tamy i Nabota. Tsy nimete ty Nabota, satria tsy nengà i Jehovah havarotse o lovao. Niboseke ty Ahaba, le tsy nipaoke hiakatse naho hihinagne.

Hoe ty Jezebela vali’e, i Mpanjaka vave raty fagnahỳ: ‘Ihe ty mpanjaka o Israelio. Azo’o zay naho alae’o. Ao fa halaeko ho azo zay!’ Nanoratse taratasy hoahy ty androanavi-pagnahy tao reke, mba hagnaratiratia iareo i Nabota. Nanignentigne an’Andrianagnahare hoe reke ty Nabota, le toko’e ho torahem-bato. Neké i androanavy rey ty reha’e, le hoe ty Jezebela tamy i Ahaba: ‘Mate ty Nabota, le azo amy izay i tanem-boalobo’ey.’

Maro ty mpanompo i Jehovah fa vinono i Jezebela fa tsy i Nabota raike avao. Nanompo sampy sady nanao raha raty maro reke. Vazoho i Jehovah iaby ze raha raty nanoe’e zay. Akore ty hatao i Jehovah aze?

Nimate ty Ahaba, le i Jorama ana’e ty nanjare mpanjaka. Nirahe i Jehovah ty Jeho mba hanaze i Jezebela naho ty keleia’e.

Nitingitse galesa mba Jezirela mbeo ty Jeho, fa agne ty nipetraha i Jezebela. Nitingitse galesa nanalaka aze ka ty Jorama, le nagnontane aze tie: ‘Mpiragnetse hao itikao kahe? Tsy mpiragnetse zao tika naho mbe manao raty avao ty Jezebela rene’o.’ Nahody i Jorama i galesa’ey fa nao reke hilay. Tinify i Jeho folesidoro reke le nimate.

Nimbamy i Jezebela mbeo ty Jeho naho fa niavy eo. Nagnisy makiaze  ty Jezebela naho fa nifanta’e tie ho mbeo ty Jeho. Namboare’e ka i volo’ey, le nandigne tan-dafineteo reke. Nasiatsiaha’e ty Jeho naho fa niavy. Le hoe ty Jeho tamy i mpiasa i Jezebela rey: ‘Atontao ambane agne reke!’ Natonta iareo boake an-dafinete ey ty Jezebela le nimate.

Vinono i Jeho ka ty ana i Ahaba 70 lahy sady nifoagna’e ty fivavahagne tamy i Bala. Vazoho i Jehovah vata’e ty raha raty anoe o ndatio, faie mandigne ty fotoagne mete ama’e avao reke le hanaze iareo.