I Ahaba ty niraty fagnahy vata’e tamy ty mpanjaka raty fagnahy tamo o Israelio. Nanambaly ampela raty fagnahy ka reke, i Jezebela ty agnara’e. Nivavake tamy i Bala reke sady nitaone iareo mirovaly ka o Israelio. Nivonoe’e ka ty mpaminany i Jehovah. Nagnirake i Elia mpaminany ty Jehovah mba hirehake i Ahaba.

Hoe ty Elia tamy i Ahaba: ‘Tsy ho avy ty oragne a Israely eto fa raty toetse rehe.’ Le tsy nisy vokatse tagnate ty telo taogne, sady tsy nisy raha ho hanegne. Nampiherégne i Jehovah tamy i Ahaba agne ty Elia tafara izay. Le hoe ty Ahaba: ‘Ihe avao ty nahavy izao.’ Le hoe ty navale i Elia aze: ‘Ty fivavaha’o amy i Bala avao ty nahavy izao fa tsy izaho. Avorio ambone ty Vohy i Karmela agne o vahoakeo naho o mpaminany i Balao, le ho trea eo ty Andrianagnahare vata’e.’

Naho fa vory i vahoakey, le hoe ty i Elia: ‘Tapaho ty heve’areo. I Jehovah vao sa i Bala ty Andrianagnahare vata’e? Ampanò fagnatetse o mpaminany i Bala 450 reo, le ampitokavo iareo ty Bala. Izaho ka hanao fagnatetse hoahy i Jehovah, le hitoka aze. Faie ze mampipoke afo ro Andrianagnahare vata’e.’ Neké i vahoakey izay.

Nagnomagne fagnatetse o mpaminany i Balao. Nitoka i Bala iareo tie: ‘Mba toigno zahay!’ Tsy nanoigne ty Bala, le nitsikike iareo ty Elia tie: ‘Tokavo mafe fa va’e mbe miroro zay le mila fohazegne.’ Nifanehake ty toka avao iareo, faie tsy nisy nanoigne.

Nanao fagnatetse tambone i alitaray eo ka ty Elia, le nisia’e rano ty amboney. Nivavake reke tie: ‘O Jehovah, anò fanta ty ndaty retoa fa ihe ty Andrianagnahare vata’e.’ Le nandefa afo ty Jehovah handevogne i fagnatetsey. Nikorake o ndatio tie: ‘I Jehovah ro Andrianagnahare vata’e!’ Hoe ty Elia: ‘Vonò iaby o mpaminany i Balao.’

Naho vaho nisy rahogne kedekede ty tambone i riakey ey, le hoe ty Elia tamy i Ahaba: ‘Ho avy i oragney. Itingiro o galesa’ò, le mandenà moly.’ Nimainte i rahogney sady  nisy tiobey, le niavy bey i oragney. Tampetse amy izay i hamain-taney. Nente i Ahaba nilay mafe i galesa’ey faie nahalay mihoatse aze ty Elia, satria nampea i Jehovah. Hilamigne amy izay vao ty fiaigna i Elia?