“Nibey tamy ty tanàgne kedekede raike amy ty faritse avaratse agne raho” tasa i Dauda boake a Sierra Leone agne. “Indraike andro zay tamy tie raho mbe nikede, le nisy aly tane raike tamy ty keleiako naho ty keleiagne raike hafa. Sambe nisenge ho tompo i taney iareo. Mba handaminagne i olagney, le nitokavegne ze ambiasa raike zay. Nimea’e fitaratse raike i lahilahy raike hafay, ie naho fa niavy eo le nisarome’e lamba foty. Tsy ela tafara izay i lahilahy tagnate i lambay ao nanomboke nititike sady nitsemboke. Naho fa nagnente i fitaratsey reke le nikoiake hoe izao: ‘Mahatrea lahilahy antetse raike magnatogne raho! Manao akanjo foty reke. Lava sady antetse reke, foty volo vaho somare mivokoke naho fa mandeha.’

“I Dadabey nirehafe’e zay! Naho fa avy eo reke le nitaitaitse manahake o minegneo, sady nikorakorake hoe izao: ‘Naho tsy mino ty rehako nareo le avia hagnente!’ Mazava hoaze fa tsy nisy ndra raike tama’ay aza nahavany nanao izay! Nampitony aze tamy ty alala ty fifangaroan-draha nisy raven-katae naho rano, nitamirie’e tagnate ty siny ao i ambiasay.

“Nirehake tamy ty alala i lahilahỳ tagnate fitaratse ao ty ‘Dadabey’ sady nirehake fa ty keleia’ay ty tompo i taney. Nirehake tamy i bebeiko reke fa tsy toko’e hatahotahotse reke ty hiasa amy i taney. Nagneke i fitsaràgney i keleiagne raikey. Nilamigne i raharahay.”

Mateteke fitrea ty raha miseho hoe izay Afrika Ahandrefagne agne. Manahake ty faritse magneran-tane avao ka ty ao, le ndaty an-tapetrisa’e tsy hay isahegne ro mino fa o ndaty mateo le mifindra mbamy ty tontolo ara-pagnahy agne, mba hahafaha iareo mandineke naho manan-kery amy ty fiaigna ty ndaty ambone tane etoa. Maregne vao ze finoagne zay? Velogne vata’e vao o ndaty mateo? Naho tsy izay, le ia areke o misenge ho fagnahy (esprits) o ndaty mateo? Tena lahibey ty fahafantaragne ty vale’e maregne miomba o fagnonteneagne reo. Iankigna ty aigne zay.