Tsy haharetse nainai’e ty famitaha i Satana o ndatio. Fa nandroake aze boake an-dagnitse agne ty Jehovah. (Apokalypsy 12:9) Tsy ho ela, le hanao raha hikalagnagne i Satana naho i demonia’e rey ty Andrianagnahare. Tamy ty fahitagne raike azo’e boake aman’Andrianagnahare ty apostoly Jaona, le nirehake tie: “Nitreako fa nisy anjely nizotso boake an-dagnitse agne nitagne ty lakilé i lavake tsikeokeokey naho seny bey tan-tagna’ey. Tsinepa’e i dragogney, i menaragne tam-boaloha’e tagney, le i Devoly naho Satana, sady rinohi’e agnate ty 1 000 taogne, le natora’e mafe tamy i lavake tsikeokeokey ao. Sady hinily i anjelỳ naho nasia’e tampò i lavakey, mba tsy hahafaha i dragogney hamitake o firenenao sasa amparake ty itampera i 1 000 taogney.” (Apokalypsy 20:1-3) Horinganegne nainai’e ty Devoly naho i demonia’e rey afara agne.​—Apokalypsy 20:10.

Hofoagnagne iaby ka ze ndaty raty an-tane etoa.​—Salamo 37:9, 10; Lioka 13:5.

Afara i famonovonoagne i Satana naho i demoniay rey, le hinday fitahiagne maro hoahy ty tarana o ndatio ty Jehovah. Va’e tsiaro’o fa tsy misy aigne o ndaty nimateo. Nampitovie i Jehovah amy ty ndaty azon-droro sady le tena tsy misy raha rendre’e ty ndaty tra o fahafatezagneo. (Jaona 11:11-14) Nanao izay reke satria fanta’e fa ho avy ty andro hifohaza i ndaty miroro an-kibory ao rey ho amy ty fiaignagne indraike. Hoe reke: “Ho avy ty andro hahareiza ze an-kibory agne ty feo’e, Le hiakatse iareo.”​—Jaona 5:28, 29; ampitahao amy ty Asan’ny Apostoly 24:15.

Haheregne amy ty fiaignagne ambone tane etoa indraike iareo. Tsy fagnambaragne miomba ty fahafateza o ndaty sasa ty ho rey ty amy izay, fa fagnambaragne feno hafaleagne miomba ty ndaty naheregne amy ty fiaignagne indraike! Hanao akore koahe ty hafaleagne ho tsapa naho fa handrambe i ndaty tsy foen-troke rey boake an-kibory agne!