Misy o fagnahio (esprits)! Amo o faritse ara-pagnahy tsy trea masò agne, le misy ty fagnahy (esprits) raty naho ty fagnahy (esprits) soa. Boake niaigne naho mate tan-tane etoa vao iareo?

Aha’a. Naho fa mate ty ndaty raike, le tsy mifindra amy ty tontolo ara-pagnahy agne, arake ty fihevera o ndaty marò aze. Nagnino tikagne ro mirehake izay? Satria izay ty rehafe ty Baiboly. O Baibolio, le boke misy ty hamarenagne boake amy i Andrianagnahare maregney, i managne tahinagne tihoe Jehovah-y. I Jehovah ty namorogne o ndatio. Fanta’e soa ze raha manjò iareo naho fa mate iareo.​—Salamo 83:18; 2 Timoty 3:16.

Rehafe ty Baiboly fa namboatse i Adama, i lahilahy voaloha’ey “tamy ty lembon-tane” ty Andrianagnahare. (Genesisy 2:7) Napetra’e tamy ty Teteke atao tihoe Edena reke, i Paradisay. Naho nankatò ty lalà i Jehovah ty Adama le tsy ho nimate. Mbe ho nivelogne tan-tane etoa reke hatrake amy izao. Faie naho fa nisatry raha nandika ty lalàn’Andrianagnahare reke, le hoe ty Andrianagnahare tama’e: “[Hiheregne] amy ty tane rehe, fa boake amy ty tane ty nangalagne azo. Lemboke rehe, le hiheregne amy ty lemboke indraike.”​—Genesisy 3:19.

Ino ty dika izay? Eretsereto moa: Taia ty Adama taloha ty namorogna i Jehovah aze boake amo o lembokeo? Tsy taia. Tsy tihoe fa nifagnahy (esprits) tan-dagnitse agne ka reke. Mbe tsy nisy reke. Naho fa nisaontsy areke ty Jehovah tie ‘hiheregne amy ty tane’ ty Adama, le ty tea’e ho saontsiegne le tihoe ho mate ty Adama. Tsy nandeha mbamy ty faritse ara-pagnahy agne reke. Naho fa mate ty Adama, le nanjare tsy nisy aigne indraike, ty dika izay nanjare tsy nisy indraike. Ty fahafatezagne le ty tsy fisia o aigneo.

Faie manao akore o ndaty mateo? Tsy misy ka vao iareo? Izao ty vale’e mea ty Baiboly:

• “Sambe mandeha amy ty toeragne raike iareo iaby. Boake amy ty lemboke iareo [o ndatio naho o bibio] iaby, sady hiheregne amy ty lemboke.”​—Mpitoriteny 3:20.

• “Ty mate tsy misy raha rendre’e.”​—Mpitoriteny 9:5.

• “Fa foagne ka ty hatea’e naho ty falaigna’e vaho ty fialogna’e.”​—Mpitoriteny 9:6.

• “Tsy misy afake miasa, ndra magniry hanao raha, ndra mahazo fahalalagne, ndra maneho fahendreagne ty an-kibory agne.”​— Mpitoriteny 9:10.

• “Miheregne tamy ty tane reke [o ndatio]. Amy i andro igne avao le fa foagne ty eretsere’e.”​—Salamo 146:4.

Sarotse ekegne vao ty fahatreava’o o andinin-teny reo? Naho izay, le eretsereto zao: Amy ty ankamaroa o keleiagneo, le o lahilahio ty mikarama mba hameloma’e i keleia’ey. Naho fa mate reke, le mateteke mijale i keleia’ey satria sahiragne. Misy fotoagne aza tsy manam-bola hivilianagne hanegne i valy aman’ana’ey. Va’e hagnararaotse ty raha sarotse iaigna iareo ty fahavalo i lahilahỳ. Dineho amy izay zao: ‘Naho velogne amy ty tontolo ara-pagnahy agne i lahilahỳ, le nagnino reke ro tsy manohy mikarakara i keleia’ey? Nagnino reke ro tsy miaro i keleia’ey amy ty ndaty raty?’ Satria maregne ty raha rehafe o andinin-teny reo. Tsy misy aigne i lahilahỳ, le tsy afake manao ndra ino ndra ino.​—Salamo 115:17.

Midika vao zay fa tsy ho velogne sasa i ndaty mate rey? Aha’a. Hirehake miomba ty famelomagne ty mate tikagne afara ao. Midika io fa tsy mahafantatse ze raha atao’o o ndaty mateo. Tsy afake mahatrea azo, ndra maharey azo, ndra mirehake ama’o iareo. Tsy toko’e hatahotse iareo rehe. Tsy afake magnampe azo iareo, sady tsy afake magnisy raty azo ka.​—Mpitoriteny 9:4; Isaia 26:14.