Hafaha i Jehovah ze kila raha raty natao i Satana ambone tane etoa. Natao i Jehovah Mpanjaka ty tane toy iaby ty Jesosy. Hiheregne ho paradisa indraike ty tane toy naho fa ho fehezé’e.​—Daniela 7:13, 14; Lioka 23:43.

Mampitamà ty raha retoagne ty Jehovah:

• HANEGNE MARO: “Hahavokatse vata’e ty tane toy. Ho tahien’Andrianagnahare tikagne, le i Andrianagnaharentikagney.” “Hahavokatse ty tane toy, le ndra ty ambone vohitse ey aza, ho vokatse iaby.”​—Salamo 67:6; 72:12.

• TSY HISY ALY SASA: “Avia henteo ty asa i Jehovah, le ty raha mahagaga atao’e an-tane etoa. Atao’e tsy misy aly sasa ty magneran-tane.”​—Salamo 46:8, 9.

• TSY HISY NDATY RATY: “Ze ndaty mpanao raty habaibay ... Fa kedekedeke avao ty sisa le tsy hisy sasa ty ndaty raty fagnahy. Handineke ty nisy aze rehe faie tsy ho eo sasa iareo.”​—Salamo 37:9, 10.

• TSY HISY ARETEGNE, NDRA ALAHELO, NDRA FAHAFATEZAGNE: “Hampagnentégne ty maso ze goa, sady hampahareizegne ty sofy ze karegnegne. Amy ze andro zay avao ka le hahay manganike vohitse manahake o serfao ty kepeke, hivolagne ty lela o moagneo.”​—Isaia 35:5, 6.

  “Hiharo fiambesatse amy iareo eo reke, le ho ndati’e iareo, fa Andrianagnahare ro ho amy iareo eo. Le hofafa’e ze ranomaso amy ty maso iareo, fa tsy hisy sasa ty fate, ty alahelo ndra ty toreo ndra ty fanaintaignagne, fa tsy eo iaby ty raha taloha.”​—Apokalypsy 21:3, 4.

Tsy mandagnitse manahake i Satana naho o demoniao ty Jehovah. Tsy maintsy avy eo iaby ze raha ampitamae’e. (Lioka 1:36, 37) Tea azo ty Jehovah sady tea’e hiaigne amy i Paradisa hamboare’ey ao rehe. Mipaliava Vavolombelo i Jehovah areke rehe mba hahafaha’o hianatse ty miomba ty hamarenagne fanjaka agnate ty Saontsin’Andrianagnahare ao. Naho mampihatse ty hamarenagne amy ty fiaigna’o rehe, le ho afake amy ty fagnandevoza ty vande, ty finoanoam-poagne vaho ty tsy fahafantaragne. Amy ty fara’e rehe, le ho afake amy ty fagnandevoza ty fahotagne naho ty fahafatezagne. Izao ty raha nirehafe i Jesosy: “Ho fanta’areo ty maregne, sady hagnafake anareo ty maregne.”​—Jaona 8:32.