1. Inogne ty fagnirian’Andrianagnahare hoahy o ndatio?

SOA ty fagnirian’Andrianagnahare hoahy o ndatio. Namboatse i Adama naho i Eva, lahilahy naho ampela voaloha reke, le natobo’e amy ty tonda fanjaka iareo. Fagniria’e tihoe hiterake iareo sady hagnitatse i paradisay amy ty tane toy, le hikarakara o bibio.—Genesisy 1:28; 2:8, 9, 15; henteo ty Fagnazavagne 6.

2. a) Akore ty ahafantarantikagne fa ho avy eo ty fagnirian’Andrianagnahare? b) Ia ty rehafe ty Baiboly fa hiaigne nainai’e?

² Mieretseretse vao rehe fa hiaigne amy i paradisay ao vata’e tikagne? Misaontsy amantikagne ty Jehovah tie: “Fa rinehako zay le hefaeko.” (Isaia 46:9-11; 55:11) Maregne zay! Hanoen’Andrianagnahare iaby ze raha fa nisafirie’e sady tsy hisy hahasakagne aze. Misaontsy ty Jehovah fa misy anto’e ty namboara’e ty tane toy. “Tsy tihoe tsy misy dika’e ty namboara’e aze.” (Isaia 45:18) Teàn’Andrianagnahare hiaigne ambone tane etoy o ndatio. Ndaty manao akore ty teàn’Andrianagnahare hiaigne an-tane etoy sady hatrake ombiagne? Hoe ty Baiboly: “Ze ndaty maren-tane [ndra, mete anaragne] ro handova ty tane toy, sady ho velogne nainai’e etoy.”—Salamo 37:29; Apokalypsy 21:3, 4.

3. Inogne ty va’e hagnontenea’o naho fa trea’o marare naho mate o ndatio?

³ Marare naho mate ty ndaty amy hinane zao. Mialy naho mifamono ka ty ndaty amy ty tane maro. Azo antoke fa tsy izay ty fagnirian’Andrianagnahare. A vaho inogne  ty raha niseho sady inogne ty anto’e? Ty Baiboly avao ty magnazava izay.

4, 5. a) Ia ty nirehake tamy i Eva tamy i tonda i Edenay ao, faie nampiasa menaragne? b) Akore ty hahavy ty ndaty raike mpanao ty maregne ho mpangalatse?

⁴ Rehafe ty Baiboly fa managne fahavalo ty Andrianagnahare. “Devoly naho Satana” ty irehafagne aze. Nampiasa menaragne ty Satana hirehafagne tamy i Eva tamy i tonda i Edenay ao. (Apokalypsy 12:9; Genesisy 3:1) Le hoe mirehake ty nanoa’e i menaragney.—Henteo ty Fagnazavagne 7.

⁵ Namboatse i Satana Devoly vao ty Andrianagnahare? Tsy izay, fa nisy anjely tan-dagnitse agne tamy ty i Jehovah namboatse ty tane toy hitoboha i Adama naho i Eva, niova ho Devoly. (Joba 38:4, 7) Akore ty nahavy izay? Akore ty hahavy ty ndaty raike mpanao ty maregne ho mpangalatse? Tsy tihoe vaho aterake reke, le fa mpangalatse. Faie va’e hagniry ty raha tsy aze reke, le hitombo i fagniria’e zay naho fa eretserete’e lognandro. Mangalatse amy izay reke naho fa misy raha mitsapa hevetse aze. Ie avao ty nahavy aze ho mpangalatse.—Vakio Jakoba 1:13-15; henteo ty Fagnazavagne 8.

6. Akore ty nahavy ty anjely raike ho fahavalon’Andrianagnahare?

⁶ Izao ty raha niseho tamy i anjelỳ. Tafara ty namboara i Jehovah i Adama naho i Eva, le nitsipeza’e rano iareo mba hiterake naho ‘hameno ty tane toy.’ (Genesisy 1:27, 28) Va’e nieretseretse o anjely iohoe tie: ‘Naho mba izaho ty nitompoe o ndatio fa tsy i Jehovah!’ Nanjare nagniry ty raha toko’e hoahy i Jehovah reke naho fa nieretseretse izay. Teà i anjelỳ hivavake ama’e o ndatio. Le navandeza’e naho finita’e ty Eva. (Vakio Genesisy 3:1-5.) Izay ty nahavy aze ho Satana Devoly sady ho fahavalon’Andrianagnahare.

7. a) Inogne ty nahavy i Adama naho i Eva ho mate? b) Inogne ty mahavy antikagne ho antetse naho ho mate?

 ⁷ Tsy nagnorike ty saontsin’Andrianagnahare ty Adama naho i Eva fa nihinagne ty voa i hataey. (Genesisy 2:17; 3:6) Nanota tamy i Jehovah iareo, le nimate fa izay ty nisaontsie i Jehovah tamy iareo. (Genesisy 3:17-19) Mate ka ty tarana i Adama naho i Eva fa nandova ota. (Vakio Romanina 5:12.) Hagnampe antikagne hahafantatse ty anto’e nahavy ty tarana i Adama naho i Eva handova ota ty ohatse toy. Ohatse zao magnendy mofo amy ty moly raike kemake rehe. Ho kemake manahake i molỳ ka ze mofo endazegne ama’e. Nanjare mpanota ty Adama naho fa tsy nitsanogne an’Andrianagnahare. Tarana i Adama tikagne, le “kemake” manahake aze ka ndra mpanota. Izay ty mahavy ze kila ndaty ho antetse naho ho mate.—Romanina 3:23; henteo ty Fagnazavagne 9.

8, 9. a) Inogne ty teà i Satana hinoa i Adama naho i Eva? b) Inogne ty nahavy i Jehovah tsy le avy le namono i mpivalike rey?

⁸ Nanomboke nanohetse i Jehovah ty Satana naho fa nitaogne i Adama naho i Eva tsy hagnorike ty lilin’Andrianagnahare. Natao’e ze hinoa i Adama naho i Eva tie mpandagnitse ty Jehovah sady mpitondra raty fagnahy tsy magniry ze hahasoa iareo. Nirehake ty Satana fa tsy mipay an’Andrianagnahare hanoro ze toko’e hatao’e o ndatio. I Adama naho i Eva avao hoe reke ty toko’e hanapa-kevetse amy ty soa naho ty raty. Inogne ty natao i Jehovah? Azo’e natao ty namono i mpanohetse rey sady nisakagne i fanoheragne azey. Faie ho nagnaporofo vao izay fa mpavande ty Satana? Aha’a, tsy ho nagnaporofo.

⁹ Tsy le avy le vinono i Jehovah i mpandietse rey. Nengà’e hifampitondra hey o ndatio. Izay ty ahatreavagne tie mpavande ty Satana, sady ho trea ka tie i Jehovah ty mahafantatse ze raha hahasoa o ndatio. Izay ty hianarantikagne amy Toko faha-11 ao. Mete vao ty fanapaha-keve  i Adama naho i Eva sa tsy mete? Mete vao ty tsy nagnoriha iareo ty saontsin’Andrianagnahare, fa ninoa iareo ty reha i Satana? I Jehovah ty nagnomey i Adama naho i Eva ze kila raha. Nimea’e fiaignagne voririke, toeragne fanjaka hitobohagne naho asa mahafinaritse iareo. Fa i Satana tsy mba nagnomey raha soa hoahy iareo. Akore ty ho natao’o naho tao rehe tamy izay?

10. Inogne ty fanapaha-kevetse lahibey toko’e hataontikagne tsikiraidraike?

 ¹⁰ Misy fanapaha-kevetse toko’e ho rambesentikagne ka ty amy hinane zao sady iankigna ty fiaintikagne. Afake mifily i Jehovah ho Mpitondra antikagne tika sady magnorike ty lili’e hagnaporofoagne fa mpavande ty Satana. Ndra itikagne, mifily i Satana ho mpitondra antikagne. (Salamo 73:28; vakio Ohabolana 27:11.) Ndaty tsy ampe avao ty magnorike ty lilin’Andrianagnahare amy hinane zao. Toe tsy i Andrianagnahare ty mpifehe ty tontolo toy. A vaho ia ty mifehe aze?

11, 12. a) Inogne ty fantantikagne naho fa natolo i Satana i Jesosy ty tontolo toy? b) Aia ty andalan-teny mirehake tie i Satana ty mifehe ty tontolo toy?

¹¹ Fanta i Jesosy tie ia ty mpifehe ty tontolo toy. ‘Natoro i Satana aze iaby tie indraike ze fanjakagne amy ty tontolo toy naho ty voninahy o fanjakagne rehoe.’ Nampitamae i Satana ka ty Jesosy tie: “Ho meiko azo iaby reo naho miondreke agnatrehako eto indraike avao rehe.” (Matio 4:8, 9; Lioka 4:5, 6) Dineho tie: ‘Ho natolo i Satana i Jesosy vao o fanjakagne rehoe naho tsy aze?’ Tsy ho natolo’e. Ahy i Satana ty fitondràm-panjakagne an-tane etoy.

¹² Va’e hieretseretse rehe tie: ‘Akore ty nahavy i Satana ho mpifehe ty tontolo toy? Tsy i Jehovah Andrianagnahare Tompo ty Hery vao ty namboatse ze kila raha?’ (Apokalypsy 4:11) Maregne zay, faie fa nirehafe i Jesosy mazava soa tie i Satana ty “mpifehe ty tontolo toy.” (Jaona 12:31; 14:30; 16:11) Hoe ty apositoly Paoly, “andrianagnahare ty tontolo toy” ty Satana Devoly. (2 Korintianina 4:3, 4) Hoe ka ty apositoly Jaona, “ty tontolo toy ro fehe i ratỳ.”—1 Jaona 5:19.

13. Inogne ty mahavy antikagne hipay tontolo vaovao?

¹³ Miharaty sady magnoho-doza lognandro ty tontolo toy. Treantikagne amy ty magnodidigne antikagne fa misy ty aly, aferafera, fihatsarambelatsihy naho vonoagne ndaty. Tsy misy ndaty mahavita magnafake o haratiagneo ndra tie mikezake mafe. Fa marine ty handravàn’Andrianagnahare ty tontolo raty toy amy ty aly Hara-magedona, le hosoloa’e tontolo vaovao hitoboha ty ndaty maregne.—Apokalypsy 16:14-16; henteo ty Fagnazavagne 10.

14. Ia ty jinobon’Andrianagnahare ho Mpanjaka i Fanjakà’ey, le inogne ty fa nirehafe ty Baiboly mialoha miomba i Jesosy?

¹⁴ Nanendre i Jesosy Kirisity ho Mpanjaka ty Fanjakà’e an-dagnitse agne ty Jehovah. Fa arivo taogne lasa ty nirehafa ty Baiboly tie ho “Roandria ty Fiadanagne” ty Jesosy, le tsy hisy fara’e ty fitondràm-panjakà’e. (Isaia 9:6, 7) Nampianatse ze mpanonjohy ty lia’e ty Jesosy mba hivavake tihoe: “Ho avy abey i Fanjakà’oy! Hanoegne an-tane etoy abey ze zoton’arofo’o hambagne amy ty an-dagnitse agne!” (Matio 6:10) Hianarantikagne amy Toko faha-8 ao tie, akore ty hisoloa ty Fanjakàn’Andrianagnahare o fitondrà o ndatio. (Vakio Daniela 2:44.) Vaho izay ty Fanjakàn’Andrianagnahare hagnova ty tane toy ho paradisa.—Henteo ty Fagnazavagne 11.

15. Inogne ty atao tihoe “tane vaovao”?

¹⁵ Hoe ty fampitamà ty Baiboly: ‘Hisy lagnitse vaovao naho tane vaovao hitoboha ty hamarenagne, le izay ty lignisantikagne.’ (2 Petera 3:13; Isaia 65:17) Misy fotoagne ty Baiboly naho mirehake “tane”, le ndaty ty teà’e ho rehafegne. (Genesisy 11:1) Naho izay areke, le manondro  ndaty magnorike ty lilin’Andrianagnahare naho mahazo ty fitahia’e tihoe “tane vaovao.”

16. Inogne ty raha soa homein’Andrianagnahare ze ndaty hiaigne amy i tontolo vaovaoy ao?

¹⁶ Nampitamà ty Jesosy fa hahazo “havelogne nainai’e” ze ndaty hiaigne amy i tontolo vaovaoy ao. (Marka 10:30) Inogne ty raha toko’e hataontikagne naho te hahazo izay? Vakio ty Jaona 3:16 naho 17:3 hahafantara’o ty vale’e. Andao tikagne hagnente ty irehafa ty Baiboly ty miomba ty ho fiaignantikagne naho fa paradisa ty tane toy.

17, 18. Inogne ty atokisantikagne fa hiadagne naho tsy hisy raha hatahoragne sasa ty an-tane etoy amy ty hoavy?

¹⁷ Tsy hisy sasa ty haratiagne, ty aly, ty malaso naho ty vonoagne ndaty. Tsy hisy ndaty raty fagnahy sasa ty ambone tane etoy. (Salamo 37:10, 11) ‘Hampitsahatse aly amy ze kila tane’ ty Andrianagnahare. (Salamo 46:9; Isaia 2:4) Ho feno ndaty mete anaragne naho tea an’Andrianagnahare ty tane toy. Hiadagne nainai’e iareo.—Salamo 72:7.

¹⁸ Tsy hisy raha hatahora’e sasa ty mpanompo i Jehovah. Narovan’Andrianagnahare sady tsy nisy raha nampatahotse aze o Isiraelitao tamy ty andro ty Baiboly, fa nagnorike ty fagnanara’e. (Levitikosy 25:18, 19) Tsy hisy hampatahotse sasa ty amy i paradisay ao. Ho voaro isan’andro tikagne!—Vakio Isaia 32:18; Mika 4:4.

19. Inogne ty mahavy antikagne hatoky fa ho vokatse o hanegneo amy i tontolo vaovaoy ao?

¹⁹ Ho vokatse o hanegneo. “Hahavokatse ty tane toy, le ndra ty ambone vohitsey ho vokatse iaby.” (Salamo 72:16) ‘Ho tahie i Jehovah Andrianagnaharentikagney tikagne’ sady “hahavokatse vata’e ty tane toy.”—Salamo 67:6.

20. Akore ty ahafantarantikagne fa ho paradisa ty tane toy?

²⁰ Ho paradisa iaby ty tane toy. Sambe hanagne tragno soa naho tonda fanjaka ze kila ndaty. (Vakio Isaia  65:21-24; Apokalypsy 11:18.) Ho soa hanahake i tonda i Edenay ty tane toy. Homey i Jehovah antikagne iaby ze raha paliaentikagne. Izao ty rehafe ty Baiboly miomba i Jehovah: “Mamelatse ty fità’o rehe, le magnomey ze hahafa-po ty fagniria ze raha miaigne.”—Salamo 145:16.

21. Akore ty ahafantarantikagne fa ho mpiragnetse ty ndaty naho ty biby?

²¹ Ho mpiragnetse ty ndaty naho ty biby. Tsy hagnoho-doza sasa o bibio. Ndra o biby masiake amy izaò, le tsy hatahora ty anak’ajaja amy izay.—Vakio Isaia 11:6-9; 65:25.

22. Hatao i Jesosy akore ze ndaty marare?

²² Tsy hisy sasa ty ndaty marare. Fa nagnasitragne ndaty maro ty Jesosy tan-tane etoy. (Matio 9:35; Marka 1:40-42; Jaona 5: 5-9) Ho sitràgne i Jesosy Mpanjaka ty Fanjakàn’Andrianagnahare ze kila ndaty. Tsy hisy sasa ty ndaty hanao tihoe: “Marare raho.”—Isaia 33:24; 35:5, 6.

23. Hataon’Andrianagnahare akore ze ndaty fa nimate?

²³ Ho velogne indraike o ndaty nimateo. Mampitamà ty Andrianagnahare fa ho velome’e iaby ty ndaty an-tapetrisa’e fa nimate. “Fa hisy ty famelomagne ze maregne naho ze tsy maregne.”—Vakio Jaona 5:28, 29; Asan’ny Apostoly 24:15.

24. Akore ty fahatreava’o tihoe hiaigne amy i paradisay ao?

²⁴ Sambe afake mifily tikagne. Ndra itikagne mifily ty hianatse ty miomba i Jehovah naho hanompo aze, ndra itikagne mifily ty hanao ze raha teàntikagne hatao. Hanagne hoavy sambatse tikagne naho mifily ty hanompo i Jehovah. Nisy lahilahy raike nangatake tamy i Jesosy mba ho tsiarove’e naho fa mate. Le hoe ty fampitamà i Jesosy aze: “Hiarake amako amy i Paradisay agne rehe.” (Lioka 23:43) Andao tikagne hianatse ty miomba i Jesosy Kirisity naho ty fomba hampahavia’e ty fampitamàn’Andrianagnahare.