1. Ia ty nagnomey aigne antikagne?

“ANDRIANAGNAHARE velogne” ty Jehovah. (Jeremia 10:10) Ie ty Mpamboatse antikagne naho nagnomey aigne antikagne. Hoe ty Baiboly: “Ihe ro namboatse ze kila raha iaby sady zoton’arofo’o ty naha eo naho ty namboaragne aze.” (Apokalypsy 4:11) Ie zay! Teà i Jehovah hiaigne tikagne sady fagnomezagne sarobily boake ama’e ty aigne.—Vakio Salamo 36:9.

2. Akore ty atao mba hahatomombagne ty fiaignantikagne?

² Nimea i Jehovah hanegne naho rano hivelomagne tikagne. (Asan’ny Apostoly 17:28) Teà’e ho fale amy ty fiaignagne tikagne. (Asan’ny Apostoly 14:15-17) Toko’e hagnorike ty lili’e tikagne naho te ho tomombagne amy ty fiaignantikagne.—Isaia 48:17, 18.

3. Inogne ty natao i Jehovah naho fa namono i Abela ty Kaina?

³ Ampianare ty Baiboly fa sarobily amy i Jehovah ty aigne. Magnamaregne izay ty ohatse miomba i Kaina, ana i Adama naho i Eva. Niboseke tamy i Abela reke, le nampitao aze ty Jehovah fa toko’e hahafehe ty haboseha’e ty Kaina. Faie tsy nahoa’e zay fa ndra niboseke reke. Hafara’e “nijera an-drahalahi’e Abela ty Kaina sady namono aze.” (Genesisy 4:3-8) Nisazea i Jehovah ty Kaina fa namono i Abela. (Genesisy 4:9-11) Raty ty haboseke naho ty fifankalaignagne fa mahavy ty ndaty ho tea aly ndra hagnoho-doza. Tsy hahazo havelogne nainai’e ty ndaty managne o toetse rehoe. (Vakio 1 Jaona 3:15.)  Tsy maintsy tea ze kila ndaty tikagne naho te hampifale i Jehovah.—1 Jaona 3:11, 12.

4. Inogne amo o lily nimean’Andrianagnahare o Isiraelio ty manoro tie sarobily ty aigne?

⁴ Agnarivo’e taogne tafara izay, le nimea i Jehovah Lily Folo ty Mosesy hanoroa’e tie sarobily ty aigne. Raike amo o lily reo tihoe: “Ko mamono ndaty.” (Deoteronomia 5:17) Tsy maintsy vonoegne ty ndaty raike naho nikinia namono ndaty.

5. Tsy mampanahelo an’Andrianagnahare vao ty fagnafahagne ajaja?

⁵ Tsy mampanahelo an’Andrianagnahare vao ty fagnafahagne ajaja? Sarobily amy i Jehovah ndra ty ajaja vaho miforogne an-troke ao. Nisaontsy tamy ty Lily nimei’e o Isiraelitao ty Jehovah, fa naho misy ndaty mandratse ampela vesatse sady nahafate i ana’ey, le tsy maintsy vonoegne. (Vakio Eksodosy 21:22, 23; Salamo 127:3.) Atoro io antikagne fa raty ty magnafake ajaja.—Henteo ty Fagnazavagne 28.

6, 7. Akore ty anoroantikagne tie sarobily ty aigne?

⁶ Akore ty anoroantikagne tie sarobily amantikagne ty aintikagne naho ty fiay ty hafa? Manao izay tikagne naho fa tsy magnoho-doza amy ty aintikagne ndra amy ty ndaty ila’e. Tsy hifoke raha mahamamo, ndra paraky, ndra jamala tikagne fa manimba sady mahafate o raha rehoe.

⁷ Toko’e hampiasaentikagne amy ze fomba iteàn’Andrianagnahare aze ty aintikagne naho ty vatantikagne, fa ie ty nagnomey aze. Halio agnatrehan’Andrianagnahare tikagne naho mikarakara soa ty vatantikagne. (Romanina 6:19; 12:1; 2 Korintianina 7:1) Tsy afake manompo i Jehovah, i nagnomey aigney tikagne, naho tsy mihevetse ty aigne ho sarobily. Va’e ho sarotse ty  hisintake amy ty fomba raty nahazatse. Faie hampea i Jehovah tikagne, naho mikezake misintake amy izay sady mihevetse ty aigne ho sarobily.

8. Inogne ty toko’e hataontikagne mba tsy hagnoho-doza amy ty aintikagne ndra ty hafa?

⁸ Nianarantikagne fa fagnomezagne sarobily ty aigne. Matoky ty Jehovah fa tsy hagnoho-doza amy ty aintikagne ndra amy ty hafa tikagne. Mitao tikagne naho fa minday tognabile, motò, ndra raha hafa. Magnalavitse ze fihisagne naho fagnozaram-batagne maràgne, ndra magnoho-doza tikagne. (Salamo 11:5) Amboarentikagne soa ty tragnontikagne mba tsy hagnoho-doza. Nandily o Isiraelio ty Jehovah tie: “Naho fa magnoregne tragno vaovao rehe, le tsotaho hatae, hiarikatoke ty lavaranga’e ambone. Tsy mone hampité lio amy i tragno’oy rehe. Kera avao hisy ndaty ho tonta boakey.”—Deoteronomia 22:8.

9. Akore ty toko’e ho findesantika o bibio?

⁹ Lahibey amy i Jehovah ty findesantika o bibio. Nengà’e hamono biby tikagne mba ho hanegne, hamboaragne akanjo, ndra naho fa hamono antikagne. (Genesisy 3:21; 9:3; Eksodosy 21:28) Faie tsy mete ty mamono ndra mampijale biby mba hampifaleagne vatagne avao.—Ohabolana 12:10.

10. Akore ty ahafantarantikagne tie mifanandrife amy ty lio ty aigne?

¹⁰ Masigne amy i Jehovah ty lio, fa ty lio ro aigne. Hoe ty Jehovah tamy i Kaina, tafara ty namonoa’e i Abela: “Inao ty lion-drahalahi’o mitoreo amako boake an-taney.” (Genesisy 4:10) Mifanandrife amy ty lio i Abela ty ai’e. Nisazea i Jehovah ty Kaina naho fa namono  i Abela. Mbe natoro i Jehovah tie ty lio ro aigne, tafara ty Ranobey faha i Noa. Nimea i Jehovah alalagne hihinagne biby ty Noa mirofoko. Hoe reke: “Hano’areo iaby ze biby velogne mihetseketseke. Atoloko anareo iaby reo, manahake ty nagnomeako anareo ty ahetse maintso.” Faie izao ty raha nandilia i Jehovah iareo: “Ao tsy ho hane’areo ty nofotse mbe misy aigne, ndra mbe misy lio.”—Genesisy 1:29; 9:3, 4.

11. Inogne ty lily miomba ty lio nimein’Andrianagnahare o Isiraelio?

¹¹ Mbe nisy raha nandilia i Jehovah ty mpanompo’e, 800 taogne tafara ty nandrara’e ry Noa tsy hihinagne lio. Hoe reke: ‘Naho misy amy ty tarana o Isiraelio ndra ty ambahiny toboke ama’areo eo mitsatsa mahazo biby hako ndra vorogne tsy faly hanegne, le haili’e an-taneo ty lio’e, vaho izay holembefa’e lemboke.’ Hoe indraike reke: ‘Ko hanegne ty lio’e.’ (Levitikosy 17:13, 14) Mbe teà i Jehovah hihevetse ty lio ho masigne ty mpanompo’e. Azo iareo atao ty mamono biby ho hanegne faie tsy maintsy ailigne an-taneo ty lio’e.

12. Akore ty fihevera ty Kirisitianagne ty lio?

¹² Nivory ty apositoly naho ty androanavi-pagnahy tamy ty fiangonagne Kirisitianagne ta Jerosalema ao, taogne tsy ampe tafara ty nimateza i Jesosy. Nandineke iareo tamy izay tie ino amy ty Lily nimeigne o Isiraelio ro mbe toko’e horihe ty Kirisitianagne. (Vakio Asan’ny Apostoly 15:28, 29; 21:25.) Nampea i Jehovah iareo mba hahafantatse tie mbe sarobily ama’e ty lio, le toko’e ho hevere iareo ho masigne ka. Tsy niazo o Kirisitianagne voaloha’e reo natao ty mihinagne, ndra ty minon-dio, ndra ty mihinagne hena tsy nilenta. Nitovy tamy ty fanompoan-tsampy naho ty filagne ndaty  tsy valy ty fanoagne ireo. Nanomboke tamy izay ty Kirisitianagne maregne ro tsy nihina, ndra ninon-dio. Akore ka ty amy izao? Mbe teà i Jehovah hihevetse ty lio ho masigne tika.

13. Nagnino ty Kirisitianagne ro tsy magneke hanjilihagne lio?

¹³ Ty dika izay vao tsy toko’e hagneke hanjilihagne lio ty Kirisitianagne? Maregne zay. Nandily antikagne tsy hinogne, ndra hihinan-dio ty Jehovah. Akore ty hatao’o naho rarà ty Dokotera tsy hinon-toake? Mbe hampilitse toake amy ty vata’o vao rehe? Tsy izay! Ty dika izay, ty lily tihoe tsy minogne, ndra tsy mihinan-dio, le mitovy amy ty tsy magneke hanjilihan-dio avao.—Henteo ty Fagnazavagne 29.

14, 15. Nagnino ro sarobily amy ty Kirisitianagne ty fagnajagne ty aigne naho ty fagnorihagne ty lily i Jehovah?

¹⁴ Akore areke naho mirehake i Dokoteray tie ho mate tikagne naho tsy magneke hanjilihagne lio? Ty ndaty tsikiraidraike ty manapa-kevetse naho hagnorike ty lilin’Andrianagnahare miomba ty lio. Magnaja ty aigne boake aman’Andrianagnahare ty Kirisitianagne. Hipay fitsaboagne hafa tikagne mba ho velogne, faie tsy hagneke hanjilihagne lio.

¹⁵ Sarobily aman’Andrianagnahare ty aigne, le mikezake mafe tikagne mba ho salama, faie tsy magneke hanjilihagne lio. Soa ty magnorike ty lilin’Andrianagnahare ta tie hampitombo ty andro ivelomagne amy ty tsy fagnorihagne ty lili’e. Hoe ty Jesosy: “Ze te handrombake ty fiai’e ro hamoe aze fa ze mamoe ty fiai’e amy ty fagnorihagne ahy ro hahazo aze.” (Matio 16:25) Magnorike ty lily i Jehovah tikagne fa tea aze. Mahafantatse ty raha hahasoa antikagne ty Jehovah sady manahake aze ka tika, mihevetse ty aigne ho masigne.—Hebreo 11:6.

16. Nagnino ty mpanompon’Andrianagnahare ro magnorike ty lili’e?

 ¹⁶ Tapa-kevetse hagnorike ty lilin’Andrianagnahare miomba ty lio ty mpanompo’e tsy mivalike. Tsy hinogne, ndra hihinan-dio iareo sady tsy magneke hanjilihagne lio hitsaboagne ty vata’e. * Faie hagneke fitsaboagne hafa iareo mba ho velogne. Resy lahatse iareo fa i Mpamboatse ty aigne naho ty lioy avao ro mahafantatse ty raha mahasoa iareo. Mino vao rehe fa fanta’e ty raha mahasoa azo?

17. Inogne avao ty nagnengà i Jehovah o Isiraelitao hampiasa lio?

¹⁷ Hoe ty saontsy i Jehovah tamo o Isiraelitao tamy ty Lily nimei’e i Mosesy: “Fa amo o liò ao ty misy ty fiay o nofotseo. Le fa nampanoeko anareo amy i alitaray ey o liò handiovagne ty fahotà’areo, fa mandrongogne fahotagne ty aigne ama’ao.” (Levitikosy 17:11) Nahazo famelan-keloke o Isiraelitao naho fa nanao sorogne biby sady nangatake i mpisorogney mba handrarake ty lio i bibỳ ambone i alitara agnate i hazomangay ao. Izay avao ty nagnengà i Jehovah o Isiraelitao hampiasa lio.

18. Inogne ty soa rambesentikagne amy ty sorogne nanoe i Jesosy ho antikagne?

¹⁸ Nisolo ty biby fanoagne sorogne rehafe o lilio ty Jesosy naho fa niavy an-tane etoy hagnomey ty ai’e, ndra ty lio’e ho famelagne ty fahotantikagne. (Matio 20:28; Hebreo 10:1) Sarobily vata’e ty ay i Jesosy, le vinelo i Jehovah ho an-dagnitse agne reke. Sady izay ka ty nahafaha i Jehovah nagnomey fiaignagne nainai’e ty ndaty iaby.—Jaona 3:16; Hebreo 9:11, 12; 1 Petera 1:18, 19.

19. Inogne ty tsy maintsy ataontikagne naho te ho ‘votsotse amy ty lio o ndatio’?

 ¹⁹ Isaorantikagne ty Jehovah fa nagnomey aigne sarobily antikagne! Tea magnampe ndaty hino i Jesosy ka tikagne mba hahazoa iareo fiaignagne nainai’e. Ty hateantikagne ndaty ka ro mahavy antikagne hikezake mafe hampianatse iareo ty raha toko’e hatao mba hahazoagne havelogne. (Ezekiela 3:17-21) Ho afake hirehake manahake i apositoly Paoly ka tikagne tie: “Fa votsotse amy ty lio o ndaty iaby raho, fa tsy mba nimahimahigne nirehake tama’areo ze zoton’arofon’Andrianagnahare.” (Asan’ny Apostoly 20:26, 27) Atorontikagne ka tie magnaja ty aigne tikagne naho mirehake amy ty ndaty ty miomba i Jehovah naho ty mahasarobily ty aigne.