1. Inogne ty va’e ho eretserete’o naho fa vita’o ty fianaragne ty boke toy?

MARO ty hamarenagne nianara’o tagnate Baiboly ao tamy ty boke toy. Agnisa izay, ty fampitamagne havelogne nainai’e, ty maregne miomba ty mate, naho ty famelomagne ty mate. (Mpitoriteny 9:5; Lioka 23:43; Jaona 5:28, 29; Apokalypsy 21:3, 4) Va’e fa nagnatreke ty fivoria ty Vavaolombelo i Jehovah rehe, sady mahatrea fa magnorike ty fivavahagne maregne iareo. (Jaona 13:35) Va’e nihasoa ty fifandrambesa’o amy i Jehovah sady tapa-kevetse hanompo aze rehe. Va’e hieretseretse  amy izay rehe tie: ‘Inogne ty toko’e hataoko mba hanompoagne i Jehovah?’

2. Inogne ty nahavy i Etiopianay te hatao badisa?

² Izay ty nieretserete ty Etiopiana raike niaigne tamy ty andro i Jesosy. Nitory tama’e ty Filipo mpiana i Jesosy, tafara ty namelomagne i Jesosy amy ty mate. Niporofoe i Filipo tama’e fa i Jesosy ro Mesia. Nanohigne ty fo i Etiopianay ty raha nifanta’e, le hoe reke: “Intia misy rano, inogne ty mitagne ahy tsy hatao badisa?”—Asan’ny Apostoly 8:26-36.

3. a) Inogne ty lily nimey i Jesosy i mpanonjohy aze rey? b) Akore ty fomba fanoagne badisa?

³ Ampianare ty Baiboly fa toko’e hatao badisa rehe naho te hanompo i Jehovah. Hoe ty Jesosy tamy i mpanonjohy aze rey: “Anò mpianatse ze ndaty amy ty tane toy iaby, le anò badisa.” (Matio 28:19) Ty badisa i Jesosy ro modely. Najorobogne agnate rano ao iaby reke fa tsy ty loha’e avao ro nilignan-drano. (Matio 3:16) Naho fa misy Kirisitianagne atao badisa ka, le tsy maintsy ajorobogne agnate rano ao iaby ty vatan-tegna’e.

4. Nagnino rehe ro toko’e hatao badisa?

⁴ Naho fa atao badisa rehe, le izay ty anoroa’o fa te ho ragnen’Andrianagnahare rehe sady te hanompo aze. (Salamo 40:7, 8) Va’e hieretseretse rehe tie: ‘Inogne ty toko’e hataoko naho te hatao badisa?’

5. a) Inogne ty tsy maintsy atao’o aloha ty hanoagne azo badisa? b) Nagnino ro tsy toko’e hatao ambanen-draha ty fivoriagne Kirisitianagne?

⁵ Aloha ty hanoagne azo badisa, le tsy maintsy mianatse hahafantatse i Jehovah naho i Jesosy rehe. Nanao izay rehe naho fa nanomboke nianatse Baiboly. (Vakio Jaona 17:3.) Faie tsy ampe zay. Mirehake ty Baiboly fa  tsy maintsy “hofenoegne fahafantaragne maregne” ty zoton’arofo i Jehovah rehe. (Kolosianina 1:9) Ty fivoria ty Vavaolombelo i Jehovah ro hagnampe azo hifandrambe soa amy i Jehovah. Ko atao ambanen-draha areke ty fagnatrehagne fivoriagne tsy tapake.—Hebreo 10:24, 25.

6. Inogne ty raha toko’e ho fanta’o agnate Baiboly ao aloha ty hanoagne azo badisa?

⁶ Tsy mandily azo hamantatse ze kila raha agnate Baiboly ao ty Jehovah vaho izay rehe azo atao badisa. Tsy nandily i lahilahy Etiopianay ohatse reke tie tsy maintsy mahafantatse ze kila raha hey reke vaho izay atao badisa. (Asan’ny Apostoly 8:30, 31) Tsy hisy fitapera’e ty fianarantikagne miomba an’Andrianagnahare. (Mpitoriteny 3:11) Toko’e hahafantatse naho hagneke ty fampianaragne fototse agnate Baiboly ao rehe vaho izay atao badisa.—Hebreo 5:12.

7. Nagnampe azo hanao inogne ty fianara’o Baiboly?

⁷ Hoe ty Baiboly: “Naho tsy amy ty finoagne, le tsy misy azo atao hampifaleagne an’Andrianagnahare.” (Hebreo 11:6) Ty dika izay, toko’e hanam-pinoagne rehe aloha ty hanoagne azo badisa. Rehafe ty Baiboly fa nanjare “mpino naho natao badisa” ty ndaty ila’e ta Korinto agne naho fa naharey ty fampianara i mpanonjohy i Jesosy rey. (Asan’ny Apostoly 18:8) Ty fianara’o Baiboly ro nagnampe azo hino ty fampitamàn’Andrianagnahare naho ty hasarobily i solovoigney, mba hagnavotagne antikagne amy ty ota naho ty fate.—Josoa 23:14; Asan’ny Apostoly 4:12; 2 Timoty 3:16, 17.

8. Inogne ty mahavy azo hirehake ty raha nianara’o amy ty hafa?

⁸ Nagnampe azo amy ty fiaigna’o naho nagnamafe ty finoa’o ty fianara’o Baiboly. Izay ty mahavy azo te  hirehake ty raha nianara’o amy ty hafa. (Jeremia 20:9; 2 Korintianina 4:13) Ia iaby ty toko’e hirehafa’o izay?

9, 10. a) Ia iaby ty azo’o irehafagne ty raha nianara’o? b) Inogne ty toko’e hatao’o naho te hitory miharo amo o fiangonagneo?

⁹ Va’e ho teà’o ty hirehake ty raha ianara’o amy ty keleia’o, ty ragne’o, ty mpiharo tanàgne ama’o, naho ty mpiharo miasa ama’o. Soa ty fanoagne izay, faie anò aman-kasoa fagnahy naho aman-katea avao. Ho vita’o ty hitory miharo amo o fiangonagneo naho manao izay rehe. Naho tsapa’o tie fa vogno’e hanao izay rehe, le azo’o atao ty mirehake amy ty mpagnanatse Baiboly azo tie fa te handrambe anjara amy ty asa fitoriagne miharo amo o fiangonagneo rehe. Naho trea i mpagnanatse Baiboly azoy tie magnorike ty raha rehafe ty Baiboly amy ty fiaigna’o rehe, le azo’areo atao ty mamonje androanavi-pagnahy roe.

¹⁰ Inogne ty atao amo o fivoriagne iohoe? O fivoriagne iohoe ro ahatreava o androanavi-pagnahy reo tie mazava ama’o vao ty fampianaragne fototse agnate Baiboly ao. Ho trea iareo ka tie magnorike ty raha andilia ty Baiboly naho magniry ho Vavaolombelo i Jehovah vao rehe. Ko haligno fa o androanavi-pagnahy reo ty mikarakara ze ndaty tsikiraidraike amo o fiangonagneo eo, agnisa izay rehe, le ko matahotahotse hirehake amy iareo. (Asan’ny Apostoly 20:28; 1 Petera 5:2, 3) Naho fa vita o fivoriagne iohoe vaho izay hampahafantare o androanavi-pagnahy reo azo tie mahazo mitory miharo amo o fiangonagneo rehe.

11. Inogne ty maha lahibey ty manao fiovagne aloha ty hitoria’o miharo amo o fiangonagneo?

¹¹ Va’e ho hazavae o androanavi-pagnahio ama’o ty fiovagne ila’e toko’e hatao’o, aloha ty hagnekeagne azo ho mpitory. Inogne ty maha lahibey izay? Mirehake  ty miomba an’Andrianagnahare amo o ndatio tikagne, sady misolo tegna i Jehovah. Izay ty mahavy antikagne tsy maintsy manao ze raha hagnomezam-boninahitse aze amy ty fiaignantikagne.—1 Korintianina 6:9, 10; Galatianina 5:19-21.

12. Nagnino ty ndaty iaby ro toko’e hisoloho?

¹² Misy raha hafa tsy maintsy atao’o aloha ty hanoagne azo badisa. Hoe ty apositoly Paoly: “Misolohoa, le miheregna, hagnafahagne ty fahota’areo, mba hisia ty fotoagne mahavelombolo boake amy i Jehovah.” (Asan’ny Apostoly 3:19) Inogne ty dika tihoe misoloho? Ty dika’e, mahatsapa ty raha tsy mete nataontikagne. Toko’e hisoloho rehe naho ohatse niraty findesambatagne. Ndra tie mikezake manao ty maregne rehe, le toko’e hisoloho avao. Ty anto’e, tsy voririke tikagne, le mipay famelan-keloke amy i Jehovah.—Romanina 3:23; 5:12.

13. Inogne ty dika tihoe “miova”?

¹³ Ampe vao ty mahatsapa tie nanao raha tsy mete? Aha’a. Nirehake ty Petera fa soa rehe naho “miova.” Ty dika izay, tsy magneregne sasa ze raha raty natao’o taloha, sady manomboke manao ty maregne amy izay. Intoy misy ohatse: Vetsevetseo tie mandeha amy ty toeragne mbe tsy nomba’o indraike rehe. Fanta’o fa diso lalagne rehe naho fa niavy eo. Inogne ty toko’e hatao’o? Azo antoke fa handeha moramora rehe, le hijanogne, le hiheregne, le hagnorike lalagne maregne. Mitovy amy izay ka, fa naho mianatse Baiboly rehe, le toko’e hagnova ty fahazaran-draty natao’o taloha. Vogno’e ‘hiova’ ty dika izay. Ovao ze kila raha toko’e hovagne sady manoa ty soa avao.

14. Inogne ty dika tihoe manokan-tegna ho an’Andrianagnahare?

¹⁴ Ty fanokanan-tegna hoahy i Jehovah ro lahibey toko’e hatao’o aloha ty badisa’o. Manokan-tegna hoahy i Jehovah rehe naho fa mampitamà amy ty vavake fa hanompo aze raike avao sady hanao aloha ty zoton’arofo’e amy ty fiaigna’o.—Deoteronomia 6:15.

15, 16. Inogne ty mandrisike ty ndaty raike hanokan-tegna hoahy i Jehovah?

¹⁵ Mitovy amy ty mampitamà fa hiharo amy ty ndaty raike teà’o amparake ty iaigna’o tihoe mampitamà fa hanompo i Jehovah raike avao. Vetsevetseo ty lahilahy raike naho ty ampela raike mifamofo. Ty fahafantara i lahilahỳ ty toetse soa anagna i ampelay ty mahavy aze ho tea naho hangala-baly aze. Ndra tie andraikitse lahibey tihoe manambaly, le vognogne handrambe i fanapahan-kevetse zay i lahilahỳ, fa teà’e i ampelay.

¹⁶ Nanjare tea naho te hanao ze fara heri’o mba hanompoagne i Jehovah rehe naho fa nianatse ty miomba aze. Izay ty handrisike azo hampitamà i Jehovah amy ty vavake fa hanompo aze. Mirehake ty Baiboly fa ndra ia ndra ia te hanonjohy i Jesosy, le tsy maintsy “handietse ty vata’e.” (Marka 8:34) Inogne ty dika izay? Ty dika’e, ty fagnorihagne ty lily i Jehovah ro atao’o amy ty toeragne voaloha’e amy ty fiaigna’o. Ty raha teà i Jehovah ro toko’e ho lahibey ama’o fa tsy ty raha teà’o naho ty raha kendre’o.—Vakio 1 Petera 4:2.

17. Inogne ty mahavy ty ndaty ila’e tsy hanokan-tegna hoahy i Jehovah?

¹⁷ Tsy manokan-tegna hoahy i Jehovah ty ndaty ila’e, fa matahotse iareo kera tsy hahavita hitagne ty fampitamà’e hanompo aze. Tsy te handiso tamà i Jehovah iareo,  ndra va’e hieretseretse tie, tsy hampagnonere i Jehovah amy ty raha atao’e naho tsy manokan-tegna ho aze.

18. Inogne ty hagnampe azo tsy hatahotse handiso tamà i Jehovah?

¹⁸ Ty hatea’o i Jehovah ro hagnampe azo tsy hatahotse handiso tamà aze. Ty anto’e, teà’o reke, le hanao ze fara heri’o rehe mba hitanagne ty fampitamagne natao’o tama’e. (Mpitoriteny 5:4; Kolosianina 1:10) Tsy hieretseretse ka rehe tie sarotse loatse ty manao ty zoton’arofo i Jehovah. Izao ty sinora i apositoly Jaona: “Izao ty hatea an’Andrianagnahare, le ty hagnorihantikagne ty lili’e. Tsy mavesatse ty lili’e.”—1 Jaona 5:3.

19. Nagnino rehe ro tsy toko’e hatahotse hanokan-tegna hoahy i Jehovah?

¹⁹ Tsy voatere ho voririke rehe vaho izay hanokan-tegna hoahy i Jehovah. Tsy mandily antikagne hanao mihoatse ze azontikagne atao ty Jehovah. (Salamo 103:14) Hagnampe azo hanao ty maregne reke. (Isaia 41:10) Atokiso amy ty fo’o ty Jehovah, le “hanoe’e ze hahatomombagne ty fiaigna’o.”—Ohabolana 3:5, 6.

20. Inogne ty raha toko’e hatao’o afara ty fanokanan-tegna’o hoahy i Jehovah?

²⁰ Fa mieretseretse vao rehe tie fa vogno’e hanokan-tegna hoahy i Jehovah? Inogne areke ty raha toko’e hatao’o afara ty fanokanan-tegna’o hoahy i Jehovah? Toko’e hatao badisa rehe.

21, 22. Akore ty anoroa’o agnatreha o ndaty maro ty finoa’o?

²¹ Ampahafantaro ty androanavi-pagnahy mpandamigne amy ty fiangonagne misy azo tie fa nanokantegna hoahy i Jehovah rehe sady te hatao badisa. Vaho izay hisy androanavi-pagnahy ila’e hiharo dineke ama’o miomba ty fampianaragne fototse agnate Baiboly ao.  Naho fa neké iareo tie vognogne hatao badisa rehe, le hirehake ama’o iareo fa azo atao badisa amy ty havoriambey faritse rehe ndra amy ty havoriambey vondrom-paritse atao ty Vavaolombelo i Jehovah. Amy i havoriambeỳ agne ro hisy lahajaka hagnazava ty dika i badisay. Misy raha roe hagnontenea i mpizakay amy ze hatao badisa. Ty famaleagne o fagnonteneagne rehoe  ty anoroa’o “agnatreha o ndaty maro” ty finoa’o.—Romanina 10:10.

²² Vaho izay rehe atao badisa. Hajorobogne agnate rano ao rehe. Ty badisa ro anoroa’o agnatreha o ndaty  maro fa nanokan-tegna hoahy i Jehovah rehe sady fa nanjare Vavaolombelo i Jehovah.

23. Inogne ty dika tihoe atao badisa “amy ty agnaran-dRae, amy ty agnara ty Anake naho amy ty agnara i fagnahy masigney”?

²³ Nirehake tamy i mpiana’e rey ty Jesosy fa toko’e hatao badisa “amy ty agnaran-dRae, amy ty agnara ty Anake naho amy ty agnara i fagnahy masigney” iareo. (Vakio Matio 28:19.) Inogne ty dika izay? Ty dika’e, magneke ty fahefà i Jehovah naho ty anjara asa i Jesosy amy ty fikasan’Andrianagnahare, sady magneke ty fomba ampiasà’e ty fagnahy masigne mba hagnatanterahagne ty zoton’arofo’e.—Salamo 83:18; Matio 28:18; Galatianina 5:22, 23; 2 Petera 1:21.

24, 25. a) Inogne ty dika tihoe badisa? b) Inogne ty horehafe ty toko manonjohy itoy?

²⁴ Misy heve’e lahibey ty badisa. Naho fa ajorobogne agnate rano ao rehe, ty dika izay mate ndra tapetseo ty fiaigna’o taloha. Naho akaregne boake agnate rano ao rehe, le manomboke fiaignagne vaovao mba hanao ty zoton’arofon’Andrianagnahare. Ty dika izay, hanompo i Jehovah rehe manomboke eo. Ko haligno fa i Jehovah ty nanokana’o ty vata’o fa tsy ndaty, ndra fikambanagne, ndra asa.

²⁵ Ty fanokanan-tegna’o ty hagnampe azo ho mpiragnetse vata’e amy i Jehovah. (Salamo 25:14) Tsy midika zay tie, avotse ty ndaty raike, naho fa vita badisa. Izao ty sinora i apositoly Paoly: “Mikezaha mafe miharo amy ty tahotse naho fititike, mba hahavoarombake anareo.” (Filipianina 2:12) Fanombohan-draha avao ty badisa. Faie akore areke ty hahavy azo hifandrambe soa amy i Jehovah? Ty toko fara’e amy ty boke toy ty hamale izay.