NAHO fa mamaky gazete, ndra magnente tele, ndra mitsanogne radio rehe, le mahatrea naho maharey tantara mampiriatse holitse, aly, naho fandreberebeagne. Va’e hahatiaro hijale rehe naho fa marare ndra misy ndaty teà’o nimate.

Dineho tie:

• Izao vao ty teàn’Andrianagnahare hanjò anay?

• Aia ty ahazoako fagnampeagne naho fa misy olagne?

• Mbe hisy fiadanagne vao?

Mamale o fagnonteneagne rehoe ty Baiboly.

• Tsy hisy ndaty hanaintaigne, ho antetse, ndra ho mate.—Apokalypsy 21:4

• “Hahay manganike vohitse manahake o serfao ty kepeke.” —Isaia 35:6

• “Hampagnentégne ty maso ze goa.” —Isaia 35:5

•  Hovelomegne indraike ze ndaty nimate. —Jaona 5:28, 29

• Tsy hisy sasa ty ndaty harare. —Isaia 33:24

• Sambe hanan-kanegne iaby ty ndaty ambone tane etoy.—Salamo 72:16

Va’e hihevetse rehe tie nofy avao ty raha rinehake tamy i peje voaloha’e teo rey. Faie nampitamà ty Jehovah, fa tsy ho ela ty hanoa’e ireo an-tane etoy. Hazavae ty Baiboly ty fomba hanoa’e izay.

Mahasoa ty Baiboly, fa mirehake ty toko’e hataontika, mba hahasambatse naho hahafa-po ty fiaignagne manomboke amy izao. Va’e hampivali-doha ty raha retoa: Tsy fanagnan-drala, olagne amy ty keleiagne, tsy fahasalamagne, fahafateza ty longo. Faie hagnampe azo hiatreke ireo ty Baiboly. Mampionogne ka ty amalea’e o fagnonteneagne retoa:

• Nagnino tikagne mijaleo?

• Akore ty hiatrehagne olagne?

• Akore ty hahasambatse ty keleiantikagne?

• Manao akore tikagne naho fa mate?

• Mbe ho velogne vao ty longo fa nimate?

• Ino ty atokisagne ty fampitamàn’Andrianagnahare?

 Te hahafantatse ty fampianara ty Baiboly rehe kanao mamaky ty boke toy. Hagnampe azo ty boke toy. Misy fagnonteneagne ty ambane i fehentsoratsey, hagnampe azo hahazo ty raha rehafe ty Baiboly. An-tapetrisa’e ty ndaty fale naho fa miharo fianatse ty Baiboly amy ty Vavaolombelo i Jehovah. Tamae’ay hanao izay ka rehe. Lonike rehe ho tahie i Jehovah hahafantatse ty raha ampianare ty Baiboly!