1. Aia ty ahafantarantikagne ty miomba ty hoavy?

FA NIERETSERETSE vao rehe naho fa nagnente vaovao tie: ‘Mbe hiharaty avao vao ty fiaignagne toy?’ Maro ty loza naho ty haratia-pagnahy, le izay ty mahavy o ndatio hino tie fa marine hifaragne ty tontolo toy. Maregne vao zay? Akore ty ahafantaragne ty hoavy? Tsy misy ndaty mahay mamantatse ty hoavy, fa i Jehovah Andrianagnahare avao ty mahay izay. Agnate Baiboly ao ty isaontsia’e ty hoavy naho ty hiafarà ty tane toy.—Isaia 46:10; Jakoba 4:14.

2, 3. Inogne ty tea i mpiana i Jesosy rey ho fantatse, le akore ty namalea’e iareo?

² Tsy ty fara ty Tane toy ty teà ty Baiboly horehafegne naho fa mirehake ty fara ty tontolo toy reke, fa ty fara ty raha raty an-tane etoy. Nampianare i Jesosy o ndatio tie ty Fanjakàn’Andrianagnahare ty hitondra ty tane toy. (Lioka 4:43) Teà i mpiana’e rey ho fantatse ty date hiavia i Fanjakàn’Andrianagnaharey, le hoe iareo: “Rehafo ama’ay tie ombia ty hisehoa izay? Sady inogne ka ty ho famantara ty fiavi’o naho ty fifaragna ty tontolo toy?” (Matio 24:3) Ty raha hiseho aloha ty hifaragna ty tontolo toy ty nirehafe i Jesosy amy iareo fa tsy ty date’e. Fa avy amy izao iaby ze raha nirehafe i Jesosy fa hiseho.

³ Ho treantikagne amy ty toko toy ty porofo tie, fa miaigne amy ty fotoagne mialoha ty hifaragna ty tontolo toy tikagne. Voaloha’e, mila fantarentikagne ty aly  nisy tan-dagnitse agne, amy izay mazava soa amantikagne ty mahavy o raha raty an-tane etoy io.

4, 5. a) Inogne ty raha niseho tafara ty naha Mpanjaka i Jesosy? b) Naho ty Apokalypsy 12:12 ro henteagne, inogne ty raha niseho tafara ty nanorahagne i Satana an-tane etoy?

⁴ Nianarantikagne tamy ty Toko faha-8 ao, fa nanjare Mpanjaka an-dagnitse agne ty Jesosy tamy ty taogne 1914. (Daniela 7:13, 14) Izao ty irehafa ty Apokalypsy amantikagne ty raha niseho: “Nisy aly ty tan-dagnitse agne: I Mikaela [Jesosy] naho o anjeli’eo nialy tamy i dragogney [Satana], le nialy ka i dragogney vaho o anjeli’eo.” * Resy ty Satana naho o demonia’eo, le natorake an-tane etoy. Dineho ty nihafalea o anjelio! Akore ka ty amy ty ndaty an-tane etoy? Rehafe ty Baiboly fa haoreagne hoahy o ndatio i fotoagne izay. Ino ty anto’e? Boseke mafe ty Devoly, “fa fanta’e tie fa fohe ty fotoagne anagna’e.”—Apokalypsy 12:7, 9, 12.

⁵ Lako ty haoreagne nindese i Devoly an-tane etoy. Boseke mafe reke “fa fanta’e fa fohe ty fotoagne anagna’e” mialoha ty hamonoan’Andrianagnahare aze. Andao tikagne handineke ty raha nirehafe i Jesosy fa hiseho amy ty andro fara’e.—Henteo ty Fagnazavagne 24.

6, 7. Manao akore ty hakerégne naho ty aly amy hinane izao?

⁶ Aly. Hoe ty Jesosy: “Hisy firenena haname aly amy ty firenena, hisy ka fanjakagne haname aly amy ty fanjakagne ila’e.” (Matio 24:7) Mihoatse ty taloha, ty mate ty aly amy izao. Atoro ty tatetse natao ty Fikambanagne  Mpandineke ty Tontolo Toy, fa mihoatse ty 100 tapetrisa ty ndaty nimate ty aly nanomboke tamy ty taogne 1914. Ampitomboegne intelo ty isa ty ndaty nimate taloha ty taogne 1900, ty nimate ty aly tagnate ty 100 taogne tampagnivoa ty taogne 1900 naho 2000. Dineho ty haoreagne naho ty fangirifiria ty ndaty an-tapetrisa’e vokatse ty aly!

⁷ Keré. Nirehake ty Jesosy tie: “Hisy keré.” (Matio 24:7) Mbe maro ty ndaty azo ty keré ndra tie mahavokatse hanegne tsy mitovy amy ty taloha ty amy hinane izao. Inogne ty mahavy izay? Misy ndaty tsy manan-drala hiviliagne hanegne ndra tane hamboleagne. Mihoatse ty agnarivo’e tapetrisa ty ndaty tsy manan-drala mba hiveloma’e. Mirehake ty Fikambanagne Iharoam-pirenena Miomba ty Fahasalamagne tie, ajaja an-tapetrisa’e ty mate isan-taogne, fa raty fihinagne.

8, 9. Inogne ty magnamaregne fa tsy vande ty faminania i Jesosy miomba ty ezegnezen-tane naho ty aretegne?

⁸ Ezegnezen-tane. Hoe ty faminania i Jesosy: “Hisy ezegnezen-tane  fatratse.” (Lioka 21:11) Misy ezegnezen-tane fatratse miseho isan-taogne amy hinane zao. Mihoatse ty roe tapetrisa ty ndaty mate ty ezegnezen-tane, nanomboke tamy ty taogne 1900. Mbe maro avao ty ndaty mate, ndra tie fa misy fitaovagne fagnenteagne mialoha o ezegnezen-taneo.

⁹ Aretegne. Fa nirehafe i Jesosy tie hisy “aretegne manjamagne.” Miparitake tsiela ty aretegne magnoho-doza sady mamono ndaty maro. (Lioka 21:11) Mbe misy avao ty aretegne tsy mete tsaboegne ndra tie fa nianatse hitsabo aretegne maro o dokoterao. Magnazava ty tatetse raike, fa ndaty an-tapetrisa’e ty mate ty berikilozy, tazogne naho ty kolerà. Tsy izay avao, fa nahatrea aretegne vaovao 30 tsy ahatreavagne fagnafoli’e o dokoterao.

10. Akore ty maha maregne ty 2 Timoty 3:1-5 amy hinane izao?

¹⁰ Rehafe ty Baiboly amy 2 Timoty 3:1-5 ao, “fa hisy faloviloviagne amy ty andro fara’e.”  Nihazavae i apositoly Paoly ty toetoe ty ndaty maro amy ty andro fara’e. Izao iaby hoe reke ty ho toetoe o ndatio:

• tea ty vata’e

• tea drala

• manjehatse an-drae’e aman-drene’e

• tsy megnatse mivalike

• tsy tea ty saveregna’e

• tsy mahazitse ty vata’e

• lako siake, tea aly

• tea raha mahafalefale fa tsy tea an’Andrianagnahare

• manao mpivavake avao faie tsy trea amy ty raha atao’e ty maha mpivavake aze

11. Hanao akore ty ndaty mpanao raty naho henteagne ty Salamo 92:7?

¹¹ Ireo vao ty toetse ty ndaty amy ty faritse misy azo? Izay ty trea magneneke ty tane toy. Fa marine hanao raha ty Andrianagnahare. Hoe ty fampitamà’e: “Naho fa manahake ty fitiry o akatao, ty ndaty raty fagnahy sady mihamaro o mpanao ratio, le izay ty magnamaregne  fa lelia’e ho mate [ndra, hovonoegne] iareo.”—Salamo 92:7.

12, 13. Inogne ty ampianare i Jehovah antikagne amy ty andro fara’e?

¹² Fa nirehafe ty Baiboly tie ho feno loza naho fijaleagne ty tane toy, amy ty andro fara’e. Faie rehafe’e ka tie hisy raha soa hiseho.

¹³ Fahazoagne ty raha rehafe ty Baiboly. Hoe ty nisorate i Daniela miomba ty andro fara’e: “Maro ty handineke soa, le hitombo ty fahafantaragne ty maregne.” (Daniela 12:4) Magnampe o ndatio hahafantatse ty raha rehafe ty Baiboly ty Jehovah. Miambake ty nanoa i Jehovah izay nanomboke tamy ty taogne 1914. Nampianare’e antikagne ohatse ty maha lahibey ty tahina’e naho ty fagniria’e miomba ty tane toy, ty nagnomea’e i Solovoigney, ty maregne miomba ty mate naho ty famelomagne ty mate. Nianarantikagne, fa ty Fanjakàn’Andrianagnahare raike avao ty hagnafake ty raha manahiragne antikagne. Nianarantikagne ka tie inogne ty hahasambatse antikagne naho ty fiaignagne mampifale an’Andrianagnahare. Faie akore ty agnoriha ty mpanompon’Andrianagnahare ty raha ianara’e? Mamale izay ty faminaniagne ila’e.—Henteo ty Fagnazavagne 21 naho 25.

14. Aia ty toeragne agnambaragne ty talily soa i Fanjakagney, sady ia ty ndaty manao aze?

¹⁴ Fitoriagne magneneke ty tane toy. Hoe ty Jesosy miomba ty andro fara’e: “Hotseizegne mbeombeo amy ty tane toy ty talily soa i Fanjakagney.” (Matio 24:3, 14) Tane mihoatse ty 239 ty agnambaragne i talily soa i Fanjakagney sady adika amy ty firehake mihoatse ty 700. Magnampe ty ndaty amy ty tane toy hahafantatse i Fanjakagney naho ty raha hanoe’e hoahy o ndatio, ty  Vavaolombelo i Jehovah “boake amy ze kila tane, naho foko.” (Apokalypsy 7:9) Tsy karamaegne iareo. Fa naminany ka ty Jesosy fa tsy hisy hahakalagne i asa fitoriagney, ndra tie misy malaigne naho manohetse.—Lioka 21:17.

15. a) Mino vao rehe fa andro fara’e iaignantikagne hinane zao, sady inogne ty anto’e? b) Hanao akore ze ndaty mete i Jehovah anaragne naho ze ndaty tsy mete’e anaragne?

¹⁵ Mino vao rehe fa andro fara’e iaignantikagne hinane zao? Maro amy ty faminania ty Baiboly miomba ty andro fara’e ro fa avy eo. Fa marine hampijanogne ty asa fitoriagne i talily soay ty Jehovah vaho izay ho avy ty “fara’e.” (Matio 24:14) Inogne ty atao tihoe fara’e? Io ty fotoagne hagnafaha i Jehovah o haratiagneo, ndra Hara-magedona. I Jesosy naho ty anjeli’e mahery ty hampiasae i Jehovah hamonovono ze ndaty tsy mete iareo anaragne. (2 Tesalonianina 1:6-9) Tsy hamitake o ndatio sasa ty Satana naho o demonia’eo afara izay. Ze ndaty magnorike ty fagnanaran’Andrianagnahare naho magneke i Fanjakà’ey avao ty hahatrea i fampitamà’ey.—Apokalypsy 20:1-3; 21:3-5.

16. Inogne ty toko’e hatao’o naho fa fanta’o fa marine ‘i fara’ey’?

¹⁶ Fa marine hifaragne ty tontolo fehé i Satana toy. Sambe toko’e hieretseretse areke tikagne tie: ‘Inogne ty toko’e hataoko?’ Teà i Jehovah hianatse raha maro boake agnate Baiboly ao rehe. Imaneo soa ty fianaragne aze. (Jaona 17:3) Magnampe o ndatio hahafantatse ty fampianaragne agnate Baiboly ao ty Vavaolombelo i Jehovah naho fa mivory isan-keregnandro. Mikezaha rehe tsy hanapake fivoriagne. (Vakio Hebreo 10:24, 25.) Ko matahotse hagnova ty raha mahazatse azo rehe, naho fa fanta’ o fa toko’e hanao izay. Hihasoa ty fifandrambesa’o amy i Jehovah naho manao izay rehe.—Jakoba 4:8.

17. Nagnino i fara’ey ro ho tampoke amo o ndatio?

¹⁷ Nihazavae i apositoly Paoly fa ho tampoke amo o ndatio ty hamonovonoagne ty ndaty raty fagnahy, “manahake o mpangalatse avy halegneo.” (1 Tesalonianina 5:2) Naminany ty Jesosy fa ndaty maro ro tsy hidare tie miaigne amy ty andro fara’e tikagne. Hoe reke: “Ho hambagne tamy ty andro faha i Noa ty ho fiavia i Ana o ndatỳ [ndra, ty andro fara’e]. Fa tamy tie mbe tsy niavy i ranobey tamy ze i andro zay, le nitondrem-pihinagne naho nigòke ty finogne, nagnengavao naho nengàm-bao ty o ndaty, hatrake amy ty andro niziliha i Noa tamy i sambobeỳ ao. Tsy nidare iareo amparake ty niavia i ranobey namaoke iareo iabỳ. Le ho hambagne amy izay ka ty ho fiavia i Ana o ndatỳ.”—Matio 24:37-39.

18. Inogne ty fampitaoagne nimey i Jesosy antikagne?

¹⁸ Nampitao ty Jesosy tie tsy toko’e ho tondregne amy, “ty fihinagne losotse naho ty figenohan-toake vaho ty hatondregnagne amo o fiaignagne zao” tikagne. Nirehafe’e fa ho tampoke manahake “o fandrikeo” ty ho fiavia ty fara’e. Nirehafe’e ka fa “handrambagne ze kila o ndaty ambone tane etoy anio zay.” Le hoe indraike reke: “Le mitaoa avao, sady mihalalea lognandro [ndra, mivavaha amy ty fo] soa tie hivotsora’areo amy ze hene raha ho avy zay, le hahafiatrefa’areo i Ana o ndatỳ.” (Lioka 21:34-36) Inogne ty maha lahibey ty mitsanogne ty fampitaogne nimey i Jesosy? Ty anto’e, fa marine ty handravàgne ty tontolo raty i Satana toy. Ze ndaty teà i Jehovah naho i Jesosy avao ro ho votso-belogne amy ty fara’e sady ho velogne nainai’e amy i tontolo vaovaoy ao.—Jaona 3:16; 2 Petera 3:13.