2. Managne Feo ty Fieretseretagne Malio Agnatrehan’Andrianagnahare eo vao Rehe?
1 FAGNOMEZAGNE BOAKE AMAN’ANDRIANAGNAHARE TY FEO TY FIERETSERETAGNE
“Ty eretsere’e avao ka ro magnameloke aze ndra magnafa-tsiny aze.”—Romanina 2:14, 15
Akore ty hahafaha ty feo ty fieretsereta’o hagnampe azo?
-
Salamo 139:23, 24
Ty feo ty fieretseretagne ro manoro antikagne tie ino ty mete naho ty tsy mete. Magnampe antikagne hahay handineke ka ty feo ty fieretseretagne tie soa sa raty ty raha eretseretentikagne naho ty raha am-pontikagne ao.
-
1 Samoela 24:5; Joba 27:6
Mandrisike antikagne hanao ty soa ty feo ty fieretseretantikagne, sady mampitao antikagne mba tsy hanao raha raty. Magnenjeke antikagne ty eretserentikagne naho boake nanao raha raty tikagne. Faie fale tikagne naho boake nanao raha soa.
2 MILA AMPIOFAGNEGNE TY FEO TY FIERETSERETANTIKAGNE
“Mamitake ambone ze kila raha ty fo, sady sarotse fehégne.”—Jeremia 17:9
Ino ty raha nimey i Jehovah mba hagnampeagne antika hampiofagne ty feo ty fieretseretantikagne?
-
Romanina 9:1; 1 Korintianina 4:4
Va’e tsy hiasa soa ty feo ty fieretseretantikagne satria tsy voririke tikagne. Faie tsy toko’e hanao ze teantikagne avao tika, fa mila ty tari-dala ty fagnahy masigne mba hanoro antikagne ty mete naho ty tsy mete.
-
Hebreo 5:14; 1 Petera 3:16
Mila mianatse Baiboly tikagne. Izay ty hagnampe antika hahafantatse soa ty fomba fiheve i Jehovah. Hagnampe antika hahay hagnambake ty soa naho ty raty ka ty feo ty fieretseretantikagne.
3 TSY MITOVY TY FEO TY FIERETSERETA O NDATIO
“Lonike ty tsikiraidraike hipay lognandro ze hahasoa ty hafa, fa tsy ze hahasoa ty tegna’e avao.”—1 Korintianina 10:23, 24
Ino ty toko’e hataontikagne mba hagnajagne ty feo ty fieretsereta ty hafa?
-
Romanina 15:1, 3
Tsy mitovy ty fiasa ty feo ty fieretsereta ty ndaty tsikiraidraike. Va’e hienga azo hanao raha raike ty feo ty fieretsereta’o fa ty ahy ty hafa tsy voatere hitovy amy izay.
-
1 Korintianina 10:31-33
Tsy nanao ze tea’e hatao avao ty apostoly Paoly fa nipay ze hahasoa ty rahalahi’e naho ty rahavave’e. Tena lahibey tama’e ty fihetseham-po iareo vaho izay ty fahafaha’e manokagne.
-
Romanina 14:10, 19
Hitsaràntika ty vatantika ty nagnomea i Jehovah ty feo ty fieretseretantikagne fa tsy hitsaràntika ty hafa. Mila mitao mafe tika mba tsy hizizo miomba tihoe tsy maintsy maregne ty antika fa ty ahy ty hafa diso.
4 AFAKE MAGNAMPE ANTIKAGNE HANAGNE FEO TY FIERETSERETAGNE MALIO TY JEHOVAH
“Izay ty agnomeantika toky ty fontika agnatreha’e eo. ... Satria lahibey ambone ty fontika ty Andrianagnahare sady mahafantatse ze kila raha.” —1 Jaona 3:19, 20
Nagnino tika ro tsy toko’e ho kivy naho enjehe ty eretserentika miomba ty raha nataontika taloha?
-
Salamo 86:5; 1 Korintianina 6:11
Va’e hahatsapa ho tsy misy dika’e naho ore mafe tikagne naho fa mieretseretse ty fahotagne nataontika taloha ndra tie fa nibebake aza. Faie tsy afake magnova ty raha fa lasa tika. Mamela ty helontika ty Jehovah sady mamafa ty fahotantikagne. Afake malio agnatreha’e eo tika.
-
Galatianina 6:2; 1 Petera 2:16
Mifototse amy ty toro lala ty Baiboly “ty lalà i Kristy” fa tsy amy ty lalàna. Ndra tie tsy misy lalàna mivantagne aza ty raha raike, le tsy toko’e ho hararaote ty Kristiana raike hanoagne raha raty zay.
