FAGNONTENEAGNE 5

Toko’e Hino ze Raha Rehafe o Baibolio vao Rehe?

MANDEFA

Fa nidiso hevetse miomba ty ndaty raike vao rehe? Va’e fa naharey ndaty nagnaraty aze rehe, le tsy azoazo’o reke. Faie naho fa nahafantatse aze soa rehe, le trea’o fa kay vande avao i rahay. Misy magnaraty ka o Baibolio, le maro ty manjare tsy mino aze. Faie niova hevetse iareo naho fa boake nandineke o boke io.

Tsy mino o Baibolio ty maro amy ty ndaty nahavita fianaragne. Mateteke misy mirehake raha tsy maregne miomba aze o boke iohoe, le manjare mihevetse iareo fa tsy maregne ndra mifanohetse amy ty siansa ndra diso ze raha rehafe’e. Faie kera ndra tsy izay ty tena ie?

Va’e gaga rehe naho fa namaky ty bokekele toy fa kay tsy mifanohetse amy ty siansa o Baibolio. Maro ka ty nahatsapa hoe izay. Trea’e fa tsy boake amy Baiboly ao ty raha ampianare ty fivavahagne ila’e. Misy zao ohatse ty mirehake fa tagnate ty enegne andro misy 24 lera ty namorognan’Andrianagnahare ze kila raha. Faie diso zay. Tsy mifanohetse amy ty raha trea o mpahay siansao ty raha rehafe ty Baiboly. *

A manao akore ka ty namorognan’Andrianagnahare ze raha managne aigne? Tsy le mirehake ty miomba izay ty Baiboly. Afake mikaroke ty miomba irey o ndatio. Faie rehafe’e tie, Andrianagnahare ty namorogne ze raha managne aigne iaby, sady natao’e “arake ty karaza’e iaby” reo. (Genesisy 1:11, 21, 24) Tsy eké ty mpahay siansa ila’e zay satria tsy arake ty tombatombagne natao’e. Faie maregne o raha rehafe ty Baiboly reo, naho fa henteagne ty voka ty fikarohagne natao ty mpahay siansa hafa. Tsikaritse avao hatrake amy izay fa tsielatsiela avao, le trea fa tsy maregne o tombatombagneo. Eké ze kila ndaty iaby ty raha voaporofo fa maregne.

Faie maro ty tsy te hagnadihady miomba ty Baiboly satria diso fanantenagne. Trea’e fa manao soa miatreke naho manao aferafera sady mandrisike o ndatio hialy o fivavahagneo. Faie rare’e vao naho ty Baiboly ro meagne tsiny amy ze raha zay? Dineho zao: Maro ty mpahay siansa mangorìgne satria misy ndaty mampijale ze tsy mitovy fiaviagne ama’e sady ty fampianaragne miomba o evolisionao ro indese’e hagnamarenagne ty raha atao’e. Rare’e vao naho o fampianaragne iohoe ro meagne tsiny? Tsy soa vao naho ohatse mamantatse i tena fampianaragney sady mipay porofo mba hahafantaragne ty tena maregne?

Mandrisike azo handineke o Baibolio ka zahay. Ho fale rehe naho fa trea’o tie, tsy arake ty ampianare ty ankamaroa o fivavahagneo ty rehafegne ao. Tsy mandrisike o ndatio hialy ty Baiboly. Rehafe’e fa tsy toko’e halaigne ndaty ty mpanompon’Andrianagnahare satria mampialy zay. (Isaia 2:2-4; Matio 5:43, 44; 26:52) Tsy toko’e hagnorike avao ze raha ampanoe o fivavahagneo iareo ndra hino ze raha rehafe’e ama’e. Toko’e hanagne porofo iareo vaho izay mino ty raha raike, sady mila mampiasa ty sai’e naho fa manompo an’Andrianagnahare. (Romanina 12:1; Hebreo 11:1) Risihe ty Baiboly ka rehe hipay ty vale o fagnonteneagne mampivali-doha o ndatio hatrake amy izay io.

Fa nieretseretse vao ohatse rehe tie: ‘Naho misy ty Andrianagnahare, nagnino ro enga’e hisy o faharatiagneo?’ Mamale o fagnonteneagne iohoe naho ty maro hafa ty Baiboly. * Risihe’ay areke rehe mba hipay ty maregne avao. Mahafa-po naho mahaveregne sady marem-pototse ty fagnazava ty Baiboly. Tsy kisendrasendra avao zay. Trea fa boake aman’Andrianagnahare o boke iohoe.

^ feh. 5 Naho mipay fagnazavagne rehe, le henteo ty bokekele tihoe Nisy Namorona ve Izao Rehetra Izao?, naboa ty Vavolombelo i Jehovah.

^ feh. 9 Henteo ty toko 11 amy ty boke tihoe Inogne Vata’e ty Raha Ampianare ty Baiboly?, naboa ty Vavolombelo i Jehovah.