FAGNONTENEAGNE 2
Tsotra Vata’e vao o Selao?
Misy karazan-tsela 200 mahery ty agnate vatagne ao. Nisy ho aze avao vata’e vao i raha rey?
Agnisa ty raha bey pitsopitso’e amy ze kila raha ty vatantikagne. Misy sela 100 tapetrisa tapetrisa eo ho eo ty agnate’e ao, agnisa izay ty sela ty taolagne naho ty sela ty lio vaho ty sela ty betro.7 Misy karazan-tsela 200 mahery ty agnate vatagne ao.8
Sambe hafa ty dika o selao naho ty asa’e, faie miara-miasa soa naho mifandrambe iareo iaby. Tsy ombia hahavita ty vita o selao o Internet-io, i fitaovagne fifandrambesagne ampiasagne kabla afake mampita fagnazavagne malakilaky naho ordinatera an-tapetrisa’ey. Tsy misy dika’e ty raha vita o ndatio naho oharegne amo o selao, ndra o sela rehafegne tie fara’e tsotrao aza. Akore ty nampisy o selao?
Ino ty rehafe o mpahay siansa marò? Misy karaza’e roe lahibey o selao, le ty misy faritse bontolitoly agnate’e agne (nucleotude) naho o tsy misy faritse bontolitoly agnate’e agneo. Misy faritse bontolitoly agnate’e agne ty sela o ndatio naho o bibio vaho o raha mitirio. Faie tsy ahatreavagne izay ty sela o bakteriao. Tsotra noho ty sela misy faritse bontolitoly agnate’e agne ty sela tsy misy faritse bontolitoly agnate’e agne. Maro areke ty mino fa boake amy ty sela o bakteriao ty sela o bibio naho o raha mitirio.
Maro ty mampianatse fa nisy sela tsy misy faritse bontolitoly agnate’e agne nitelegne sela raike hafa ty taloha, sady tavela tao reke fa tsy rava. Nao zao nahavita nagnova i sela tagnate’e taoy i sela nitelegne azey ndra tie tsy manan-tsaigne aza. Nanjare nisy i sela fa niovay ka ze sela vaovao niboake tafara izay.9 *
Ino ty rehafe ty Baiboly? Rehafe’e ao fa nisy Mpamorogne manan-tsaigne namboatse o raha managne aigneo. “Tsy kandrahaegne, fa sambe nisy namboatse ze kila tragno, faie Andrianagnahare ty namboatse ze kila raha iaby.” (Hebreo 3:4) Hoe ka ty andine’e hafa: ‘O Jehovah, tena maro vata’e ty raha nivita’o! Taman-kilala ty nanoa’o aze iaby. Feno ty raha natao’o ty tane toy iaby [sady] ahatreavagne biby mihetseketseke tsy hay isahegne, le raha managne aigne bey naho kede.’—Salamo 104:24, 25.
Va’e ho nisy ho aze boake amy ty simika tsy misy aigne vao, ndra o sela fara izay “tsotrao” aza?
Ino ty tena maregne? Fa mandroso bey o siansao le afake mandineke ty agnate ty sela fara izay “tsotra” ao o mpikarokeo. Mihevetse o mino ty evolisionao fa mitovitovy amy i sela rey o sela nisy voaloha’eo.10
Faie nisy ho aze teo, arake ty ampianare o mpino ty evolisionao vao i sela “tsotra” rey? Naho maregne zay, le toko’e ho marem-pototse ty porofo mey iareo. Faie naho misy ka i Mpamorogney, le toko’e hibaribary zay ndra tie amo o raha finorogne kininio’eo aza. Andao hodinehentikagne ty agnate o sela tsy misy bontolitoly ty agnate’e agneo. Naho fa mamaky aze rehe, le eretsereto tie: ‘Nisy ho aze teo vao i sela rey?’
I “MANDA” MIARO O SELAÒ
Andao hatao tihoe mitilike ty agnate o selao ao rehe. Mba hahavitagne izay, le mila ahegne rehe, le atao fara’e izay ty kinikini’e tsy trea maso. Faie tsy le avy le tafilitse ao rehe, satria misy fogno’e miaro aze. Tsy mora riatse ty fogno o selao faie tsy gagne, sady mafe manahake o manda magnodidigne ty orinasa ila’eo. Tena manify io, satria 10 000 eo ho eo vaho mitovy amy ty fateve ty taratasy raike. Faie tena tsotra o mandao naho oharegne ama’e.
Miaro i orinasay o mandao. Hoe izay ka fa miaro i selay amy ty raha va’e hanimba aze i fognon-tselay. Faie afake militse naho miboake ao o molekiola kidikidikeo, ohatse o oksizenao. Faie tsy tafilitse ao ze molekiola bey pitsopitso’e atahoragne hanimba i selay, naho tsy tihoe enga i selay hilitse ao. Kalagna i fognon-tselay tsy hiboake ka ze molekiola ilae i selay. Akore ty ahavita’e izay?
Managne gardié ty orinasa ila’e. Ireo ty magnaramaso ze entagne mahazo miboake naho militse am-bavahady eo. Misy proteinina manao asa mitovy amy izay ka ty amo o fognon-tselao.
Misy “gardié” ty amo o fognon-tselao eo. Misy ty raha tsy enga’e hilitse, le misy ka ty raha tsy enga’e hiboake
Misy lavake manahake o tinelio ty proteinina ila’e (1) faie tsy ze molekiola iaby ro afake militse naho miboake ao. A manao akore ty proteinina hafa? Afake mivoha naho mihily ty an-tsisi’e roe ama’e (2). Naho fa misy raha avy ty ama’eo (3) , le mivoha reke mba hidira’e agnate i selay ao (4). Faie tsy ze kila raha ty ombe ao, fa karaza’e raike avao. Amy i fognon-tselay eo ty isehoa ze raha zay iaby.
TY AGNATE I “ORINASAY” AO
Eretsereto tie nenga i “gardiéy” nilitse rehe, le fa agnate i sela tsy misy bontolitoly ty agnate’e aoy tie amy izao. Misy ranoranon-draha feno raha mahavelogne naho sira vaho raha hafa ty ao. Ireo ty ampiasae i selay mba hagnamboaragne ze raha ilae’e. Akore ty ahavita’e izay? Misy fiovagne simika agn’arivo’e ty ao. Faie milamigne soa sady arake ty fotoa’e iaby zay, manahake ty fihody ty orinasa soa.
Magnamboatse proteinina ty tena atao o selao. Mamboatse asidra amine 20 karazagne eo ho eo hey reke. Alefa’e mbamo o ribôzômao mbeo (5), i asidra amine rey naho fa avy eo. Manahake o masinao o ribôzômao. Hai’e soa ze karazan’asidra amine ampiarahegne mba hagnomey proteinina. Ordinatera ty mikomandy ze masina amy ty orinasa ila’e. Hoe izay ka fa maro amy ty asa atao o selao ty miankigne amo o ADN-o (6). Boake ao ze toromareke ilae o ribôzômao mba hahafantara’e tie ino ty proteinina hamboaregne sady akore ty hagnamboaragne aze (7).
Mahalatsa ty fomba agnamboaragne o proteininao. Sambe managne ty pozipozi’e iareo. Misy ohatse, ty mihoronkorogne ndra miolakolake (8). Arakarake ty pozy i proteininay ty anjara asa’e. * Kera rehe fa nahatrea orinasa mpamboatse motera. Tsy maintsy mete soa ty fomba nagnamboaragne ty piesy tsikiraidraike agnate i moteray ao, fa naho tsy izay, le tsy handeha reke. Naho tsy mete soa ka ty fomba agnamboaragne o proteininao, le tsy hiasa soa reke sady va’e hanimba i selay aza.
I “orinasa” Mpamboatse Proteininay: Manahake o masina komandie ty ordinaterao o selao. Feno raha mamboatse proteinina naho mandefa izay ty agnate vatagne ao
Akore ty iavia o proteininao amy ty toeragne ilagne aze? Fa misy asidra amine manoro lalagne aze ty agnate’e ao. Tsy ombia ho diso lalagne o proteininao, ndra tie agn’arivo’e isa-minitra aza ty amboaregne naho ty sambe mandalo eo iaby.
Nagnino zay ro soa ho fantatse? Tsy mahavey vatagne ty molekiola bey pitsopitso’e agnate o selao. Poteke iareo naho ivela i selay ao. Faie tsy afake mitombo isake reke tie agnate o selao, naho tsy eo ty molekiola hafa. Ilaegne, ohatse, o anzimao mba hagnamboaragne i molekiola magnomey hery atao tihoey adénosine triphosphate (ATP). Faie ilaegne ka o ATP iohoe mba hagnamboaragne anzima. Tsy hisy ka o anzimao naho tsy eo o ADN-o (horehafegne amy ty toko magnarake), faie tsy hisy ka o ADN-o naho tsy eo o anzimao. Ankoatse izay, le o selao avao ty mahavita proteinina, faie ilaegne ka o proteininao mba hagnamboaragne sela. *
Tsy mino i mpikaroke miomba ty raha managne aigne kininio’e atao tihoe Radu Popa-oy fa misy ty Mpamorogne. Faie hoe reke tamy 2004: “Akore ty hampisy ho aze o raha managne aigneo, naho ze fagnandramagne nentegne nagnaporofo izay iaby aza tsy nisy nitomombagne?”13 Hoe ka reke: “Misy raha maro tsy maintsy miara-miasa ty agnate o selao ao. Tsy azo inoagne tihoe niara-niasa ho aze tey avao i raha rey.”14
Tsy maintsy hihomake i tragno beỳ, satria raty fototse. Tsy maintsy ho rava ka ty fampianaragne miomba ty evolisiona, satria tsy mazava amo o fampianaragne iohoe tie akore ty nampisy o raha managne aigneo
Akore ty heve’o? Mirehake o mpino ty evolisionao fa nisy ho aze o raha managne aigneo fa tsy finoron’Andrianagnahare. Faie mihamaro avao ty raha fanta o mpahay siansao, le vao mainke trea tie tsy nisy ho aze teo avao o raha managne aigneo. Mirehake ka areke ty ila’e amo o mpahay siansa mino ty evolisionao fa mbe tsy tena fantatse tie akore ty nampisy i raha managne aigne voaloha’ey. Nao zao hoe ty azo antoke le tihoe nivoatse erike io tafara ty nampisy aze. Eké’o vao zay?
Mirehake iareo fa misy raha maromaro miseho ho aze avao ty taloha bey tagne, le izay ty nampisy o raha managne aigneo. Nao zao hoe raha miseho ho aze avao, ty nahavy o raha managne aigneo ho maro karaza’e sady ho bey pitsopitso’e naho fa tafara tatoy. Faie tombatombagne avao reo. Naho i fagnazava iareo miomba ty nampisy o raha managne aigneo aza mbe tsy azo antoke, le ho azo inoagne vao ty fampianaragne hafa mifandrambe amy izay? Tsy maintsy hihomake ty tragno bey raike naho tsy soa fototse. Tsy maintsy ho rava hoe izay ka ty fampianaragne miomba ty evolisiona, satria tsy mazava amo o fampianaragne iohoe tie akore ty nampisy o raha managne aigneo.
Naho fa boake nandineke ty sela tsy misy bontolitoly ty agnate’e ao naho ty asa’e rehe, le akore ty heve’o? Nisy ho aze vao o raha managne aigneo sa nisy Mpamorogne manan-tsaigne namboatse aze? Mbe misalasala vao rehe? Andao areke hohenteantikagne i molekiola mikomandy ty asa o selaò.
