Ia ty Toko’e Hinoako?
An-dakilasy ao ty Peter. Vaho boake nagnazava i ramosé iareoy tie nampandroso bey o siansao ty fampianara i Charles Darwin miomba ty evolisiona, * sady nahavy o ndatio tsy hinohino fahatane. Ampirehafe’e ty heve’e iaby o ajajao hinane zao. Manomboke tsy mahazo aigne ty Peter sady mitepotepo ty fo’e. Ino ty anto’e?
Nampianare i rae aman-drene’e rey aze fa tsy marem-pototse ty fampianaragne miomba ty evolisiona. Nirehake iareo fa Andrianagnahare ro namorogne ty tane toy naho ze kila raha ama’e eo. Nihamafese’e fa tena maregne o fagnazava ty Baiboly iohoe. Sambe te hampianatse i Peter ze hevere’e fa maregne ndra o rae aman-drene’eo ndra i mpampianatsey. Ia areke ty toko’e hinoa’e?
Maro ty mpianatse sahiran-tsaigne hoe izay isan-taogne. Ino ty toko’e hatao iareo? Toko’e ho fantare’e soa tie ia ro tena marem-pototse: Tihoe mivoatse erike vao tikagne sa tihoe nisy namorogne? Afara izay reke vaho hifily ze hinoa’e.
Mirehake ty Baiboly fa tsy mete ty le avy le mino ze raha ampianare ty hafa. Rehafe’e ao fa: “Mino ze rehake rei’e ze mbe tsy nandia fiaignagne, faie mandineke ty lia’e ty mahimbagne.” (Ohabolana 14:15) Risihe ty Baiboly o Kristianao mba hampiasa ty ‘sai’e’, sady handineke soa naho hamantatse ze raha ampianaregne aze.—Romanina 12:1, 2.
Tsy natao handrisihagne o lakilasio hampianatse miomba ty famorognagne ty bokekele toy. Natao toy mba hahatreavagne naho maregne ndra tsy maregne ty fampianara ty ndaty ila’e tihoe nisy ho aze avao ze kila raha, fa talily vande avao i tihoey Andrianagnahare ty namorogne ze kila raha.
Ty miomba o selao ty tena horehafentikagne, satria tena ilaegne io mba hisia ty raha managne aigne. Hohenteantikagne ato ty raha ila’e mahaveregne agnate o selao ao. Hampandinehegne azo ka naho maregne ndra tsy maregne ty porofo ente o ndatio hirehafagne fa misy ty evolisiona.
Maro ty mieretseretse tie: ‘Nisy namorogne vao i raha managne aigne rey sa nivoatse erike avao?’ Va’e mbe hieretseretse hoe izay ka rehe. Maro ty fa nagneke fa nisy namorogne ze kila raha. Horehafentikagne amy ty bokekele toy ty porofo tsiampeampe nandrese lahatse iareo.
^ feh. 2 Ty atao tihoe evolisiona, le boake amy i fampianaragne tihoey tsy nisy namorogne ze kila raha managne aigne fa nivoatse erike boake amy ty raha tsy managne aigne.
