Eretsereto zao: Namonje fete ty Kazy. Vaho niavy kedekede reke, le nisy nirehake aze tie:

Kay i Pelazy nama’e o nirehake azeo sady ninday labiera roe vaho nisokafegne. Nimei’e i Kazy ty raike sady hoe reke: “Tsy mahazo minogne itone ka vao iheo gea? Ao gea mba minoma!”

Tsy te handrae ty Kazy, faie tsy nivani’e satria mpinamagne iareo amy i Pelazy. Tsy teà’e hieretseretse i nama’ey tie mahakamo reke. Nieretseretse ka reke tie: ‘I Pelazy aza mba hendre naho ie minogne. Sady i labieray ka vao le hagnino? Lia’e hafa naho rongony!’

Ino ty ho natao’o naho ihe ro Kazy?

Tsy hanaotao fahatane rehe, naho managne ty maha ie azo. Mila fantare’o tie ndaty manao akore rehe sady manao akore ty heve’o. Naho manao izay rehe, le ihe raike avao ro hanapa-kevetse ty raha hatao’o amy ty fiaigna’o fa tsy ty hafa.—1 Korintianina 9:26, 27.

Akore ty hahavita’o izay? Valeo hey ty fagnonteneagne retoa.

Hagnampe azo hatoky tegna ty fahafantaragne izay.

OHATSE AGNATE BAIBOLY AO: Hoe ty apostoly Paoly: “Fa ndra tie tsy mahay aza raho amy ty firehafagne, le tsy mba manahake izay amy ty fahafantaragne.” (2 Korintianina 11:6) Ty fahafantara’e soa ty Soratse Masigne ty nahavy aze tsy nanao raha raty. Tsy niovaova hevetse ka reke ndra tie nisy nagnakivy aze.—2 Korintianina 10:10; 11:5.

DINEHO TIE MANAO AKORE REHE.

Sorato eto ze raha hai’o ndra ty talenta anagna’o.

Sorato eto ka ze toetse soa anagna’o. (Ohatse: Soa fagnahy, matarike, azo atokisagne, magnaja lera.)

Ho simba ty toetse soa anagna’o naho tsy mialy amy ty fahaleme’o rehe.

OHATSE AGNATE BAIBOLY AO: Nahafantatse soa ty fahaleme’e ty Paoly. Hoe reke: “Mahafinaritse ahy vata’e ty lalàn’Andrianagnahare, amy ty toetse maha ie ahy, faie amy ty vatako ao le ahatreavako lalàna hafa mialy amy ty lalà ty saiko sady minday ahy ho ndevo ty lalà ty ota agnate vatako ao.”—Romanina 7:22, 23.

DINEHO TIE MANAO AKORE REHE.

Ino ty toetse raty ndra ty fahalemegne toko’e horeseko?

Handeha amy ty taxi raike vao rehe, le hirehake amy i soaferay mba hagnodidigne ty tragno bey raike amparake ty hilania ty gazoali’e? Hagegeagne ty fanoagne izay sady mandany drala!

Naho managne tanjogne rehe, le tsy handeha hoaze amy izao avao ty fiaigna’o fa hisy raha kendregne. Toko’e ho fanta’o areke ty raha tea’o hatao naho ty fomba hanoagne aze.

OHATSE AGNATE BAIBOLY AO: Hoe ty Paoly tie: “Naho fa lomay raho, le tsy lomay fahatane avao.” (1 Korintianina 9:26) Nanagne tanjogne ty Paoly, le nikezake hagnatratse izay fa tsy nandigne ty raha hiseho avao.—Filipianina 3:12-14.

DINEHO TIE MANAO AKORE REHE.

Manorata tanjogne telo tea’o ho tratraregne amy taon-koavy.

Manjare miovaova loko manahake o tagneo (ndra sangorikitagneo) rehe naho magnorik’efa avao. Tsy managne ty maha ie azo rehe naho manao hoe izay.

Naho resy lahatse amy ty raha inoa’o rehe, le tsy hiovaova hevetse ndra inogn’ino atao ty ndaty hafa.

OHATSE AGNATE BAIBOLY AO: “Tapa-kevetse tam-po’e tao” ty Daniela mpaminany fa hankatò ty lilin’Andrianagnahare. Azo antoke fa mbe tanora reke tamy izay sady lavitse ty keleia’e. (Daniela 1:8) Faie tsy niovaova hevetse reke fa nagnorike lognandro ty raha ninoa’e.

DINEHO TIE MANAO AKORE REHE.

Ino iaby ty raha inoa’o? Ohatse: Mino an’Andrianagnahare vao rehe? Ino ty anto’e? Nagnino rehe ro magneke fa misy vata’e reke?

Mino vao rehe fa mahasoa azo ty mankatò ty lilin’Andrianagnahare miomba ty findesam-batagne? Ino ty anto’e?

Aia ty teà’o, ty hitovy amo o rave-katae mora indese o tiokeo vao sa hatae mahatante tiobey? Hanahake i hatae mahatante tiobeỳ rehe naho tsy miovaova hevetse. Hanagne ty maha ie azo rehe sady hahafantatse tie ndaty manao akore ty vata’o.