Mbe tsy nisy lalàna nandrara ty fanompoan-tsampy tamy ty andro i Jakoba. Ndra tie teo zay, le fa nifanta i Jakoba tie i Jehovah raike avao ro toko’e hotompoegne. (Ek 20:3-5) Naho fa nampiheregne i Jehovah a Betela agne reke, le nandily ze ndaty niarake tama’e mba hagnary ze sampy tamy iareo agne. Nimey iareo i Jakoba i sampy rey le i reke ty nagnary aze. Agnisa i sampy rey zao ze kiviro va’e natao iareo aoly fiaro. (Ge 35:1-4) Azo antoke fa nahafale i Jehovah i raha natao i Jakoba zay.

Akore ka ty hampisehoantikagne fa i Jehovah raike avao ro tompoentikagne? Tsy toko’e hanao raha misy ifandrambesa’e amy ty fanompoan-tsampy naho ze raha mifandrambe amy ty fagnahy raty tikagne. Toko’e hariantika ohatse ze raha misy ifandrambesa’e amy ty fagnahy raty. Dinehentika soa ka ty fihisagne ataontikagne. Eretsereto zao: ‘Teako vao ty mamaky boke ndra magnente filma misy mirehake miomba ty vampira, ty mpamosavy, ndra ndaty managne hery mietake? Aseho amy ty fihisagne ataoko vao fa soa ty mazỳ naho ty mamoreke?’ Toko’e hohalavirentikagne ze kila raha heje i Jehovah.—Sl 97:10.

HENTEO TY VIDEO TIHOE “LIERO TY DEVOLY”, LE VALEO RETOA:

• Ino ty olagne natrehe ty mpianatse Baiboly raike atao tihoe Palesa?

• Nagnino ro soa ty mangatake fagnampeagne amy ty androanavi-pagnahy, naho managne olagne amy ty fagnahy raty tika ndra ty ndaty fantatikagne?

• Ino ty toko’e hataontika naho teantika ty harova i Jehovah?

• Ino ty fanapaha-kevetse nirambese i Palesa?

• Naho amy ty toeragne misy antikagne atoy zao, ino ty azontikagne atao mba tsy hisy heri’e amy ty fiaignantikagne o demoniao?